Izikile 16 - Ngudradreadrekadhane Ka Sisiu 魯凱語聖經

Kaika patengane ku kidremedreme ka swa Yerusalrime

¹ Ku Tamatama la kawriivanga nakwane;

² amia kai, “Lri tara kawlrau ka umawmase, kusu papia ku tapiane ki swa Yerusalrime ka matiagirimucu turamuru.

³ Pelaela iniane, ku abebeelengenga ka Tamatama amia kai iniane: “Kai Kanange yai cekelesu; yakaisu kwini kitulalake. Ku tamasu yai swa Amuri, ku tinasu yai swa Hite.

⁴ Sa kitulalakesu kadrwa ku umawmase ku wakaciane ku pekesu, ku pabanau, ku arakai ku timu sakidri ki kinawmasane, si arakai ku makalrilau lripucu.

⁵ Ku lrulai lu kitulalake yai nai kikakalithi sirapale, ai kadrwa ku takipangimianesu. Sa kitulalakesu, kadrwa ku umawmase ku mathalrai muswane; kiacilrisu pikai umawma.

⁶ “Sakabilrilanenga, la twaladhaku kwini lribate, si drele muswane ikai ki erai tulratulratulra; erainga kwi kinawmasanesu, ai kainaku walreme papacai muswane.

⁷ Twadravaku muswane, mia ki marasiakaikaai katheme ki yakai ki umawma ka bengelrai si ubulu. Arwakadradrawsu, si ngicaeme kaadrau, madrawngasu ngitawvaileleketenga, la tuthuthunga, kalraginga kwi isiu, ai vilralralrakaneanasu.

⁸ “Sa lribataku kwini, mwakeesangasu, si thingalenga kiwpapalange. Arakaiyaku ku sapakabelebelengane ku laimai paidringi ki kinawmasanesu, si maupapalange makaketeketenga muswane. Kwaku ka abebeelengenga ka Tamatama wamwaku muswane karudrange, la ataelrelrengasu nakwane.

⁹ “Sakabilrilinga, arakaiyaku ku acilai pabanau mwalra kwi erai ki kinawmasanesu, la arakai ku lawlau ka ulrive padelreme ki kinawmasanesu.

¹⁰ Pasialaimadhaku muswane ku pinacasane ka laimai, mathaithaariringa ka lrangici ka kece, la badhaku muswane ku niarakaiyane ku lalasare ka kaimadhane tusaererecane ki isiu si sapakabelebelengane ka laimai.

¹¹ Pangiaragelanaku muswane, la baai muswane ku lasilu, lakalathe, lasakirerethane,

¹² lalridingi ki ngungwane, lalridingi, la pasigecegece muswane.

¹³ Ngiaragelanesu ku kingi gingi, la silaimai ku nipacasane ka lalasare ka kaimadhane si sapakabelebelengane ka laimai. Wakanekanesu ku mathaithaariringa ku milrikinku ka pange, valu, si lawlau ka ulrive. Matharirisu turamuru; atalialalaingasu ka ababai.

¹⁴ Asi lwiyane amaniaku ka abebeelengenga ka Tamatama ka pakathariri silribate muswane, ku thariranesu kiamapelaela salraelre sanaka kuni.

¹⁵ “La arakaailringasu kwini ki thariranesu si takimatikaikaiyanesu si ngilralraaingi kanganga ku takaababadhanesu, kadrwa ku pasiwlriwlrisu sanaka wakeela.

¹⁶ Arakaisu ku laimaisu pangiraeragelane ki tasukusukubane ki twaumase, mia ki pairairange ki tasamiamiangane ikai kwini mapapasalrisalriu ki sanaka umawmase.

¹⁷ Wamalrasu kudra baaili muswane ku lakingi gingi silu si tuumawmase ka sawvalai, ala mapapasalriu liniane.

¹⁸ Arakaisu ku baaili muswane kudra lanipacasane ku laimai si pasipalimemelre kilakikai ki samiamiange, la malrasu kudra baaili muswane ku lawlau ka ulrive si sangulrelreme patarumara baai liniane.

¹⁹ Kwaku ka abebeelengenga ka Tamatama ku baaili muswane ku taleke, mathaithaariringa ka milrikinku, abera ka ulrive, valu, wailukusu tusapatarumarane si patarumara baai ki lasamiamiange, ku lrika akikadalamanesu liniane.

²⁰ “Pacungulu, la malrasu ki lalalaketa tusapatarumarane si baai ki lasamiamiange. Kaisu ka padraalra nakwane sikakathane,

²¹ la maalranasu ki lalalakeli tusapatarumarane si baai ki lasamiamiange.

²² Sa apairairairangesu, piapia kwini ngialisiane ka awngane, kadrwa ku tangulringavanesu ku natangimiane saka vavalakesu ka vilralralrakane, ikai ki erai tulratulratulra.”

Mia ki pairairange kai Yerusalrime

²³ Ku abebeelengenga ka Tamatama amiyanga kai, “Lri matisalregesegesu! Lri matikurungasu! Paiyasu kikai ngialisiane patueelre,

²⁴ la ikaisu ki lakadalranane ki cekele tudaane ku tasukusukubane ki lasamiamiange, si ikai kwini ngikakilangalangai pasalriu.

²⁵ Ku natharirane ku takimatikaikaiyanesu maulrawnga, siataelreelrengasu sanaka umawmase, ku wakela kadrwa ku nipasiwlriwlriane, la aru pakilringalriingau.

²⁶ Tadrusasu apece ki ngialralraaingi ku ngangane ka pasiagisisu ka Izipiti; kaisu watelrai arakai kwi nganganesu ki sawvalai pakagirimucu nakwane.

²⁷ “Lakamani, lri pwalrimaku pathavungu muswane, si malra ribici kwi patarumarali baai muswane kwi thalradhane. Lri baadhaku muswane ki malisilisi muswane ka swa Pelisitine; kwi lalasu mavalracevace kwi ngangane ki kakwakudhanesu.

²⁸ “Ai, kaisu ngwalwadhaneana, la mupaadrukunga mwa ki Asiria, si amwasaka drusa ka taelrelre; ai kwi lasu kai maka pangwalwadhane ki nganganesu.

²⁹ Ala katwasesu silape si mupadruku kudra ki tara siwbawbai ka kuni ka Babilunia; la kaisu maka ngulwadhaneana.”

³⁰ Ku abebeelengenga ka Tamatama amia kai, “Paiyasu kikai patueelre ka mia ki kadrwa ku inwane ka pairairange.

³¹ Yakaisu ki lakadalranane ki cekele pia ku tasukusukubane ki samiamiange, la ikai kwini pasalrisalriu ki sawvalai.

³² Ai kaisu maiya ki pairairange ka ngwalalai ki paisu ngikakilangalangai ku kinawmasane sikakathane; mapasaisalriwsu ki sawvalai ka ababai, ka madadalamesu mupadruku ki maelane ka umawmase, la kalrase ki taelrelre.

³³ Ku pairairange papia ki umawmase malra ku balrithane, la baailringasu ku saceacebe ki siasilangane kamani; wavavangalresu si mwa kielre liniane, la bilibili liniane twalai kidruanga kela si tadrusa muswane pasalriu.

³⁴ Makakaelasu ki lapairairange, kadrwa ku umawmase ku wavutha muswane apairairange. Kaisu wamalramalra ku paisu, ara paisulringasu dawlu ki siasilangane ka sawvalai. Tengatengaanesu ka mwakalrivili!”

Ku Twaumase wasaibange ki Yerusalrime

³⁵ Lakamani, Yerusalrime ka tarakanganganga ki sawvalai ka ababai, kilalra ku takawrivane ki Tamatama.

³⁶ Ku abebeelengenga ka Tamatama amia kai, “Miasu ki pairairange, ka mwalaimai patueelre, si ngibabaai kudra ki lalasiasilangane si lasamiamiange. Papacaisu ki lalalakesu, la tusapatarumarane patarumara baai ki samiamiange.

³⁷ Ngwalai kikai, lri sarubwaku kudra ki nalasiasilanganesu, adravane ka kadalamesu ka kalrasesu lri dawlaku sarubu makanaelre. Lri pakainganadhaku liniane twalai kidruanga, lai lri ngithalringulu muswane, la icucubungu liniane mulaimai muswane, kwi lalasu lai lri drele ku tavilralrakanesu.

³⁸ Lri pathavungaku ku pasalrivanesu kangangasu ki sawvalai si tapapacadhanesu ki umawmase, lri ikai ki girimucane papacai muswane.

³⁹ Lri malraku muswane si baai pikai ki alrima lini; kwi lalasu lri buruku kabebetethe ku tasukusukubanesu ki samiamiange si takanganganganesu ki sawvalai, lai lri ribici ku laimai si sangirageragelananesu, lai lrika vilralralrakanesu ka kadrwa ku kiparaisi.

⁴⁰ “Kwi lalasu lri putata ki laumawmase malra ku lrenege si lrumai muswane, lri arakai ku dramu pawtatiki muswane.

⁴¹ Kwi lalasu lri lama ki daanesu, ku la tathathatha ku lalabaibai lri drele lu kipathavuthavungusu. Kainaku lri paapairairangenga muswane, si baailringa kamani ki siasilangane.

⁴² Luka ngimiyaiya kikai, ku lisianeli ala lri kawlrau, si kathariri ku kidremedreme, kai kalisinga, kai pathalranga.

⁴³ Amani sa karimurungasu saka vavalakesu ku tapangimianeli muswane, la pialringasu kilakikai patuelre pakagirimucu nakwane, lakamani ku piali kikai bilri muswane. Paiyangasu ku makaalra turamuru ku ngialisiane, asu drimana kanganga ki sawvalai?” Ku abebeelengenga ka Tamatama amia kai pelaela.

Luka ngitwatumane ku tina ngitwatumane ku lalake ka ababai

⁴⁴ Ku Tamatama amia kai, “Yerusalrime, ku palrapalra lri arakai kikai vaga papia muswane iya kai, ‘Luka ngitwatumane ku tina ngitwatumane ku lalake ka ababai.’

⁴⁵ Tengatenganesu ka lalake ki tinasu, mararaamawsu iniane. Malisi ki taelrelre si lalalakeini. La mialrisu ngimia ki betakanesu ka ababai, kalisi ki taelrelre si lalalakeini. Kusu si kudra labetakanesu ka lalabaibai ka cekele tulalake patueelre ki tina ka Hite si tama ka Amuri.

⁴⁶ “Ku taka ka ababai yai Samaria; kwi alisu si ngiathalringulu ka lacekele yakai tali dradha muswane. Ku agi ka ababai yai Sudume; kwi alisu si ngiathalringulu ka lacekele yakai tali lrawdru muswane.

⁴⁷ Twapapalrasu ku tapudrapalane lini, si twalralrau ku ngilisiane ku kakwakudhane lini; ngwalwadhanengasu ku tatwalralravanesu? Ini! Kai tarathainu laka silrialribate ku nganganesu liniane ikai ki manemanenga.

⁴⁸ “Kwaku ka abebeelengenga ka Tamatama papiaku ku takapalralrawthane ki niakeli kiketekete: Ku agi ka ababai ka Sudume si ngiathalringulu ka lacekele kai pasalriu ku tapasalrivanesu si pasalrivane ki ngiathalringulu ka lacekele.

⁴⁹ Kwi alisu si lalakeini ka ababai wakanekane kabucuku, si ngiesaesaesadhane ku tangilribalribatane ku vai, la kirimu ngikalrilrigu, si kai siraparapalenga kudra ki la kwalrialri matikurukuru ka laumawmase.

⁵⁰ Kwi lalisu ngiakalrilrigu, si pia ku kavalracevaceli, lakamani waamudaku liniane. Kikai yai wathingalesu.

⁵¹ “Ku tapasalrivane ki Samaria kai maka apararamau ku tapasalrivanesu. Ku tapianesu ngililisiane ki tapianeini. Lu apararamavane iniane ku takanganganesu, kwi alisu amaniana kudra kadruana ku ngilisianane ku kidremedreme.

⁵² Kikai asasane lri ngukaisu ki pasalrivanesu si kiarubwane. Ku tapasalrivanesu malilisi ki tapasalrivane ki agi ka ababai, kwi alisu kadruana ku kidremedremeini. Nai kadirelesu kainu, asi lwiyane kwi agi ka ababai ngwalai muswane si arukabula.”

Ku swa Sudume si swa Samaria lri ngiradhekane

⁵³ Ku Tamatama amia kai ki swa Yerusalrime, “Lri pasielaku pangiradhekane ki swa Sudume si swa Samaria si ngiathalringulu ka lacekele. Lai lri mialriaku pangiradhekane muswane.

⁵⁴ Lri kainusu; ku takitusinalremeanesu kwi la betakanesu ka labaibai lri aru kamathaithariri muswane.

⁵⁵ Kwi lalisu lri ngipelane ngiradhekane; kusu si ngiathalringulu muswane ka lacekele lai lri mialri ngiradhekane.

^56-57 Lu kaiyana kiputaluvaivai kwi pasalrivanesu, la icengeecengesu ngikalrilrilrigu, kaisu ka wamaalra ki swa Sudume si tusawlralrakai? Kaiasasanenga mararaamawngasu iniane; ku swa Idume, swa Pelisitine, si ngiathalringulu ka malisilisi muswane ka laumawmase lri alra muswane si tusawlralrakai.

⁵⁸ Lri tara ngwalai ki nganganesu ki sawvalai si piapiasu ku ngialisiane si kipakwalri turamuru.” Ku Tamatama amia kai pelaela.

Palralrawthu ka samakaketeketane

⁵⁹ Ku abebeelengenga ka Tamatama amia kai, “Lri singikaiyaku ku kakwakudhanesu bilri muswane, asi lwiyane kaisu pangimia ki samakaketeketane.

⁶⁰ Ai lri ngulringavaku sa icengeecengeananasu ku tamakaketeketaneta si karudrange, si tupeela cegecege ku palralrawthu ka samakaketeketane.

⁶¹ Lu tarumarasu ku tasiwlriane kela ki labetakanesu ka labaibai, lri ngulringawsu ku tapianesu patueelre si kainu. Unu kikai kai kiapaelre yadringi ku natamakaketeketaneta, lri malraku ki lalisu si baai muswane, lai alalalake muswane.

⁶² Lri tupelaku kiketekete muswane, lai lri thingalesu ala ka Tamatamaku.

⁶³ Lri paacepaku ku tapasalrivanesu patueelre, ai lri ngulringalringawsu kilakikai, la ngwalai ki inwane si kai thuru avavaga.” Ku abebeelengenga ka Tamatama amia kikai pelaela.