Izikile 2 - Ngudradreadrekadhane Ka Sisiu 魯凱語聖經

Ku Twaumase wapilri dawlu ki Izikile paayuginsia

¹ Sa drelaku kikai tangimiane waguruthunganaku icakena. La pacungulu, kialalraku ku vaeva ku lingau; kwini lingau amia kai nakwane, “Lri tara kawlrau ka umawmase, acegecega! Lri kawrivaku muswane.”

² Kikai lingau sa kawrivariva nakwane, ku Ri ki Twaumase mwadringi nakwane, la arake si drakale nakwane. Kialalraku kikai lingau pacungulu iya kai nakwane,

³ “Lri tara kawlrau ka umawmase, lri sikawlaku muswane mwa ki swa Iseraylri. Kwi lalasu mararaamau ki cucungulane baebalre nakwane, la cilri nakwane, pakeela kaiasasane wabaebaalreana nakwane.

⁴ Kwi lalasu makelrathe kakeecenge, kai twakucingalre nakwane, lakamani lri sikawlaku muswane katwase, malra kai vagali ka abebeelengenga ka Tamatama si pelaela liniane.

⁵ Madha thengete kwini ki wabaebalre nakwane kwini ki laumawmase ku kialalra ku kai kialalra, kwi lalasu nai thingale ka nayakainga ku tangea ku yuginsia ku yakai liniane.

⁶ “Ai, lri tara kawlrau ka umawmase, madha kakiwcu liniane, la madha ngwalalai ku takawrivane lini ku vaga si kakiwcu. Kwi lalasu lri kiecebe muswane, lri sidrekase muswane; lai lri miasu ki yakaai kabicelrakane ki apapase. Ai kusu madha ngwalalai kwini ki lawabaebalre ka laumawmase si ngituluku kakiwcu, la madha ngwalalai ku takawrivane lini ku vaga si kakiwcu.

⁷ Madha thengete liniane ku kialalra ku kai kialalra, malra kai vagali patuelre si pelaela liniane. Thingala liniane ka amani kudra wabaebaebalre ka laumawmase.

⁸ “Lri tara kawlrau ka umawmase, kicacaligira kilalra kai pelaelali muswane kai vaga; madha ngialralrau liniane baebalre. Kusu manunganga, la kane kai lrika abaadhaneli muswane kai lamanemane.”

⁹ Ala drelaku ku vaeva ku alrima ku papia nakwane sege, ku alrima la ecenge ku vaeva ka nibalrulane ka hungu.

¹⁰ Kwi lasu la paipai kwini nibalrubalrulane ka hungu; wadrelaku kwini nibalrubalrulane ka hungu tara yakaai ku pacase taibelengane si tailebeane, kwini belenge ku pacase yai sialringau, wadaange, si watubi ku kidremedreme ka vaga.