Izikile 25 - Ngudradreadrekadhane Ka Sisiu 魯凱語聖經

Wayugingi ku akipathavungane ki swa Amune

¹ Ku Tamatama kawariva nakwane; kwi lasu amia kai,

² “Lri tara kawlrau ka umawmase, lri kaelaelasu ki swa Amune.

³ Pelaela liniane, amiaku kaika abebeelengenga ka Tamatama: Madalame numi drele lu kitusinalremelreme kai daaneli, la kadalame numi drele lu aubulane ka acinilriane kai kadaengane ki swa Iseraylri, lu acaicaicali kai swa Yuda.

⁴ Asi lwiyane kiaragai numi lu kwalrialri, lri patwaladhaku tali talrawane ki calragulragu pakainganai ki zuku paamaki numiane. Kwi lalasu lri ikai ki kadaengane numi tutasulasuladhane, si suteelrainga ikaikai. Kwi lalasu lri kane ku twalai ki kadaengane numi ku taleke, si ungulu ku mireke numi.

⁵ Ku cekele ki Raba lri atapagwagwanenga ki lrakeda, ku kuni patuelre ki swa Amune lri atapagwagwanenga ka tapeapecane ki lakiu. Luka ngimiyaiya kikai, lri thingale numi ala ka Tamatamaku.

⁶ “Ku abebeelengenga ka Tamatama amia kai: Asi lwiyane wacarecare numi itituku, kiraragai ku tamatikurwane, si sidrekase numi ki kadaengane ki swa Iseraylri,

⁷ lri malraku numiane si baai ki maelane ka kuni; kwi lalasu lri kainganai malra ravase numiane patueelre. Lri amudaku numiane, lai lri kasuburu numi kai ngikuninga, lai kaika numianenga kai kadaengane numi. Luka ngimiyaiya kikai, lri thingale numi ala ka Tamatamaku.”

Maelaela ki Muabe

⁸ Ku abebeelengenga ka Tamatama amia kai, “Ngwalai ku taiyane ki Muabe, kadrwa ku tamakakaelane ki drumane ka kuni kai swa Yuda amia,

⁹ ki ngwapapagisane ka lacekele ki swa Muabe lri pakikikaruburaku, adravane kudra ngilralrigulrigu lini kudra lanikepalane ka cekele, Bithe Yesimuthe, Baale Miune, si Kiriathaime lri kikikaruburu.

¹⁰ Lri papaamakiaku ki kudra ki twalai tali talrawane ki calragulragu kainganai ka lazuku ki swa Muabe, adravane ka Amune lri kipaamaki, lai lri kikarimuru ki lakuni kai Muabe.

¹¹ Lri tara pathaavungaku ki swa Muabe. Luka ngimiyaiya kikai, kwi lalasu ala lri thingale ala ka Tamatamaku.”

Maelaela ki swa Idume

¹² Ku abebeelengenga ka Tamatama amia kai, “Kai swa Idume pakiangeange turamuru bilri ki swa Yuda, ku pasalrivane lini wadaruru belenge.

¹³ Lakamani amiaku kai pelaela ka abebeelengenga ka Tamatama: Lri pathavungaku ki Idume, la amudu ki umawmase si nilapulapwane. Ku kadaengane twalai cekele ka Temange pakela cekele ka Didane lai acinilriane; ku laumawmase lai lri kipapacai makanaelre.

¹⁴ Ku kawkawluli ka swa Iseraylri lri pasikai nakwane bilri ki swa Idume. Kwi lalasu lri malra ku girimucaneli si gugu pikai ki swa Idume. Luka ngimiyaiya kikai, ku swa Idume lai lri thingale ala ka papiaku liniane bilri.” Ku abebeelengenga ka Tamatama amia kikai pelaela.

Maelaela ki swa Pelisitine

¹⁵ Ku abebeelengenga ka Tamatama amia kai, “Kai swa Pelisitine pakialringau bilri ki sakwaka baadha lini, yakai ki lisiane papacai ki badha.

¹⁶ Lakamani amiaku kai pelaela ka abebeelengenga ka Tamatama: Lri kikaruburaku ki swa Pelisitine, si amudu liniane, adravane ka asuru ikai dratane ka Pelisitine lri kiamudu makanaelre.

¹⁷ Lri pangicaaemaku pathavungu liniane, la papia liniane gugu ku girimucane, bilri pakaelre ku lisiane. Luka ngimiyaiya kikai, kwi lalasu lri thingale ala ka Tamatamaku.”