Izikile 20 - Ngudradreadrekadhane Ka Sisiu 魯凱語聖經

Takidremedremane ki Twaumase, takiecebane ki umawmase

¹ Ku samakapitulu ka caili ku takipaacaicaliane nai, sakalrima ka dramare ki samakamangeale ka vai, yakai ku laciwru ki swa Iseraylri wakela mucucubungu nakwane nene, si papia nakwane kivavaga ku takidremedremane ki Tamatama.

² Sakamani kwidra, ku Tamatama kawariva nakwane; amia kai,

³ “Lri tara kawlrau ka umawmase, pelaela liniane, ku abebeelengenga ka Tamatama amia kai: Wakela numi kivavaga ku takidremedremaneli? Lri papiaku ku takapalralrawthane ki niakeli kiketekete: Kai numi lri maka kivaga. Kwaku ka abebeelengenga ka Tamatama amiaku kikai pelaela.

⁴ “Lri tara kawlrau ka umawmase, padulrungasu ku lrika aputaluvaivadhanesu pelaela ku pasalrivane lini? Pelaelanga! Pangulringava liniane ku tapiane ki cucucungulane lini ku langialisiane.

⁵ Papia liniane pelaela, kwaku ka abebeelengenga ka Tamatama ka amia kai: Sa pilriaku ki swa Iseraylri, nakiaketeketenga naku papia liniane; nayakainga naku Izipiti pelaela liniane, si kiketekete iya kai: Tamatamaku ka Twaumase numi.

⁶ Sakamani kwidra, pwakawnaku papia liniane, lri ililukaku liniane katwase Izipiti, si ililuku liniane mwa kudra pilringali ka mwalwalwaludru ku mireke si valu ka malrange ka kadaengane, ka ngiesaesaadhanenga ka kadaengane ki yakawmasane.

⁷ Wadrekasaku liniane katwase cilri kudra kadalame lini ka matiavalracevace ka lasamiamiange, madha sukusukubu ki kaika patengane ka twaumase ki swa Izipiti si ngikakudrulru, asi lwiyane Tamatamaku ka Twaumase liniane.

⁸ Ai kwi lalasu wabaebalre nakwane, la kai kilalra nakwane. Kwi lalasu kai wacilri kudra ki lamatialrase ka lasamiamiange, la kai cilri ki kaika patengane ka twaumase ki swa Izipiti. Lukamaninga kwidra, apia dawlaku liniane si ikai Izipiti palalava kai lisianeli.

⁹ Ai kainaku paiya kikai. Kainaku madalame lu kitulilisi kai saniange ka naganeli; asi lwiyane nayakainga naku ki taikaiyane lini ki laumawmase cucubungu papia ki swa Iseraylri pelaela, lri ililukaku liniane katwase Izipiti.

¹⁰ “Ala ililukaku liniane katwase Izipiti, si iluku liniane mwa calragulragu.

¹¹ La malraku ku padradrekaseli si patarumara baai liniane, la bulrwaku liniane ku hulriceli, ku paluludu ku umawmase lai lri dulru panianiake makanaelre.

¹² La drekasaku liniane pangimia ku Taisadrasadrane ka vai, ka amani ku sapatuthingalane ku tamakaketeketane nai. Pakipapawlringava liniane, amaniaku ka Tamatama ku pakasaniange liniane ka kawkawlu.

¹³ Ai kwi lalasu yakai calragulragu baebalre nakwane. Kwi lalasu kai paluludu ku hulriceli, kai tarwamara ku drekaseli, adravane paluludu ku umawmase lri dulru panianiake. Kwi lalasu pakiasaalrunga kudrulru ki Taisadrasadrane ka vai. Nakainaku kiasanu gugu ku lisianeli ikai calragulragu, si amudu liniane.

¹⁴ Ai kainaku paiya kikai. Kainaku walreme lu kitulilisi kai saniange ka naganeli, asi lwiyane kai lakuni wadrele sa sangilukaku ki swa Iseraylri katwase Izipiti.

¹⁵ Lakamani, yakaiyaku calragulragu kiketekete, kainaku lri ililuku liniane mwa kudra abaadhaneli liniane ku mwalwalwaludru ku mireke si valu ka kadaengane, kikai yai ngiesaesaadhanenga ka kadaengane ki yakawmasane.

¹⁶ Lu piaku kikai kiketekete; amani sa kai tarumara kai lalasu ki padradrekaseli, la kai paluludu ki hulriceli, wakudrulru ki Taisadrasadrane ka vai. Kwi lalasu madadalame sukubu ki lasamiamiange lini.

¹⁷ “Adravane ka ngimiyaiya kikai, makurwana naku liniane, si kai amudu liniane ikai calragulragu.

¹⁸ Pakiapapawlringavaku ki lalangukathabarane lini iya kai: Madha palululudu ku tukakudhanane ki cucungulane numi; madha tupapapalra ku kakudhane lini; madha sukusukubu ki lasamiamiange si ngikakudrulru.

¹⁹ Tamatamaku ka Twaumase numi. Kunumi pasalaladha ki hulrice si padradrekaseli,

²⁰ Pangimia ki Taisadrasadrane ka vai tusaniange ka vai, la tusapatuthingalane ku tamakaketeketaneta, lri pakipapawlringavaku numiane, Tamatamaku ka Twaumase numi.

²¹ “Ai kwini zidai kwini mialri baebalre nakwane. Kai pangiamia ku hulrice si padradrekaseli, adravane lu paluludu ku umawmase kilakikai lri dulru panianiake. Kwi lalasu mialri kudrulrunga ki Taisadrasadrane ka vai. Nakiasanu papianga naku liniane gugu ku lisianeli ikai calragulragu, si papacai liniane makanaelre,

²² ai kainaku paiya kikai. Kainaku walreme lu kitulilisi kai saniange ka naganeli, asi lwiyane ku lakuni wadrele makanaelre sa ililukaku ki swa Iseraylri katwase Izipiti.

²³ Ngwalai kikai, yakaiyaku calragulragu peelana kiketekete, lri pasaravaku liniane mwa kawmasane palraelre.

²⁴ Ku piali kikai amani sa kai paluludu ku hulrice si padradrekaseli, kudrulrunga ki Taisadrasadrane ka vai, si sukubu ku sukubunga ki cucungulane lini ka lasamiamiange.

²⁵ “Sakabilrilinga, wacungucungaku malra kudra malisi ku kakudhane, kudra kai lri dulru baai ki niake ki umawmase ku padradrekase si baai liniane,

²⁶ kwi lalasu lani arakai ku sapatarumarane lini ngikakudrulru, lani patarumara ku takataakanga ka sawvalai tusapatarumarane. Kikai yai lri pathavungu liniane, kwi lalasu lani thingale ala ka Tamatamaku.

²⁷ “Lakamani, lri tara kawlrau ka umawmase, pelaela ki swa Iseraylri, amiaku kaika abebeelengenga ka Tamatama: Ku cucungulane numi papia nakwane kaika patengatengane ku kidremedreme, peaeelanga tusinalreme nakwane.

²⁸ Waililukaku liniane mwa kudra pukawnungali baai liniane ku kadaengane. Kwi lalasu sadrele ki latadradrau ka lregelrege si masalese ka laangatu, yakaai kwini patarumara. Ku sapatarumarane lini ku sangwalreme ka waudriwdripi si saparalikilikane ku bava wagiriimucu nakwane.

²⁹ La kaelaelaku si kivaga liniane: Kwi mwa numi ki lataabelengane yai manemane? Twalainga kai, ki lakikwini kiapasi ‘Taabelengane’.

³⁰ Lakamani, padarura pelaela ki swa Iseraylri, amiaku kaika abebeelengenga ka Tamatama: Anu ngithanga nai pasaalriwlringa iya ku pasalriwnga ki cucungulane numi si sukubu ku sukubunga lini ku lasamiamiange?

³¹ Adravane kaikameeane, thadalraneana numi patarumaramara ku patarumaranga lini ku sapatarumarane ku waudriwdripi, la malra numi ki lalake numi ka sawvalai tusapatarumarane ka waudriwdripi si lama baai ki sukusukubu lini ka lasamiamiange si ngikakudrulru. Kunumi ka la swa Iseraylri la thurwana numi kivaga ku takidremedremaneli! Kwaku ka abebeelengenga ka Tamatama lri papiaku ku takapalralrawthane ki niakeli kiketekete numiane: Kai numi lri maka kivaga!

³² Malritheethenga numi ku atupapalrane ki lakuni, mia ki laumawmase ki maelane ka kuni sukubu ki angatu si lrenege. Ki kwini kai lri dulru ngimia lutumane!”

Sapathavungane si sapacepane ki Twaumase

³³ “Kwaku ka abebeelengenga ka Tamatama lri papiaku ki takapalralrawthane ki niakeli si papia numiane kiketekete: Lri pakipapawlringavaku numiane, lri arakaiyaku kai sapukwane ka alrima, sapathavungane ka puku, si sagugwane ki lisiane rathudu numiane.

³⁴ Lu sarubwaku numiane, si patwalai ki tamwane acaicali ki lakuni ililuku kainganai siwlri, lri pakilrialringavaku numiane kai maadrau ka puku ki alrimali, sapathavungane ka puku, si sagugwane ki lisiane.

³⁵ Lri malraku numiane si iluku mwa ‘Calragulragu ki sanaka zuku’ La ikai kwini pathavungu numiane.

³⁶ Kunadruma ku tapangimianeli pathavungu ki cucungulane numi ikai calragulragu Sinai, kaiasasane lri pangimiaku pathavungu numiane.” Ku abebeelengenga ka Tamatama amia kikai pelaela.

³⁷ “Lri pakilriingavaku marasikai ruthuku numiane, lanu paluludu ku sakiketeketaneli.

³⁸ Lri patwaladhaku numiane mwalra ku wabaebalre si pasalriu nakwane ka umawmase. Lri paizivaku liniane, kwi lalasu lai lri katwase kikai taikaiyane lini iziu; ai kainaku lri pasiwlri liniane mwa ki kadaengane ki swa Iseraylri lutumane. Luka ngimiyaiya kikai, lri thingale numi nakwane ala ka Tamatamaku.”

³⁹ Ku abebeelengenga ka Tamatama amia kai, “Swa Iseraylri makanaelre, ngisasingikaiya! Pacungucunguula sukusukubu ki lasamiamiange numi! Ai lri pakipapawlringavaku numiane, twalainga kai, lri tara pasalaladha numi nakwane, madha patarumaranga ki lasamiamiange si tusinalrelreme ki saniange ka naganeli.

⁴⁰ Kunumi ka swa Iseraylri makanaelre lri ikai numi kwini ki kadaengane, ikai ki saniange ka lregelregeli, ka amani kudra abelenge ka lregelrege ki swa Iseraylri, sukubu nakwane. Lri kadalamaku numiane, si mukalavalava numiane iluku ku sapatarumarane ku lamanemane, ku mathaithaariringa ku sapatarumarane, si sanianiangenga ka saceacebe kainganai patarumara baai nakwane.

⁴¹ Lu sarubwaku elrelre numiane, si ililuku numiane katwase ki taacaicaliane numi, lri tarumaraku ku sangwalreme ka sapatarumarane numi; ku lakuni lai lri mialri thingale ala ka saniangaku.

⁴² Lu ililukaku numiane siwlri mwa Iseraylri, mwa kudra pukawnungali baai ki cucungulane numi ku kadaengane, lri thingale numi ala ka Tamatamaku.

⁴³ Lukamaninga kwidra, lri ngulrialringau numi ku tapiane numi patueelre kudra matialrumale, si thingale ku tapangimiane numi ngikakudrulru. Lri ngwalai numi ku tapiane numi kudra langialisiane si ngikakavalracevace.

⁴⁴ Lu kirimunga naku ngipapalribulu ku lriguli, kunumi ka laswa Iseraylri lri thingale numi ala ka Tamatamaku, asi lwiyane kainaku singiakai ku naika akipangimiane ku ngangane si ngilisianane ki kakwakudhane numi si pathavungu numiane.” Ku abebeelengenga ka Tamatama amia kikai pelaela.

Maadrau ka apwi tali lrawdru

⁴⁵ Ku Tamatama kawariva nakwane; amia kai,

⁴⁶ “Lri tara kawlrau ka umawmase, papia tali lrawdru drele! Cubunga tali lrawdru, si papia angatungatu yugingi.

⁴⁷ Pelaela ki angatungatu tali lrawdru, kicacaligira kilalra ku taiyane ki abebeelengenga ka Tamatama. Drela! Lri tara lamaku pakudaraisi! Ku apwi lri lama utu ki angatu ki yakai ki angatungatu, adravane ka masalese ka rudawdame, lri kulama patuelre. Ku kelrabe ki apwi kaika amaka dulrwane edrepe, lri twalai tali lrawdru kudaraisi papia tali dradha, sanaka umawmase lri tadralrangedrange makanaelre ki apwi.

⁴⁸ Kwi lalasu lri thiingale makanaelre ala ka amaniaku ka Tamatama ka walama, kadrwa ku umawmase ku lri dulru edrepe.”

⁴⁹ Ai kainaku palraingi, “Abebeelengenga ka Tamatama, madha papiapia nakwane kikai; kai lapalrapalra malisilisiinga nakwane kiara iyali ku anazu.”