Izikile 21 - Ngudradreadrekadhane Ka Sisiu 魯凱語聖經

Dramu ki Tamatama

¹ Ku Tamatama kawariva nakwane; kwi lasu amia kai,

² “Lri tara kawlrau ka umawmase, cucubunga Yerusalrime, si kaelaela kudra ki la Alrivilrivi ka taikaikaiyane. Pakipapawlringava ki swa Iseraylri,

³ Tamatamaku ka amia kai: Lri kiecebaku numiane; lri musudraku ku dramu si papacai numiane, adravane ka mathariri ka manganga ka umawmase lri papacadhaku demedeme.

⁴ Lri arakaiyaku kai dramuli papacai ki umawmase, twalai tali dradha pakeela tali lrawdru lri papacadhaku patuelre.

⁵ Sanaka umawmase lri thingale, lu musudraku ku dramu ka Tamatama; kainaku lri sawlringa.

⁶ “Lri tara kawlrau ka umawmase, lri daangesu, mia ki masulringa kasuburu ku kidremedreme ka umawmase; lri ikaisu cucubungu ki mapapangale daange.

⁷ Kwi lalasu lwiyasi kivaga muswane asu daange iya, pelaela liniane, ngwakaisu ku takilalrane ku malisi ku nipelaelane daange. Kwini malisi ka nipelaelane sana kela, kwi lalasu lri kawpungu ku kidremedreme, si lrunainga ku alrima, la manugiligili ku drapale, ka kadruanga ku garangane. Ku vai wakelanga, ku amatikurwane yacucubungunga!” Ku abebeelengenga ka Tamatama amia kikai pelaela.

⁸ Ku Tamatama amia kai nakwane:

⁹ “Lri tara kawlrau ka umawmase, yuginga, pelaela ki laumawmase, amiaku kaika Tamatama: Ku vaeva ka dramu, ka vaeva ka maraangisi elelethe ka dramu,

¹⁰ maka twadreadremenga lri papacai ki umawmase, maka waselredrenga mia ki lrikace likalikathe. Kai kawkawluli kai kialalra ku takipakipapawlringavane, kai mwakuludru kipathavungu; kwi lalasu lri tumane kiraragai!

¹¹ Ku dramu maka waselredrenga paelelethe, lri dulrunga arakai; ku dramu maka twadremenga, kai lri katumanenga baai ki tarapapacapacai.

¹² Lri tara kawlrau ka umawmase, karaleala! Kikai yai nipasikaiyane ki kawkawluli twadreme ka dramu; kikai yai nipasikaiyane ki tarasangililuku ki swa Iseraylri selredre paelelethe ka dramu. Kwi lalasu thadalrane ki drumane ka kawkawluli karedele kipapacai. Kasulrianga si ngitatatuku.

¹³ Kwaku ka abebeelengenga ka Tamatama kialrialrialringavaku ki kawkawluli; kwi lalasu alaiyasi kai ngitatupela, ku amatikurwane lri tara mulebe mwa liniane. Ku abebeelengenga ka Tamatama amia kai pelaela.

¹⁴ “Lakamani, lri tara kawlrau ka umawmase, yuginga. Lri carecaresu, ku dramu lai kai idrengedrengere ku avidrividrane papacai. Kikai yai vaeva ka papacai ki umawmase ka dramu, pangiatuluku ki umawmase si papacai ki umawmase ka dramu.

¹⁵ Kikai dramu pakamameelrenga, pangwadreke ki kawkawluli. Lri arakaiyaku kikai mia ki lrikace ledra, padulru ku sapapacadhane ki umawmase ka dramu kukuludru ki cekele lini.

¹⁶ Rangirangisi ka dramu, apaececeeba culrulu papacai! Kadrwa ku lri kiecebe muswane.

¹⁷ Lri mialriaku carecare, kwi lisianeli lri kawlrawnga. Amiaku kai pelaela ka Tamatama.”

Dramu ki talialalai ki swa Babilunia

¹⁸ Ku Tamatama kawariva nakwane; amia kai,

¹⁹ “Lri tara kawlrau ka umawmase, zega ku sipusale ku kadalranane ku angukaiyane ki talialalai ki swa Babilunia mailuku ku dramu mudaane kikaruburu; kikai drusa ka kadalranane lri tara ikaai ki vaeva ka kuni ku tatwaladhane. Ku tamauvagadhane kai ki kadalranane pasikaiya ki talialalai cegecege ku sapadrukangane ku angukaiyane,

²⁰ ku sivale wadrukange papia Amune ka cekele Raba, ku sivale papia ka Yuda, samamwa ka Yerusalrime ka nitukecenganane tukepale ka cekele.

²¹ Ku talialalai ki swa Babilunia lu kelanga kwini ki sapauvagai, lri acegecege ikai cucubungu ki sapadrukangane, lai lri arakai ku wavelevele ki lraili tulrisi kithingale, si kivavaga ki lasamiamiangeini, lai lri drele ku athai ki sapatarumarane ka waudriwdripi.

²² Kudra ecenge ki vanale ka alrimaini ku lraili nipacasane ‘Yerusalrime’ iya! Kikai yai peaelaela iniane lri tara papia Yerusalrime ku lakwapingi. Kwi lasu lri padulru ku saarakaiyane buruku ki cekele ku bulri, lri arakai kwini buruku ki lrawlrawdru ki cekele; lri ara dae raedre, lai lri lruku tuvalrwalru, si makakaraleale papacadha iya.

²³ Ai ku swa Yerusalrime kai masalru kikai yugingi, asi lwiyane kwi lalasu namakaketeketenga ki swa Babilunia. Kikai yugingi lri pakipapawlringau liniane, lai lri ngulringau ku tapasalrivane lini, si la pakipapawlringau liniane ka lri kiravase.

²⁴ Kikai yai taiyaneli ka abebeelengenga ka Tamatama. Ku tapasalrivane numi kiaputaluvaivainga. Sanaka umawmase wathingale ku pasalrivane numi ka maadrau, ku tangivelevelane numi patueelre pwataluvaivai ku pasalrivane numi. Lri tara kipathavungu numi; lri baadhaku numiane ki badha.

²⁵ “Kusu ka manganga ka lri pacai ka tarasangililuku ki swa Iseraylri, ku alikaiyanesu wakelanga; lri maicubungusu kudra ki bibilrilinga ka akipathavungane ka vai.

²⁶ Amiaku kikai pelaela ka abebeelengenga ka Tamatama. Mwalra kwi pagamucu ki talialalai si sangiragelanane ka talrupunu! Akabalrithinga patuelre. Ku kadrwa ku puku lri kiparwa belenge, ku warathudu lri kipulebe.

²⁷ Kiasalrunga, kiasalrunga, kai cekele kiasalrunga. Ai lri ukalava ku akelane ku pilrili ku umawmase kalri pathavungu kai ki cekele, kikai miyaiya kai ala lri ngimia. Lukamaninga kwidra lri malraku kai ki cekele si baai iniane.”

Dramu si swa Amune

²⁸ “Lri tara kawlrau ka umawmase, lri yugingisu; lri pelaelasu ku taiyaneli ku vaga ka abebeelengenga ka Tamatama papia ki twasinalremelreme ki swa Iseraylri ka swa Amune. Lri pelaelasu liniane, ‘Ku lri papacai ki umawmase padulrunga; ku dramu niselredranenga paelelethe, mia ki lrikace ledra, lri papacainga ki umawmase.

²⁹ Kudra drele numi ku maburusi yai kidremedreme numi capange; ku tayugingane numi yai watavuvulrucu. Manganga numi ka lri pacai, ku alikaiyane numi wakelanga. Lri maicubungu numi kudra ki bibiilrilinga ka akipathavungane ka vai. Ku dramu lri makakainga ki lre numi.

³⁰ “ ‘Kwi dramu putawbubana! Lri ikaiyaku ki cekele numi, ka takitulalakane numi saibange numiane.

³¹ Kai lisianeli kwadaladalai, lri papia numiane gugu pakaelre kai lisiane. Lri malraku numiane si baai ki ngiakarakacane ka tarapapacapacai.

³² Lri kilama numi kiutu. Ku erai numi lri mwaludru ikai ki kadaengane ki cekele numi, kadrwanga ku umawmase ku lri ngulringau numiane.’ ” Ku Tamatama amia kikai pelaela.