Izikile 26 - Ngudradreadrekadhane Ka Sisiu 魯凱語聖經

Maelaela ki swa Tayre

¹ Ku taacaicaliane nai satara 11 ka caili ikai ki vaeva ka dramare ki aswalalanga ka vai, ku Tamatama kawariva nakwane; amia kai,

² “Lri tara kawlrau ka umawmase, kwi laumawmase ki cekele Tayre wakaralealeale ki sakiararagai, ‘Aha! Maburukunga Yerusalrime! Kwi alisu kadrwanga ku puku siwbai; kaika ecebanengata!’

³ “Lakamani, amiaku kaika abebeelengenga ka Tamatama: Cekele Tayre, lri kiecebaku muswane! Lri sarubwaku ki lakuni mia ki bikabiki kainganai kikaruburu muswane.

⁴ Kwi lalasu lri buruku ki balingibingi ki cekelesu, lri buruku ki kepale ki cekelesu. Lai lri mialriaku swape ku thuvugu patueelre, si kakathaanenga asuru elelelethe ku lrenege.

⁵ Ku swa Tayre lri tangeangeanga ikai kabicelrakane ki laveke; ku lataratukakange lri ikai kwini pavaivai ku arai. Amiaku kai pelaela ka abebeelengenga ka Tamatama. Ku lakuni lri kainganai ravase ki swa Tayre;

⁶ Kwi lalasu lri arakai ku dramu culrulu papacai ki laumawmase ka yakai ngithalringulu ka lacekele. Luka ngimiyaiya kikai, ku swa Tayre ala lri thingale ala ka Tamatamaku.”

⁷ Ku abebeelengenga ka Tamatama amia kai, “Lri dawlaku ki madradraunga ki kawmasane ka talialalai ki kuni, Nibukadenezere ka talialalai ki swa Babilunia lri kainganai kikaruburu ki swa Tayre. Kwi lasu lri sangililuku ki maadrau ka kwapingi twalai tali dradha kainganai, yakai ku kwapingi ka rigi, sakikaruburuburane ka palridingi, tarangurigirigi ka kwapingi.

⁸ Ku laumawmase ka yakai ki ngiathalringulu ka lacekele lri kipapacai makanaelre. Ku badha lri kela si lruku tuvalrwalru, la raedre ara dae, lai lri tilibi ku alathare si kikaruburu muswane.

⁹ Lri arakai ku saburuburukane ki cekele ka bulri si buruku ki balingibingi ki cekele, lai lri arakai ku kanabu buruku ki kepale ki cekele.

¹⁰ Ku tathathatha ku rigi lai kalrungulrungu, sueteeane ku thuvugu; lai makakaraleale ku tarangurigirigi ku lakwapingi, si lingau ki lasakikaruburane ka lapalridingi, lri tedretedrese ku balingibingi ki cekele. Lri cululru mwa ki lrawlrawdru ki cekele. Mia ki wacululru ngukakai ki takakadrwane ki umawmase.

¹¹ Ku latarangurigirigi ku kwapingi lralratuku lri iya ki lakadalranane ki cekele, si ara dramu culrulu papacai ki laumawmase. Kudra makeecenge ka ulrudru ki biwsu lri kikadrulu pikai cakena.

¹² Ku badha lri malra ravase ku tacekecekelane si la siwbaisu, lai kadrulu ki balingibingi ki cekele, si kabebetethe ki latathaithariri ka daane, ku lamatatithiri ku lrenege, macacelra ku laangatu lri cilri pwa ki laveke.

¹³ Lri paidrengeraku ku senaisu, paalikai ku lingau ki patungutungusu.

¹⁴ Lri paakabalrithaku muswane awaelelethenga ka lrenege, lri atapavaivaiyanenga pibelenge ku arai ki taratukakange sikakathane. Kikai cekele kai lri maka tupelanga tucekele. Amaniaku ka abebeelengenga ka Tamatama, ka amia kikai pelaela.”

¹⁵ Ku abebeelengenga ka Tamatama amia kai ki swa Tayre, “Lu kipamakingasu, ku laumawmase lri kipapacai; ku yakaikai ki ngwadadethe ki laveke ku laumawmase lri ngwalai ku takilalrane ku takaralealane lini si ngituluku kathathiburu.

¹⁶ Ku yabelenge ki laveke ku latalialalai lri katwase ki taetalane lini, si mwalra ku ebele si pinapacasane ku laimai, si kakiwcu la ngiabaalai nene ikai cakena. Ku taalikaiyanesu manwagiligiligilinga kwi lalasu.

¹⁷ Kwi lalasu lri pasikai muswane senai kai ki sasilringavane: Ku nimatikaikaiyane ka cekele maamudunga! Kudra la ngwababelenge ki laveke ka varukuruini kiaswapenga patueelre. Ku laumawmaseini namagagaarangenga ikai ki laveke, si kukukuludru ki ngwadadethe ki laveke ka laumawmase.

¹⁸ Ai, ku taamakianeini kwini ki vai, ku la yakabicelrakane ki laveke ku kadaengane manwagiligiligili makanaelre, kwini yabelenge kwi laumawmase ngwalai ki ngimiyaiya kai ku tangimiane si mukuludru.”

¹⁹ Ku abebeelengenga ka Tamatama amia kai, “Lri paubulanaku muswane ka cinilrianenga, mia ki cekele ka kadrwa ku umawmase ku yakaikai matiisepele. Lri arakaiyaku ku alrukulu ka laveke lrenepe muswane.

²⁰ Lri lrudrulaku muswane pwa swadriadringi, lasu taelre ki wapacainga ka laumawmase, lri elebaku muswane pikai lebe ki dae, si ikai taelre ki wapacainga ka laumawmase ikai kudra ki palralrawthu ka kadrwa ku manemane ka cekele. Lri kaisu maka dulrunga siwlri mukawmasane; kai lri ikainga ku umawmasesu.

²¹ Lri pakipadradresengaku muswane ku matiukukuludru ku alikaiyane, kaisu lri ikainga. Ku palrapalra alau lri silape muswane, ai kai lri maka kidringainga muswane.” Ku abebeelengenga ka Tamatama amia kikai pelaela.