Izikile 24 - Ngudradreadrekadhane Ka Sisiu 魯凱語聖經

Madilange ka palungu

¹ Ku taacaicaliane nai sa tara bangatenga ka caili ki sakamangeale ki dramare samakamangeale ki vai, ku Tamatama kawariva nakwane; kwi lasu amia kai,

² “Lri tara kawlrau ka umawmase, pacasa kikai vai kaikameane, asi lwiyane kaikameane ku talialalai ki swa Babilunia pathagili lringulu kikaruburu ka Yerusalrime.

³ Papia ki wabaebaebalre ki kawkawluli iya kikai pathalrilriku. Pelaela liniane, amiaku kaika abebeelengenga ka Tamatama: Pubelenga ki apwi kwi palungu, la pasutea ku acilai ki palungu.

⁴ Kudra mathaithariringa ku beate, cau si vagisi pwa ki palungu, kudra nipilriane ku culrale la mialria pwa ki palungu.

⁵ Kudra mathaithariringa ku beate ki kiu pwa ki palungu, la pasuete ku angatu twapwi; si pangiburai, aga kwi culrale si beate.”

⁶ Ku abebeelengenga ka Tamatama amia kai, “Ku swaete ku tarapapacapacai ka cekele lri kipadradresengenga ku amatikurwane. Kikai cekele mia ki kaiyana kiasinau, ka madilange ka palungu, kwi yadringi kwi beate lri kingu vavaeeva kikacipi, kadrwa ku navaevanga ku lri asuru ikai ki palungu.

⁷ Kikai cekele yakai ku papacai patueraerai ki umawmase, ku erai la ngidalare ikai belenge ki masulraapele ka lrenege, kaika ngiadalare ikai ki daedae si lri kidralreke ki dae.

⁸ Pangiadalaraku pikai belenge ki maadrau ka lrenege ka kaika adulrwane kidralreke; kikai erai pakagirimucu nakwane, ku lrika abilrianeli.”

⁹ Lakamani, ku abebeelengenga ka Tamatama amia kai, “Ku swaete ku tarapapacapacai ka cekele lri kipadradresengenga ku amatikurwane! Lri ngikakamaniaku abate ku angatu.

¹⁰ Drima ku angatu, vigiviga ki apwi, aga ku beate, la drekara ku base, si pakulaama ku culrale!

^11-12 Ala malra kwini lriwlu ka palungu talungungu pibelenge ki madralrakedrake ka apwi, unu kwini dilange ki lriwlu kai lri dulru kudalai patuelre, ai lukadrungurunga si ngwalranenga ku dilange, ku palungu lri kabulanga.

¹³ Yerusalrime, ku kangangangasu ki sawvalai wakudrulrunga muswane. Adravane kisanu bulabulaku muswane, takakudrulranesu. Lu kainaku gugu pakaelre kai girimucaneli pwa ki kinawmasanesu, lri kaisu maka ngipelane kabula.

¹⁴ Amiaku kikai pelaela ka Tamatama. Ku lrika apangimianeli ku vai wakelanga. Kainaku lri tudwaduai kwi pasalrisalriwsu; lai kainaku kakalithi, si pacepe. Lri ngwalaisu ku piapiasu si kipathavungu.” Ku abebeelengenga ka Tamatama amia kikai pelaela.

Tapacadhane ki taelrelre ka ababai ki yuginsia

¹⁵ Ku Tamatama kawariva nakwane, amia kai,

¹⁶ “Lri tara kawlrau ka umawmase, lri pangitutulukaku malra ribici ki kadadaalamengasu. Madha adiridirivane, madha kwalrialri tubi, madha alralreselrese.

¹⁷ Madha pakilalralalra ki palrapalra ku tatubiane akutiki ku lingau. Madha kirikiriti ki awlru si ka mukekece, paathingalane laka watubitubi. Madha kabukabungu ki lringau, la madha kanekane ku sapulatadrane ki palrapalra ku akaneane.”

¹⁸ Sakamialrealre kwini ki vai, kiakawrivarivaku ki palrapalra ku ngwakai kikai; sakamaungu, ku taelrelreli ka ababai ala paacai. Sakakaiyane, la singikaiyaku pangimia ku drekase ki Tamatama.

¹⁹ Ku palrapalra la kivaga nakwane, “Asu piya kikai?”

²⁰ La pelaelaku liniane, “Ku Tamatama kawariva nakwane;

²¹ papeaelaela nakwane papia ki swa Iseraylri kikai vaga. Ku abebeelengenga ka Tamatama amia kai: ‘Wamalra numi ki daane ki Twaumase tutatwaladhane ku puku ki angikalrilrigwane, ka kadalame numi drele, si ka tasudralrwane ki kidremedreme; ai lri tusinalremeaku si kudrulru kai ki daane ki Twaumase. Kudra asuru ikai Yerusalrime ku lalalake numi lri kipapacai makanaelre.’

²² Lukamaninga kwidra, lri singikai numi ku tapianeli ka Izikile katwase pangimia. Kai numi lri ngitatamenge, kai numi lri kane ku sapulatadrane ki palrapalra ku akaneane,

²³ Kai lri kiriti ku awlru si ka mukekece, lai lri kai adirivane si tubi. Lri ngwalai numi ki pasalrivane numi si karilai, la macucucubungu tubitubi.

²⁴ Kwaku ka Izikile amaniaku ku nadrelenga numi drele ka sapatuthingalane; ku tapianeli, lri pia numi makanaelre. Ku Tamatama amia kai, lu kelanga kwidra, lri thingale numi iniane ala ka abebeelengenga ka Tamatama.”

²⁵ Ku Tamatama amia kai, “Lri tara kawlrau ka umawmase, lri ribicaku ki nikepalane ka cekele lini, amani kudra kadalame lini kiraragai, kadalame lini dredrele, tasatalwane ki kidremedreme ka daane ki Twaumase. Lai lri mialriaku malra ribici ki lalalake lini.

²⁶ Lukamaninga kwidra, ku abalu twalai ki apacadhane ku umawmase lri kainganai si pelaelaela kudra tangimiamiane.

²⁷ Ki kwini ki vai, kaisu lri amenemenene; lri avavagasu papia liniane kawriva. Luka ngimiyaiya kikai, lri asapatuthingalanesu liniane, kwi lalasu lai lri thingale ala ka Tamatamaku.”