Izikile 18 - Ngudradreadrekadhane Ka Sisiu 魯凱語聖經

¹ Ku Tamatama kawariva nakwane;

² amia kai, “Kikai nimapelaelaelane ikai ki swa Iseraylri kai vaga yai manemane ku pacugane? Kwi lalasu amia kai: Ku tama wakane ku maalriu ku budu, la kalriwlringa ku valisi ki lalake.”

³ Ku abebeelengenga ka Tamatama amia kai, “Lri papiaku ku takapalralrawthane ki niakeli kiketekete: Ikai ki swa Iseraylri lri kai kimapelaelanga kikai vaga.

⁴ Ku niake ki sanaka umawmase nakwane patuelre; adravane ka marudrawdrange ka lavavalake ku niake nakwane patuelre. Ku aneane ku pasalriu, lrika aneane ku wapacai.

⁵ “Alaiyasi ka yakai ku tangea ku twakapatengatengaane, aparamaramau ka mathariri ka umawmase,

⁶ kwi lasu kai wasukubu ki samiamiange ki swa Iseraylri, kai yakaikai lregelrege ki biu kane ku sangu sukubane ku beate, kai walrilrigili si ililuku ku taelrelre ki palrapalra, kai tadrusadrusa ki sia erai ki ababai,

⁷ kai watavuvuvulrucu, kai waribiribici ravase. Kwi lasu ku sadrepetane ku lawbubulu wasawlri baai ki akiame ka umawmase, wamalra ku lamanemane si baai pakane ki masilrasilrau ka umawmase, wamalra ku laimai si baai pasi laimai ki vialralralrakane.

⁸ Kwi lasu lu pakisaalru ki umawmase ku paisu kai wamalramalra ku lalake, kai paiyaiya ku ngialisiane, aparamaraamau lu marasikai ku rivwane.

⁹ Kikai miyaiya kai ku umawmase pasalaladha ku padradrekaseli, si dradrele paluludu ku hulriceli. Kikai lasu amani ku mathariri ka umawmase; kai lasu lri tara panianiake.” Ku abebeelengenga ka Tamatama amia kai pelaela.

^10-11 “Kikai umawmase kai, anaka yakai ku tangeea ku lalake ka sawvalai, kwi lasu la ribici ravase, papacai ki umawmase, si pia ku kaika piana ki tamaini ku ngialisiane. Kai lasu la ikai lregelrege ki biu kane ku sapatarumarane ku beate, lrilrigili ililuku ku taelrelre ki palrapalra.

¹² Kai lasu la tavuvulrucu ki matiakukuru ki umawmase, ribici ravase, si malra pikai ku sadrepetane ku lawbubulu ki akiame. Kai lasu la mwa ki biu ki maelane ku takisususwane si sukubu ki matiavalracevace ka samiamiange,

¹³ la ngwalai ku apatulalakane si pakisaalru ku paisu ki umawmase. Kikai miyaiya kai ku umawmase lri dulru panianiake? Ini! Kai lasu kai lri dulru! Kai lasu paiya kikai ngialisiane patueelre, kai lasu lri tara paacai; ka ngiamamalra ku apacadhaneini.

¹⁴ “Kikai umawmase kai, anaka yakai ku tangeea ku lalake ka sawvalai, kai lasu la drele ku pasalrivane ki tamaini patueelre, ai kai twapapalra ku takangangane ki tamaini.

¹⁵ Kai lasu kai wasukubu ki samiamiange ki swa Iseraylri, kai yakai lregelrege ki biu kane ku sapatarumarane ku beate. Kai lasu kai walrilrigili si ililuku ku taelrelre ki palrapalra,

¹⁶ kai wadredrepete ki umawmase, kai waribici ravase. Kai lasu ku sadrepetane ku lawbubulu ki akiame wasawlri baai, wamalra ku lamanemane si baai pakane ki masilrau ki umawmase, la malra ku laimai si pasilaimai ki vialralrakane ki umawmase.

¹⁷ Kwi lasu kai paiyaiya ku ngialisiane, lu pakisaalru ki umawmase ku paisu kai patwalalalake. Kai lasu paluludu ku hulriceli, la pasalaladha ku padradrekaseli. Kai lasu kai lri ngwalai ku tapasalrivane ki tamaini si pacai. Kai lasu lri tara panianiake.

¹⁸ Ai ku tamaini, watavuvulrucu, waribici ravase, ngiakarakacane, lri ngwalai ku tapasalrivaneini si pacai.

¹⁹ “Ai kiavaga numi: Ku lalake ani kai ngwalai ku tapasalrivane ki tama si kipakwalri? Ku satubalreaneli yai: Ku lalake makalecege ku tapiane; kai lasu paluludu ku hulriceli, la pangimia ku taiyane ki hulrice, lakamani kai lasu lri tara panianiake.

²⁰ Kathaane ku pasalriu ku umawmase ku lri pacai. Ku lalake kai lri ngwalai ku tapasalrivane ki tama si kipakwalri; ku tama kai lri ngwalai ku tapasalrivane ki lalake si kipakwalri. Ku mathariri ku umawmase lri ngwalai ku tapiane ku mathariri si kipakalreva; ku manganga ku umawmase lri ngwalai ku tapiane ku ngialisiane si kipathavungu.

²¹ “Ku manganga ku umawmase alaiyasi ngitatupela, la cilri ku ngukaikaini ku ngialisiane ku kadalranane si paluludu ki hulriceli, la pia ku pinacengecengane mamamwa ki kakudhane, kwi lasu lri kai pacai, lri tara panianiake.

²² Ku pasalriwini lri kipacepe patuelre; asi lwiyane kwi lasu paiya ku naika apiane, kwi lasu lri tara panianiake.

²³ Madalame drele amia numi nakwane ka abebeelengenga ka Tamatama lu pacai ku manganga ku umawmase? Ini! Nai drelaku kamani iniane lu ngwalai ku tangitatupelaneini si panianiake.

²⁴ “Ku mathariri ku umawmase alaiyasi kai pianga ku mathariri, la pia ku piapia ki manganga ku matiavalracevace ka malisi, kwi lasu lri dulrwana panianiake? Ini! Ku napiaini saka siaswalane ku mathariri kai lri kingulringau. Kwi lasu lri ngwalai ku tacilrianeini ku salrwane, si pasalriu la pacai.

²⁵ “Ai amia numi kai, ‘Ku Tamatama lu pia kikai kai pacengecenge!’ Swa Iseraylri, kicacaligira kilalalra kai alalrwadhaneli! Paamama amia numi kai tapianeli? Ku patengatengane, kwi pia numi ala amani ku pasalriu!

²⁶ Ku mathariri ku umawmase lu kai pianga ku mathariri, la piyalringa ku malisi, kwi lasu lu pacai yai ngwalai ku tapianeini ku ngialisiane ala kamani ku pacai.

²⁷ Ku manganga ku umawmase lu ngitatupela, si pathagili pia ku pacengecenge mamamwa ki kakudhane, palribulunga ki niakeini.

²⁸ Kwi lasu ngiakakidremedreme, ngiatatupela, lakamani kai lri pacai, lri panianiakelringa.

²⁹ Swa Iseraylri, amia numi kai, ‘Ku Tamatama lu pia kikai kai pacengecenge!’ Kai pacengecenge amia numi kai tapianeli? Ku patengatengane, kwi pia numi ala amani ku pasalriu!

³⁰ “Lakamani, swa Iseraylri, kwaku ka abebeelengenga ka Tamatama amiaku kai pelaela numiane: Lri singikaiyaku ku kakwakudhane numi ka tangeea saibange numiane. Kunumi ngitatupela, katwasa ki ngialisiane ka kadalranane, amani lu amudu numiane kwi pasalrivane numi.

³¹ Cilria kudra piapia numi ku ngialisiane patueelre, la balrithi ku bavane ku kidremedreme, bavane ku ri! Swa Iseraylri, asingithaanga pacai?

³² Kai nau madalame lu pacai ku naaneanenga ku umawmase. Sana ngitatupela numi lri panianiake numi.” Ku abebeelengenga ka Tamatama amia kikai pelaela.