Izikile 23 - Ngudradreadrekadhane Ka Sisiu 魯凱語聖經

Paasalriu ka tadrusa ka lamataka ka ababai

¹ Ku Tamatama kawariva nakwane; amia kai, “Lri tara kawlrau ka umawmase, kunadruma yakai ku tadrusa ku lamataka ka ababai,

² ka yakai Izipiti;

³ Kwi lalisu sa icengecengeana apairairange, la pasivavavangane ki laumawmase ku thuthu, kaika tawvaileketenga.

⁴ Ku nagane ki takataka sia Uhula, amani kai Samaria; ku agiagi sia Uhuliba, amani kai Yerusalrime. La mwaku karudrange liniane ki lamataka; kwi lalisu la tara tulaalake ku lalakeli.

⁵ Ku Uhula sa mwanga nakwane karudrange la apairairairangeana. Ngwacawane ki siasilangane ka Asiria.

⁶ Kwi lalasu sialaimai makanaelre ku thilalatadhane ku pacase ka laimai ki kwapingi, talialalai, si tabebelenge ki kwapingi; kwini lalasu layacengecenge ka tathaithariri, ka laabelenge ki tarangurigi ka kwapingi.

⁷ Kwi alisu ngwacawane patuelre ki tabebelenge ki kwapingi ki Asiria, la sitaelrelre liniane, si sukubu ki lasamiamiange lini ngikakudrukudrulru.

⁸ Kwi alisu paiyaiyana ku natapiapiane ikai Izipiti sa kaika tawvaileketenga apairairange. Saka vavalakeana, yakainga ku sawvalai ku tadrusa iniane apece, twapairairange iniane.

⁹ Lakamani, ku malrali iniane baai ki ngucawaneini ka Asiria.

¹⁰ Kwi lalasu mwalaimai iniane patueelre, si ruthuku ki lalalakeini, ala arakai ku dramu culrulu papacai iniane. Ku matiangeangane ku tapacadhaneini amaninga ku vaga ki lalabaibai lu kalaelaelange.

¹¹ “Ku agini ka Uhuliba wadrele kikai tangimiane, ai manganganga ka mapasaisalriu ki sawvalai ki takaini ka Uhula.

¹² Kwi alisu mialri ngucawane ki talialalai si tabebelenge ki kwapingi ki Asiria, ki sia laimai ku mathariri ka laimai ki kwapingi, si tabebelenge ki tarangurigirigi ka kwapingi; kwi lalasu tathaithariri turamuru ka layacengecenge.

¹³ Wadrelaku ki alisu sa kikudrulru, mia ki takaini kanganganga ki sawvalai.

^14-15 “Kai alisu arwa kanganganga ki sawvalai sikakathane. Adravane ki nituumawmasane papacase pikai ki balingibingi ka lalringau ki tabebelenge ki kwapingi ki Babilunia ngwacawane; kwini lanituumawmasane arakai ku duduli papacase, la silakete, la sitalrupunu ku sangiragelanane ka talrupunu ikai ku dameamesai.

¹⁶ Kwi alisu sana drele kwini ki lanituumawmasane madaalame liniane, si sikawlu ki umawmase mwa ka Babilunia kikawriva liniane.

¹⁷ Ku swa Babilunia la kainganai si tadrusa iniane apece, la singikaai ngulwadhane kabebetethe iniane, kudrulru tusinalreme iniane, kwi alisu sakabilrilinga la kalisi liniane.

¹⁸ Kwi alisu yakai cucubungu ki mapapangale ka mulaimaimai ku kinawmasane, ku lrika athingalane makanaelre iniane ala ka pairairange. Mavalracevacaku iniane, mia ku takavalracevacaneli ki takaini ku paswalala.

¹⁹ Kwi alisu kai marimurimuru sa icengecenge si ikai Izipiti apairairairange, kai yasadrasadra ku apairairangeini.

²⁰ Kwi alisu ngwacawane kudra ngiacaeme ku tacebeane ku kinawmasane mia ki yaubulane ka ruba, ku puku mia ki yaubulane ka rigi kisuete ku puku ka siasilangane.”

²¹ Uhuliba, mwarikaisu kudra sa icengecengeananasu si ikai Izipiti apairairairange, la kisivavavangane kwi thuthu ki umawmase, ngwalranenga ku takatawvaileketane si apairairairangenga.

Ku Twaumase wasaibange ki agiagi

²² “Lakamani, Uhuliba, kwaku ka abebeelengenga ka Tamatama amiaku kai muswane: Masupilringasu kudra ki lasiasilangane, ai lri pakagirimucaku liniane, si ililuku liniane lringulu muswane.

²³ Lri ililukaku makanaelre ki swa Babilunia si swa Kaledia, ki swa Pikude, swa Sua, swa Kua, si swa Asiria makanaelre kainganai. Lri dawlaku makanaelre ki yacengecenge ka tathaithariri ka latalialalai, ki lakiacapili ki tabebelenge, la yakunkunkwane, si tabebelenge ki kwapingi lri ngurigi kainganai.

²⁴ Kwi lalasu lri ililuku ki maadrau ka kwapingi, lai lri mailuku ku sakikaruburane ku palridingi si wailuku ku lamanemane ku palridingi, lri twalai tali dradha kainganai kikaruburu. Kwi lalasu lri arakai ku alathare ku sakikaruburane ka talrupunu ngipapalakebe si kainganai lringulu kikaruburu muswane. Lri pakelaku liniane pathavungu muswane, lai lri singikai ki hulrice lini saibange muswane.

²⁵ Asi lwiyane malisiaku muswane, lri pakagirimucaku liniane papia muswane. Kwi lalasu lri lrathipi ki ngungwane si calringasu, si papacai ki lalalakesu. Lri ravase ki lalalakesu si patakunianiiake lama liniane.

²⁶ Kwi lalasu lri mwalra kwi laimaisu, si ribici kwi lasilusu.

²⁷ Lri ruthukaku kwi ngilralraingane ki kidremedremesu, si paalikai kwi taapairairairanganesu ikai Izipiti, lai kaisu murikainga ki lasamiamiange, lai kaisu adirivanenga Izipiti.”

²⁸ Ku abebeelengenga ka Tamatama amia kai, “Lri malraku muswane si baai ki kalisilisisu si kavalracevacesu ka umawmase.

²⁹ Kwi lalasu ngwalai ki lisiane muswane, lri ribici ku kwalrisu ala malra ku tacekecekelane, si malra nguelre muswane, lai lri vilralrakanesu, mia ki pairairange. Kikai patueelre twalai ki urikaiyane ki kidremedreme si ngangane ki sawvalai.

³⁰ Apairairangesu ki lakuni, wasukubusu ki lasamiamiange lini si ngikakudrulru.

³¹ Ngwakakaisu ku tangukakaiyane pudrapale ki taka, lakamani kudra ungulungaini ku kupu ka sapathavungane ka bava lri paungulaku muswane.”

³² Ku abebeelengenga ka Tamatama amia kai: Lri ungulusu kai kupu ki taka; kikai kupu alrukulu maadrau. Ku umawmase lri mulralrakai muswane; kikai kupu nigugwane pasueete ku sapathavungane.

³³ Ku kupu ki taka ka Samaria, ka amani kudra matiaukuludru, matisepele ka kupu, lri pakabusuku, patubi muswane.

³⁴ Lri ungulusu eleme kikai kupu, adravane ka thalrimwane lri lrungulrungusu patuelre; ku sangukacwakane ki kupu lri dula ki thuthusu. Amiaku kai pelaela ka abebeelengenga ka Tamatama.

³⁵ Lakamani, ku abebeelengenga ka Tamatama amia kai, “Asi lwiyane marimurungasu nakwane, si cilri nakwane, lri ngwalaisu ku murikaiyane ki kidremedremesu si nganganesu ki sawvalai la kipakwalri turamuru.”

Ku Twaumase wasaibange ki lamataka ka ababai

³⁶ Ku Tamatama amia kai nakwane, “Lri tara kawlrau ka umawmase, padulrungasu ku asaibangane ki Uhula si Uhuliba? Putaluvaivadha pelaela ku ngilisianane ku kakwakudhane lini.

³⁷ Kwi lalisu pasalriu sudringai si papacai, ka amani kwidra wasukubu ki samiamiange, la papacai kudra tulalake lini ku lalakeli ka sawvalai. Kwi lalisu wamalra ki lalakeli ka sawvalai tusapatarumarane ka waudriwdripi si patarumara baai ki lasamiamiange lini.

³⁸ Kaika paiya kikai sikakathane, twasinalremeana ki daaneli, si pasalriu ki kelreteli ka Taisadrasadrane ka vai.

³⁹ Kwi lalisu sa papacai ki lalalakeli, si malra tusapatarumarane ka waudriwdripi si patarumara baai ki lasamiamiange kwini ki vai, wamwalringa ki daaneli kudrulru iniane!

⁴⁰ “Kwi lalisu apapelaela pakatwase ku kiasikawlu mwadaidaidaaili dawlu ki umawmase kainganai, kwini lalasu la kainganai. Kwi lamataka la mubanau sikeelre, ngikakimi, pakaicelrenge ku sakelrepe, la sisilu.

⁴¹ Kwi lalisu la nene ikai ki mathaariri ka niapeapecane ka taetale, la picucubungu ku cukwi, si pibelenge pasueete ku baaili liniane ku lasangwalreme si lawlau ka ulrive ka latathaithariri ka lamanemane.

⁴² Yakai ku takaalra ku laumawmase ku twalai calragulragu kainganai ka kadrwa ku piapia ka laumawmase si kapeapeaperau matingiangicalre. Kwi lalasu la malra kwi kalathe si pasikalathe ki lamataka, ku gecegece la pwa ki awlru lini.

⁴³ La kidremedremaku: Kwi lalasu kiarararagai taelre ki mariilainga ka pairairange.

⁴⁴ Kwini lalasu apapelaela kela silape kai ki lapairairange, la kai telrai kainganai silape kai ki manganganga ki sawvalai ka Uhula si Uhuliba.

⁴⁵ Kunumi ka aparamaramau ka umawmase saibanga liniane ku tasudringadhane si tapapacadhane pasalriu; asi lwiyane kai lalisu pasalriu ki sawvalai, ku alrima la kadapenge ku erai kiara papacai ki umawmase.”

⁴⁶ Ku abebeelengenga ka Tamatama amia kai, “Sarubwa kudra ki taralrumalrumai si kukuludru liniane, la malra demeedeme ku lawbubulu lini.

⁴⁷ Kwini taralrumalrumai ani ara lrenege lrumai liniane, ara lrabu culrulu liniane, si papacai ki lalalake lini, la lama ki daane lini.

⁴⁸ Lri paidrengeraku kai ki kuni ki tarakanganganga ki sawvalai, si pakipapawlringau ki sanaka laababai ku kaika atwalralravane liniane kanganga ki sawvalai.

⁴⁹ Kunumi ka tadrusa ka lamataka, lri pathavungaku kwi ngangane numi ki sawvalai si sukusukubu numi ki lasamiamiange. Luka ngimiyaiya kikai, lri thingale numi ala ka abebeelengenga naku ka Tamatama.”