Izikile 22 - Ngudradreadrekadhane Ka Sisiu 魯凱語聖經

Pasalrivane ki Yerusalrime

¹ Ku Tamatama kawariva nakwane; kwi lasu amia kai,

² “Lri tara kawlrau ka umawmase, padulrungasu ku lrika asaibangane kai ki swaete ku tarapapacapacai ka cekele? Putaluvaivadha ku tapianeini patueelre ku ngialisiane.

³ Pelaela kai ki cekele, kilalra ku taiyaneli ka abebeelengenga ka Tamatama: Asi lwiyane papacaisu ku takaalra ku sakacekele, la sukubu ki lasamiamiange ngikakudrulru, lakamani ku alikaiyanesu wakelanga.

⁴ Pasalriwsu papacai ki umawmase, la kikudrulrusu kudra piasu ku lasamiamiange, lakamani ku vaisu swaetenga, ku alikaiyanesu wakelanga. Ngwalai kikai, lri patusinalrelremeaku ki lakuni muswane, sanaka kuni lai lri ulralrakai muswane.

⁵ Ku ngwadadethe ku ngwadadaili ku lakuni mwalralralrakai kwi lrithavulane si nganganesu.

⁶ Ku latabebelenge ki swa Iseraylri makanaelre arakai capange ku kindri, si papacai ki laumawmase.

⁷ Ikai ki cekele kadrwa ku umawmase ku mwasakene ki marudrawdrange. Kunumi twasinalreme numi si tavuvulrucu ki wakela iziu, la dredrepete ki lapakulrulrulu si walibakane.

⁸ Twadrekase numi ki Alrivilrivi ka taikaikaiyaneli, la kai pangimia ki Taisadrasadrane ka vai.

⁹ Ikai numiane yakai kwi umawmase kwi tara tavuvuvulrucu, pakai ku apapacadhane ki umawmase; yakai kwi umawmase kwi wakane ku nipatarumaranenga ki lasamiamiange ku beate; yakaai kwi tarasilasilape ku angulwadhanane ki sapiakanganga ki sawvalai si ababai;

¹⁰ Yakai ku umawmase ku tadrusa ki sakadrusa ka taelrelre ki tamaini; yakaai kwi wavutha tadrusa apece ki siaerai ka ababai;

¹¹ Yakai kwi paswadringai ki taelrelre ki palrapalra; yakai kwi walrilrigili si pasalriu ki kiathareve ki betakaneini ka mararamau ku tama ai makakaela ku tina, si mararamau ku tina la makakaela ku tama.

¹² Ikai numiane yakai kwi umawmase kwi sia awngane ku apapacadhane; yakai kwi umawmase ku pakiasaalru si tuadrau ku lalake, la papia ki sakacekele malra ku lalake ki takisalrwane, nguelre ribici ku tacekecekelane lini, si satacekecekelane ngukai ki kai madringelrese. Kwi lalasu marimurunga nakwane.” Ku abebeelengenga ka Tamatama amia kikai pelaela.

¹³ “Lakamani, lri vidrividraku lrumai ki kai ngwakai ki mathariri ku tacekecekelane, si sawlri ku kiame ngukai ki erai.

¹⁴ Lu sisaisangenga naku muswane, yakaiyana ku garanganesu? Yakaiyana ku pukusu? Amiaku kai pelaela ka Tamatama. Lu kawrivanga naku, lri tara ngimiya.

¹⁵ Lri malraku ki laumawmasesu pasarau mwa ki lakuni, si palikai kwi ngilisianane kwi kakwakudhane numi.

¹⁶ Ku lakuni lri tusinalrelreme muswane, lai lri thingalesu ala ka Tamatamaku.”

Maadrau ka tadrungudrungurane ki Twaumase

¹⁷ Ku Tamatama kawariva nakwane; amia kai,

¹⁸ “Lri tara kawlrau ka umawmase, kai swa Iseraylri yai cinilriane ka lamanemane. Kwi lalasu mia ki cinilriane ka tedrane ki sangudrungurane ki gingi, kadrwanga ku paluludane ka lriwlu, si adreme, si cine.

¹⁹ Lakamani, kwaku ka abebeelengenga ka Tamatama peaelaelaku liniane, kwi lalasu mararaamau ki cinilriane ka lriwlu adreme ka kadrwa ku paluludane. Lri malraku sarubu liniane pikai Yerusalrime,

²⁰ si arakai ku lisiane derenau liniane, mia ki umawmase ka wasarubu ku gingi, lriwlu, adreme, cine si pwa ki apwi drunguru pakaderenau.

²¹ Lri tara sarubwaku liniane pikai Yerusalrime, la padalai ku lisianeli ka apwi si derenau liniane.

²² Kwi lalasu lri ikai Yerusalrime ngiderenau, mia ki gingi ka yakai ki tadrungudrungurane ngiderenau. Luka ngimiyaiya kikai, kwi lalasu lri thingale nakwane ka Tamatama ka papia liniane gugu ku girimucane.”

Pasalrivane ki latarasangililuku ki swa Iseraylri

²³ Ku Tamatama kawariva nakwane; kwi lasu amia kai,

²⁴ “Lri tara kawlrau ka umawmase, pelaela ki swa Iseraylri, kwi kadaengane lini kaika mabula. Lakamani, lri kalisiaku si pathavungu liniane, si kai baai liniane ku udale.

²⁵ Ku latarasangililuku liniane mia ki laraiyungu ka papiapia ki nipanane kadadula girigiringi. Kwi lalasu papacai ki laumawmase, la nguelre ribici ku takuciacingalre ka lawbubulu, la takaalra ku laababai ku walibakane.

²⁶ Ku labarakalai wabaebalre ki hulriceli, la tudreadrekase ki saniange ka lawbubululi. Kwi lalasu kai wasusu luka manemane ku nitusaniangane, luka manemane ku ngwakawmasanane, la kai bulrubulru ki laumawmase thingale apapapilri ku mabula si kaika mabula, la tudrekase ki Taisadrasadrane ka vai. La ngwalai kai, ku swa Iseraylri kai mwasakene nakwane.

²⁷ Ku latabebelenge mia ki latawpungu ubulane ka wababurau ki pana; kwi lalasu satalutaalu sikakathane ku apapacadhane ki laumawmase si satacekecekelane.

²⁸ Ku layuginsia wasubusubu ki pasalrivane lini, mia ki umawmase ka arakai ku nithalreane ku abu ka lrenege si paderau ki balingibingi. Ku maburusi lini yai nicapangane kidremedreme; ku yugingi lini nitavuvulrucane. Kwi lalasu amani nai ku peaelaelaela ku vaga ki Tamatama ngiaiyaiya, ku patengatengane, kwaku ka Tamatama kadrwa ku kawrivali liniane ku vaga.

²⁹ Ku yakai ku paisu watavuvulrucu, wamalra nguelre, si pakiangeange ki matiakukuru ka umawmase, la pamatikuru ki wakela iziu pakai ku akaesadhane lini.

³⁰ Yakaiyaku liniane silape, drele lulri ikai ku umawmase lutumane, ku lri dulru pudriadringai ki balingibingi ki cekele, la acegecege ikai ki takaburukane ki balingibingi ki cekele, ku lrika adulrwane palakebe lu kalisiaku si buruku ki cekele, ai kainaku maka kiadringai kuna tangeanga.

³¹ Lakamani, lri papiaku liniane gugu kai girimucaneli; ku apwi ka lisianeli lri lama utu ku pia lini patueelre.” Ku abebeelengenga ka Tamatama amia kikai pelaela.