Izikile 28 - Ngudradreadrekadhane Ka Sisiu 魯凱語聖經

Maelaela ki talialalai ki swa Tayre

¹ Ku Tamatama kawariva nakwane iya kai,

² “Lri tara kawlrau ka umawmase, pelaela ki talialalai ki swa Tayre, amiaku kaika abebeelengenga ka Tamatama: Ngiapapasudalepesu iya kai, twaumasesu, miasu ki twaumase ka wanene ikai ki laveke ka taetalane. Adravane ngitatu twaumasesu, ku patengatengane, lri tara kawlrawsu, ka kaika twaumase.

³ Lu ngikakidremedremesu malrilrigilisu ki Daniele, ka wathingale patueelre ki kaika athingalane ka matiasamaimali.

⁴ Arakaisu ku thingalane si lrigilane apatumatumane si kaesai, ku drawsulu la rubu ku thathatha ku kingi gingi.

⁵ Wathingalesu ku tapiapiane siwbai, la drimadriima ku tacekecekelane. Ngiakalrilrigusu ki tacekecekelanesu!

⁶ “Lakamani, amiaku kaika abebeelengenga ka Tamatama: Asi lwiyane ngiatatu apararamawsu ki twaumase ku thingalane,

⁷ lri ililukaku ki malilisi ka badha kainganai kikaruburu muswane. Kudra arakaisu ku thingalane si lrigilane apatumatumane si malra patuelre ku tathaithaariri ku lamanemane, kwi lalasu lri kabebetethe patuelre.

⁸ Kwi lalasu lri papacai muswane, si pauthene muswane pwadringi ki laveke.

⁹ Kwi lalasu lu kainganai papacai muswane, lri thurwananasu ngitatu twaumase? Lu icucubungusu ki lri papacai muswane, lri thingalesu kalri tara kawlrawsu, ka kaika twaumase.

¹⁰ Lri ngunagananesu pacai ikai ki alrima ki kai kiasususu ka maelane ka kuni. Amiaku kai pelaela ka abebeelengenga ka Tamatama.”

Angimiane ki talialalai ki swa Tayre

¹¹ Ku Tamatama kawariva nakwane iya kai,

¹² “Lri tara kawlrau ka umawmase, pasikaiya ki talialalai ki swa Tayre senai ku sasilringavane. Pelaela iniane, amiaku kaika abebeelengenga ka Tamatama: Naamanisu ku kiatulrepenge ka takitwalravane, ka ngiathingale kathariri turamuru.

¹³ Yakaisu ki babengelradhane ki Twaumase, adringi Idingi, arakaisu ngiragelane ku duduli ku tinukucingalrane ka lrenege, bwaburavane ka tinukucingalrane ka lrenege, la daimune, salesese ka pisi ka lrenege, duduli ka pisi ka lrenege, pisi, salesese ka tinukucingalrane ka lrenege, mia ki ubulu ku saleseane ka makucingalre ka lrenege, duduli ka pisi, la arakaisu ku kingi ngiragelane. Kudra takibekacanesu kwini ki vai, pasiakaainga naku muswane kilakikai patuelre padulru.

¹⁴ Siakawlaku ki matiaukukuludru ka Kirubime ka amani ku palakebe muswane. Yakaikaisu ki saniange ka lregelregeli, si ngukakaikai ki lasilu dadavace.

¹⁵ Twalai ki takibekacanesu pakela ki sapathagilisu pasalriu kwini ki vai, ku kakwakudhanesu kiatulreepenge.

¹⁶ Sa ngiesadhanenga ku siwbaisu, la ngikarakacanengasu si pasalriu. Lakamani, ku vuthali pakatwase muswane ki saniange ka lregelregeli; kudra palakelakebe muswane ka sasiakawlu belenge pakatwase muswane kudra ki lawalikalikathe ku silu ka kadaengane.

¹⁷ Anau mathariri amiasu; ku takimatikaiyane ku naganesu pangiakalrilrigu muswane. Lakamani ku verevereli muswane pulebe, si arakai tusapakipapawlringavane ki latalialalai.

¹⁸ Makalra kai piapiasu kai ngialisiane, kaisu paluludu ki kakudhane siwbai, la kudrulrusu ki Alrivilrivi ka taikaikaiyane. Lakamani ku lamali muswane, la aabungasu, kidredrele ki laumawmase.

¹⁹ Kiasalrungasu, palralrawthunga kamudu. Ku wathingale muswane ku lakuni lri mukuludru makanaelre; kwi lalasu makiwcu lu ngimia muswane ku lrika angimiane lini.”

Maelaela ki swa Sidune

²⁰ Ku Tamatama kawariva nakwane iya kai,

²¹ “Lri tara kawlrau ka umawmase, lri kaelaelasu ki cekele Sidune.

²² Pelaela liniane, amiaku kaika abebeelengenga ka Tamatama: Sidune, lri kiecebaku muswane! Ngwalai ku tapathavungane muswane, ku laumawmase lri drengedrengere nakwane. Sana paadrelanaku ku takasanianganeli, si pathavungu, kwi lalasu lri thingale ala ka Tamatamaku.

²³ Lri pasalraelreaku ki cekele ku swalrubu, ki lakadalranane ki cekele lri mwalwaludru ku erai. Ku badha lri twalai kidruanga kainganai kikaruburu muswane, si papacai demedeme ki laumawmase. Luka ngimiyaiya kikai, lri thingalesu ala ka Tamatamaku.”

Ku swa Iseraylri lri kisubulrubulru

²⁴ Ku Tamatama amia kai, “Ku twadreadreadrekase ki swa Iseraylri ka langwadadethe ka kuni kai lri maka ngimianga ki cecenekane ka angatu ceneke si dula ki swa Iseraylri, ku swa Iseraylri lai lri thingale ala ka abebeelengenga naku ka Tamatama.”

²⁵ Ku abebeelengenga ka Tamatama amia kai, “Lri malraku ki swa Iseraylri patwalai ki taacaicaliane mwa ki lakuni ililuku kainganai siwlri; luka ngimiyaiya kikai, ku lakuni lai thingale ala ka saniangaku. Ku swa Iseraylri lri ikai ki kadaengane lini, ka amani kudra patarumarali baai ki sasiakawluli ka Yakubu ka kadaengane.

²⁶ Kwi lalasu lri ikai kwini si ngiesaesaesadhane ku tacekecekelane, tudadaane, tuumawmawma ku babudubudu. Lri pathavungaku ki twadreadrekase ki swa Iseraylri ka ngwadadethe ka lakuni, ku swa Iseraylri lai lri kasulivaliivatenga, luka ngimiyaiya kikai, kwi lalasu lri thingale ala ka Tamatamaku ka Twaumase lini.”