Izikile 19 - Ngudradreadrekadhane Ka Sisiu 魯凱語聖經

Sasilringavane

¹ Ku Twaumase pasenai silringau nakwane pasikai ki tadrusa ka talialalai ki swa Iseraylri:

² Ku tinasu yai ababai ka raiyungu, ka wanene ikai kabicelrakane ki lasawvalai ka raiyungu; yakai ki magarange ki lalavavalake ka raiyungu lapu tuadrau ki lrulai ka raiyungu.

³ La lapunga tuadrau ki vaeva ka lrulai ka raiyungu si alavavalakenga; ku vavalake ka raiyungu la thingalenga alupu malra ku akaneane, ka amaninga kudra wakane ki umawmase ka magarange ka waudriwdripi.

⁴ Ku lakuni sakilalranga, la lrigili iniane pwa ki valrulrange; kwi lalasu arakai ku sakakaili saralidri iniane pwa Izipiti.

⁵ Ku tina ka raiyungu la ukalavalava kacare si kasulringa; kwi raiyungu la laapunga ku vaeva ku lrulai ka raiyungu si avavalakenga ka raiyungu.

⁶ Ku yacengecenge ka raiyungu la tupapalranga ki drumane ka raiyungu mwa kidruanga masasawlriwlriwlri; la mialri thingalenga alupu malra ku akaneane, ka amaninga ku tara kanekane ki umawmase ka magarange ka waudriwdripi.

⁷ Kwini raiyungu waburuku ki raedre ka kepale ki cekele, la kabebetethe ki cekele; sana giringi, sanaka umawmase ngiatuluku si kakiwcu.

⁸ Ku lakuni twalai kidruanga kainganai lringulu iniane; kwi lalasu wapaipai ku lravathe, la lrigili iniane pwa ki valrulrange.

⁹ Kwi lalasu wamalra iniane si ruvu pwadringi ki rumuku, la iluku mwa ki talialalai ki swa Babilunia; kwi lalasu wamalra iniane pudaane ki taememengane, ku lalregelrege ki swa Iseraylri kai lri maka kilalranga ku giringini.

¹⁰ Ku tinasu mia ki vaeva ka nilredrekane pikai ki babiabila ki vaalru ka acilai ka cebe ki budu, ngwalai ku adravane ku acilai, la ngiesadhane ku tacebeane ku vasau ricingi, si ngikararasai ku madru.

¹¹ Ku ricingini makecenge, wadulru madu tuukudru ki talialalai; ku ricingini papwabebelenge kadrau, la ngicaeme kadrau; ku ricingini mwabelenge daruru ki ememe, wadrele sanaka umawmase.

¹² Ai, yakai ku lisiane ka alrima ku wamalra akucu iniane patala baalace; la kicilri picakena, si kipakarudame ki twalai tali talrawane ki valrigi, ku ricingi macelra, ku madru marudame, si kilama ki apwi.

¹³ Kikainga kiapatalula kilredreke pwa ki calragulragu, kialredreke pikai ki meameale ka kadrwa ku acilai ka kadaengane.

¹⁴ Ku cebe ka angatu kwadalai, si lama utu ki ricingi si madru; kai lri ikainga ku makecenge ku ricingi, si dulru madu tuukudru ki talialalai. Kikai yai vaeva ka sasilringavane ka senai; kikai sasilringavane ka senai nipawcucungulane.