Izikile 29 - Ngudradreadrekadhane Ka Sisiu 魯凱語聖經

Maelaela ki swa Izipiti

¹ Sa tara mangealenga ka caili sakamangeale ki dramare ki samaka 12 ka vai ku taacaicaliane nai, ku Tamatama kawariva nakwane iya kai,

² “Lri tara kawlrau ka umawmase, lri kaelaelasu ki talialalai ki swa Izipiti; lri kaelaelasu iniane, la mialri kaelaela ki swa Izipiti.

³ Pelaela iniane, amia kai ku abebeelengenga ka Tamatama: Talialalai ki swa Izipiti, lri kiecebaku muswane! Miasu ki yadringi ki vaalru lepelepenge ka madradrau ka ei. Kai kadravane Nile nakwane amiasu, ka bekaceli amiasu.

⁴ Lri ara kailaku kaili ki calringasu, ku lakange ikai vaalru lai lri sudakipi ikai ki karalabesu, ala bilibili muswane patwalai kadravane Nile, adravane kudra la wadakipi ikai ki karalabesu ku lakange lri kipaelre kipubelenge.

⁵ Lri malraku muswane si kudra lakange verevere cilri pucalragulragu. Lai lri pacaisu ikai ubulane, kadrwa ku umawmase kulri dralreke muswane. Lri arakaiyaku ku kinawmasanesu lapu ki ngiapalapalai ka adhadhame si lawaudriwdripi.

⁶ Luka ngimiyaiya kikai, ku swa Izipiti makanaelre lri thingale ala ka Tamatamaku.” Ku Tamatama amia kai, “Swa Izipiti, ku swa Iseraylri satalu ku akiparalubane muswane; ku patengatengane, amani numi kudra vaeva ka malralrupi ka ukudru sikakathane.

⁷ Sana kingivaale durare numiane, macelra numi, si tuputhu ki paithithane lini, si pangi palrici ki drelreke lini.

⁸ Lakamani, amiaku kaika abebeelengenga ka Tamatama: Lri pakipadradresengaku numiane ku amakaruruburane, ku laumawmase si lanilapulapwane lri kipapacai demedeme.

⁹ Ku kadaengane ki swa Izipiti lri acinilrianenga ka ubulane. Luka ngimiyaiya kikai, lri thingale numi ala ka Tamatamaku. “Asi lwiyane nakwane kadravane Nile amiasu, ka amanisu ku wabekace,

¹⁰ lri kiecebaku muswane si kadravanesu ka Nile. Lri malraku ki kadaengane ki swa Izipiti, twalai tali dradha ka cekele Migedule, mwa tali lrawdru cekele ka Aswane, pakeela pagisane ki Kuse, patueelre lri acinilriane ka ubulane,

¹¹ kadrwa ku umawmase, laka kadrwa ku la tangukaikaiyane ki waudriwdripi. Ki nitara masupatelane ka caili, kai swa Izipiti lri kakadrwa ku umawmase kulri ikaikai.

¹² Lri paamatisesepelenga naku ki swa Izipiti ki kiacaebe ki belenge; ki nitara masupatelane ka caili, ku lacekele ki swa Izipiti lrika makadrwadrwa ku matisepelane ki tawlrakavane ka cekele. Lri pakwalriaku ki laumawmase ki swa Izipiti, lri mubere mwa ki lakuni, si ikaikai ki maelane ka kuni.”

¹³ Amiaku kaika abebeelengenga ka Tamatama, “Lu tara masupatelenga ka caili, lri sarubwaku ki swa Izipiti patwalai ki takipakatwasane lini mwa ki lakuni,

¹⁴ si ililuku liniane siwlri mu tali lrawdru Izipiti ka cekele lini. Ikai kwini, kwi lalasu lri yelrelre si avaeva ka tikiyane ka kuni,

¹⁵ ka turawraamurunga ka titikianenga ka kuni; kwi lasu kai lri maka rathudunga ki drumane ka kuni. Lri pakamaninga naku liniane kudra kadrwa ku nagane ka tikiane ka kuni, kai lri capangenga rathudu ki drumane ka kuni.

¹⁶ Ku swa Iseraylri kai lri satalunga ku akiparalubane liniane. Ku tangimiane ki swa Izipiti lu kidremedreme kai swa Iseraylri ku satalu ki umawmase yai paamama turamuru. Luka ngimiyaiya kikai, ku swa Iseraylri lri thingale ala ka abebeelengenga naku ka Tamatama.”

Ku Nibukadenezere ka talialalai pamalebe ki swa Izipiti

¹⁷ Ku taacaicaliane nai satara 27 ka caili ki aswalalanga ki dramare ka aswalalanga ki vai, ku Tamatama kawariva nakwane iya kai,

¹⁸ “Lri tara kawlrau ka umawmase, ku talialalai ki swa Babilunia ka Nibukadenezere kiakaruburu ki swa Tayre. Pasiamece ku mateelrege ki lakwapingi, la kalapulukunga kadadula ku tabalangane, ai ku talialalai si lakwapingi kai kiapawlrawlrau.

¹⁹ Lakamani, amiaku kaika abebeelengenga ka Tamatama: Lri malraku kai kadaengane ki swa Izipiti si baai ki talialalai ka swa Nibukadenezere. Lri ravase patueelre ki swa Izipiti, la ribici si iluku ku tacekecekelane; kilakikai niravasane lrika sapawlrawlravane ki kwapingi.

²⁰ Lri malraku ki swa Izipiti si baai iniane tusapawlrawlravane ku takaunganeini, asi lwiyane ku kwapingini kwaalri pasikai nakwane. Amiaku kai pelaela ka abebeelengenga ka Tamatama.

²¹ “Lukamaninga kwidra, lri pakagarangaku ki swa Iseraylri; kusu ka Izikile lai lri ikaisu ki akilalrane sanaka umawmasenga kawriva. Luka ngimiyaiya kikai, kwi lalasu lai lri thingale ala ka Tamatamaku.”