Izikile 27 - Ngudradreadrekadhane Ka Sisiu 魯凱語聖經

Silringavane si tubi ki swa Tayre

¹ Ku Tamatama kawariva nakwane iya kai,

² “Lri tara kawlrau ka umawmase, pasikaiya ki swa Tayre silringau,

³ tubia kudra ki acegecege ikai ki tawbilabilane ki lavarukuru, si la tarasiwbawbai ka kuni ikai ki latakaalra ka yakai kabicelrakane ki laveke ka kuni. Pelaela ki swa Tayre, ku abebeelengenga ka Tamatama amia kai: Tayre, ngialralrigusu ka kiatulrepenge ka cekele.

⁴ Sia daanesu ki laveke; la kitudaanesu tumathaithaithariri.

⁵ Kwi lalasu twabaali ku alrenge ka angatu ka twalai lregelrege Himunge, arakai ku twalai Lebanungu ka cedare ka angatu tuulrudru ka takelrakelradhane ki balrawbau ki varukuru.

⁶ Kwi lalasu arakai ku tharialupu ka angatu ki swa Basane tusakadrakadravane ikai ki varukuru, arakai ku alrenge ka angatu ki Saipuruse la patupapalra ku valisi ki zu si tusasapane belenge ki varukuru.

⁷ Ku balrawbau ki varukurusu niarakaiyane ku mathaithariringa ka nipapacasane ka malralrupi ka kaimadhane, ka pia ki swa Izipiti, lu sadailane drele athingaalane. Ku dadanesu niarakaiyane ku mathaithaariringa ka makalrilau, ka nisatedrane ka thilalatadhane ka makalrilau twalai kabicelrakane ki laveke ka kadaengane ka Saipuruse.

⁸ Ku tarakadrakadrau ki varukurusu yai swa Sidune si swa Arevade; ku tarahuntintingi ki varukurusu yai malrigili turamuru ka sakacekelesu.

⁹ Ku yakai belenge ki varukuru ku ladaikusange yai twalai ka Gebale ka maulainga ku takadaikusangane; ku yabelenge ki laveke ku lavarukuru si tarakawaungu ikai ki varukuru yakai ki tasiwbawbadhanesu malangalangai.

¹⁰ “Ku lakwapingisu yakai ku swa Perisia, Lidia, si Pute ka mwalrawlrau akwapingi. Kwi lalasu ku alathare si sakikaruburane ka talrupunu wakelrai pikai ki takwapinganesu. Kwi lalasu pasiakai muswane malra ku lrigu.

¹¹ Ku twalai Arevade ka lamwalrawlrau akwapingi pasiakai muswane kadrenge ki balingibingi ki cekele; ku twalai Gamade kainganai mulrawlrau akwapingi pasiakai muswane drangalru ki daane ki cekele. Kwi lalasu ku alathare wakelrai pikai ki balingibingisu. Pakiatulreepenge muswane.

¹² “Masasiwbai numi ki swa Taresise, arakaisu ku makaalra ku sakialangai ku lamanemane si kibalrithi ku gingi, adreme, si, cine lini.

¹³ La masasiwbai numi ki swa Gurike, swa Tubale, si swa Meseke, arakaisu ku lawbubulu kibalrithi ki laduri si lawbubulu ka lalriwlu lini.

¹⁴ Masasiwbai numi ki swa Bithe Tugarema, arakaisu ku lawbubulu kibalrithi ku tarasiameamece ka rigi, sakikaruburuburane ka rigi, si ngiririgi lini.

¹⁵ Masasiwbai numi ki swa Rudise, arakaisu ku lawbubulu kibalrithi ku valisi ki zu si umu ka angatu ki ngwadadethe ki laveke ki laumawmase.

¹⁶ Masasiwbai numi ki swa Arame, arakaisu ku thathatha ku lawbubulu si siwbai ku lamanemane kibalrithi ku salesese ka tinukucingalrane ka lrenege, thilalatadhane ka makalrilau, nipapacasane ka makalrilau, mathaithaariringa ka lalasare ka kaimadhane, cebe ki laveke, si duduli ka tinukucingalrane ka lrenege lini.

¹⁷ Masasiwbai numi ki swa Yuda si swa Iseraylri, arakaisu ku lawbubulu kibalrithi ku madradrau ka mugi, valu, lawlau ka ulrive, si sangwalreme lini.

^18-19 Masasiwbai numi ki swa Damasekuse, arakaisu ku lawbubulu si siwbawbaisu kibalrithi ku twalai Hilebune ka bava si twalai Sahare ka ubale ki kiu. Kwi lalasu la mialri arakai ku tathaithariri ku adreme ka lawbubulu si sangwalreme kibalrithi ku lawbubulusu.

²⁰ Ku swa Didane arakai ku sasapasapane lu ngurigiane kibalrithi ku lawbubulusu.

²¹ Ku swa Arabia si talikai Kidare ku latarasangililuku arakai ku lrulai ka kiu, nikiubawbalane ka kiu, kakiuane kibalrithi ku lawbubulusu.

²² Ku tarasiwbawbai ki swa Seba si swa Rama arakai ku lasilu, kingi, si takuciacingalre ku sangwalreme kibalrithi ki siwbawbaisu.

²³ Ku Harange, Kani si Idingi ka lacekele, tarasiwbawbai ka swa Seba, Asure si Kilemade ka lacekele masasiwbai numi.

²⁴ Kwi lalasu wamalra kudra tathaithariri turamuru ku lalaimai thilalatadhane ka makalrilau, nipapacasane ka makalrilau, waledra kathariri ka sapa ka tana, mathariri ka lakete, si calrisi si kilangai muswane.

²⁵ Arakaisu ku madradraunga ku sasiwbawbadhane ku varukuru suragele ku lasakialangai ku lawbubulu. Miasu ki yakaai belenge ki maadrau ka varukuru katwatwase, si pasueete ku sakialangai ku lawbubulu.

²⁶ Ku tarakadrakadrau wamalra iluku muswane pwa adaili ki laveke; ku twalai tali talrawane ku valrigi la valrigi muswane.

²⁷ Ku varukuru sakalutu si muthenethenenga, ku latakuciacingalre ku lasakialangai, makanaelre ku tarakawaungu ki varukuru si tarahuntintingi ki varukuru, ku yabelenge ki varukuru ku ladaikusange si tarasiwbawbai, yabelenge ki varukuru ku kwapingi makanaelre, patueelre mwathene mwadringi ki laveke.

²⁸ Ku takaralealane sa muthenethene ki latarakauawngu ki varukuru waelraelraelrange ikai ki ngwababiabila ki laveke.

²⁹ Ku lavarukuru la kicilri patuelre; ku latarakauawngu ki varukuru si tarahuntintingi ki varukuru la mubabiabila makanaelre.

³⁰ Kwi lalasu pasiakai muswane tubi, si ngicacabungu ku thuvugu, la ngibalrwalrwalrutai ikai ki thuvugu.

³¹ Kwi lalasu ngiakakiriti ku isiu, la sisakalremeane; kwi lalasu pasiakai muswane tubi kasuburunga ku kidremedreme.

³² Kwi lalasu pasiakai muswane senai kikai sasilringavane: Ainu ku cekele ku lri dulru kiramau ki swa Tayre? Yakai ku cekele ku lri dulru maka lribate kudra ki mwathene ikai adringi ki laveke ka swa Tayre?

³³ Lu papiapiasu lribate ki laveke satedre ku sakialangai, ku lakuni tarwamaara makanaelre. Ku tacekecekelane si sakialangaisu pakaesai ki latalialalai.

³⁴ Kaiasasane, kiapadradresengesu ku apacadhane; la muthenesu mwadringi ki laveke. Ku lawbubulusu patueelre si mwalrawlrawlrau muswane twapapaalra muswane kawlrau ikai ki laveke.

³⁵ “Ku layakaikai ki yakabicelrakane ki laveke ki lakadaengane ngwalai ku tangimianesu si ngituluku turamuru; ku latalialalai lini la mialri ngituluku si kakiwcu makanaelre, la kasumilringi ku lalringau.

³⁶ Kiasaalrungasu, si kapalralraauthunga kamudu! Kai kawmasane ikai kidruanga ku tarasiwbawbai makiwcu makanaelre, makiwcu kipadradresenge ku tangimianesu.”