Izikile 17 - Ngudradreadrekadhane Ka Sisiu 魯凱語聖經

Takanga si cebe ka budu ka pathalrilriku

¹ Ku Tamatama kawariva nakwane;

² amia kai, “Lri tara kawlrau ka umawmase, papia ki swa Iseraylri iya ku vaeva ku pathalrilriku,

³ kwi lalasu anithingale ku apapianeli kawriva liniane ka abebeelengenga ka Tamatama. Yakai ku vaeva ka maadrau ka takanga ku sapakepake maadrau, ku lrumu paridi swaeteeane si kathariri. Wapaipai ku sapakepake, la ngipalai mwa ka belenge lregelrege Lebanungu, la celra si kace ku karingavane ka lredelrede ki cedare ka angatu,

⁴ la iluku mwa kabicelrakane ki tasiwbawbadhane, ka ngiaesaesadhane ku tasiwbawbadhane ka cekele.

⁵ Ala, kwini takanga la malra ku lredredreke ki swa Iseraylri ku vaeva ka salredredreke ka angatu patalula lredreke pwa ki malrange ka kadaengane, ikai kwini maadrau ku acilai ka lri dulru pakadrau iniane.

⁶ Kikai angatu la rigarigi si kaadradrau, la avaeva ka aleebe, ka twavaasau ka cebe ka budu. Ku ricingini watilulai papia ki takanga, ku balace la papwadriadringi cebe, ka amaninga kudra wasarau tilulai ka cebe ka budu.

⁷ “La ikaiyana ku vaeva ku maadrau ka takanga, la mialri ikai ku maecebe ku maadrau ku sapakepake, ku lrumu paridi swaeteeane. Kikai cebe ka budu ku balace si ricingi la tilulai papia kai ki takanga, kisanu patwalalai iniane ku madradrau ki mauivaivai ku acilai.

⁸ Ku patengatengane, kikai cebe ka budu nilredrekaneenga pikai ki malrange kadrau ku acilai ka mauivaivai, lri dulru kaadrau puricingi, si pumadru, ka amani kudra mathaithariri ku tacebeane ka budu.

⁹ “Ku abebeelengenga ka Tamatama ala kivaga: Kikai cebe ka budu lri dulru kaadrau ngiesadhane? Kikai aswalala ka takanga bekace kai maka malra iniane patala baalace akucu, la pilutu patueelre ku madru, si celra ku ricingi, la pakarudame iniane? Adravane kaidu arakai ku magarange ku kuni lri dulru pakaduai akucu patala baalace iniane.

¹⁰ Unu, kwini budu kialredreke, ai lri dulru kaadrau ngiesadhane? Lri maka kiecebe ki twalai tali talrawane ka valrigi? Si kai ikai ki mauivaivai karudame?”

Walalrwai ki pathalrilriku

¹¹ Ku Tamatama amia kai nakwane,

¹² “Kusu kivaga kudra ki wabaebaebalre ka laumawmase, la dredrele liniane lu pulringalringau ku pacugane ki pathalrilriku lu tumane. La pelaela liniane, ku talialalai ki swa Babilunia wamwa Yerusalrime si ravase ki talialalai lini si lasasiakawluini pwa ka Babilunia,

¹³ la patwalai ki wacekecekele ki talialalai pilri ku tangeea ku umawmase, si makaketekete iniane, ku lrika akiketeketaneini ka patengatengane pasikai. Ku talialalai ki swa Babilunia la ravasenga kudra ki latabebelenge tusaruthukane,

¹⁴ watelenge ku kaika angiradhekanane kai ki kuni, si kapatengatengaane paluludu kikai samakaketeketane.

¹⁵ Ai ku talialalai ki swa Yuda wabalre. Kwi lasu pakatwase ku kiasikawlu mwa ka Izipiti si kitubi ku akiparalubane pakela ku sakikaruburane ku rigi si takaalra ku kwapingi. Kwi lasu lri maka dulru pangimia? Kwi lasu lri maka dulru kidaili? Kwi lasu lri maka dulru kabebetethe kwini samakaketeketane si kai lri kipathaavungu?”

¹⁶ Ku abebeelengenga ka Tamatama amia kai, “Lri papiaku ki taka palralrawthane ki niakeli kiketekete: Kikai talialalai lri tara paacai ikai Babilunia. Asi lwiyane ku talialalai ki swa Babilunia wacegecege iniane tutalialalai, ai kai lasu wabaebalre ki samakaketeketane, wacilri ku tamakaketeketaneini ki talialalai ki swa Babilunia.

¹⁷ Ku talialalai ki swa Babilunia sa kela kikaruburu ki cekele, si alradre tubalingibingi, la lruku tuvalrwalru, si papacapacai, adravane pakela ku talialalai ki swa Izipiti ku tagagagarange ku kwapingi lri kai dulru palribulu iniane.

¹⁸ Kwi lasu wabaebalre ki samakaketeketane. Paiya kikai patueelre, kaiasasane kai lri maka muberenga.”

¹⁹ Lakamani, ku abebeelengenga ka Tamatama amia kai, “Lri papiaku ki takapalralrawthane ki niakeli kiketekete: Lri pathavungaku iniane; asi lwiyane kwi lasu wabaebalrenga kudra papia ki naganeli si kiketekete, mabebetethenga kudra papia ki naganeli si makaketekete.

²⁰ Lri paipadhaku ku lravatheli si pwalra iniane, la iluku iniane pwa ka Babilunia si pathavungu iniane, asi lwiyane kwi lasu kaika patengatengane ku kidremedremeini papia nakwane.

²¹ Ku tagagagaarangenga ku kwapingini lri kikaruburu si pacai makanaelre; ku amalebe ku lakwapingi lri sarau mawbebere. Lukamaninga kwidra lri thingale numi ala ka Tamatamaku; amiaku kai pelaela.”

Pukawnu ki Twaumase lukabibilrili

²² Ku abebeelengenga ka Tamatama amia kai, “Lri celraku ku karingavane ki cedare ka angatu, la celra ku rigarigi ka ricingini; lri malraku iniane si lredreke pwa ka belenge ki abeelenge ka lregelrege,

²³ Ikai ki abebeelengenga ka lregelrege ki swa Iseraylri. Lri kaadrau, ngicaeme, pumadru, ka amaninga kudra matiasalru ka cedare ka angatu. Sanaka adhadhame lri ngipalai kela si tulisisuku, lai ikai ki lrilriane kidringai ku tasuladhane.

²⁴ Ikai dratane ka ubulane patueelre ku laangatu lri thiingale: Kwaku ka Tamatama ka pwalebe ki maadrau ka angatu, la pakadrau ki tikiane ka angatu; pakarudamaku ki masalese ka angatu, la pangiesadhanaku ki rudawdame ka angatu. Tamatamaku ka amia kikai pelaela. Lu kawrivanga naku, lri tara ngimia.”