Izikile 14 - Ngudradreadrekadhane Ka Sisiu 魯凱語聖經

Ku Twaumase maelaela ki wasukubu ki samiamiange

¹ Yakai ku tapiya ku ciwru ki swa Iseraylri ku kaiyanganai kivaga nakwane.

² Sakamani kwidra, ku Tamatama kawariva nakwane; kwi lasu amia kai,

³ “Lri tara kawlrau ka umawmase, kikai laumawmase tangucawanane ki samiamiange, si tupapapalra ki samiamiange, la aru kisalrusaalrunga pasalrisalriu. Kwi lalasu lri tubalreana liniane la iyaiyana nakwane?

⁴ “Lri pelaelasu liniane, amiaku kaika abebeelengenga ka Tamatama: Sanaka swa Iseraylri ku ngwacawane ki samiamiange, si tupapalra ki samiamiange, la aru kisalrusaalru pasalriu, lu pianga kwini la kainganai kitubi ki yuginsia, lri ngwaladhaku ku tailukaneini ku makaalra ku samiamiange si ngikakamani bulru iniane!

⁵ Kwini lasamiamiange parwa apadadaili nakwane ki swa Iseraylri, ai anatumane kai sabulrwaneli la dulru pasiwlriwlri liniane si papia nakwane ka patengatengane ku kidremedreme.

⁶ “Lakamani, lri pelaelasu ki swa Iseraylri, amiaku kaika abebeelengenga ka Tamatama: Bwala siwlriwlria! Cilria ki samiamiange numi, cilria kwini ki lamatiavalracevace ka lamanemane!

⁷ “Adravane ka swa Iseraylri ka yakaikai kwini ka maelane ka umawmase, sanaka wacilri nakwane, si ngucawane ki samiamiange, la tupapalra ki samiamiange, si aru kisalrusaalru pasalriu, lu pianga kwini la kainganai kitubi ki yuginsia, lri ngikakamaniaku bulru iniane!

⁸ Lri pathavungaku iniane, la arakai iniane tusapakipapawlringavane si amulralrakadhane ki mapapangale. Lri patwaladhaku ku tayelrelreane ki kawkawluli mwalra iniane. Luka ngimiyaiya kikai, lri thingale numi ala ka Tamatamaku.

⁹ “Alaiyasi la ikai ku yuginsia la kilrilrigili si pamama tubalre ki umawmase, kwini yai amaniaku ka Tamatama ka walrilrigili iniane. Pathavungaku iniane, patwalai ki swa Iseraylri mwalra iniane.

¹⁰ Ku yuginsia si kiatubi iniane ku umawmase lri tara kipathaavungu.

¹¹ Lu piaku kikai yai pakaiyaku ku kaika acilrianenga nakwane ki swa Iseraylri, la kai pelanga pasalriu, si ngitatudrekase. Kwi lalasu lri akawkawlu nakwane; lai lri a Twaumasaku liniane.” Ku abebeelengenga ka Tamatama amia kai pelaela.

Nua, Daniele, si Yubu

¹² Ku Tamatama kawariva nakwane; kwi lasu amia kai,

¹³ “Lri tara kawlrau ka umawmase, lwiyasi ikai ku vaeva ka kuni la pasalriu, papia nakwane la kaika patengane ku kidremedreme, lri talaku ku alrima si ngetele ku tatwaladhane ki taleke lini, lri pulebeaku ku silravane, ku laumawmase si lanilapulapwane lri kiara silravane si pacai patuelre.

¹⁴ Ku Nua, Daniele, si Yubu ka tatulru adravane ka yakaikai kwini, ku ulecegane lini lri dulru ngipapalribulu sikakathane.” Ku abebeelengenga ka Tamatama amia kai pelaela.

¹⁵ “Alaiyasi pasueteaku ki lawaudriwdripi kwini, la papacai ki yakaikai kwini ki laumawmase, la kakiwcu ku laumawmase, si kai lreme ngukakai kwini lribate,

¹⁶ kwaku ka abebeelengenga ka Tamatama papiaku ki takapalralrawthane ki niakeli kiketekete, kwini tatulru adravane ka yakai kwini, kwi lalasu lri mialri kai maka palribulu ki lalalake lini; lri dulru ngipapalribulu sikakathane, ku kadaengane lai lri acinilriane ka ubulane.

¹⁷ “Alaiyasi pakipadradresengaku ku amakaruruburane ki kwini, ku marangisi ka dramu la papacai demedeme ki laumawmase si lanilapulapwane,

¹⁸ kwaku ka abebeelengenga ka Tamatama papiaku ki takapalralrawthane ki niakeli kiketekete, kwini tatulru adravane ikaikai kwini, kwi lalasu lri mialri kai maka palribulu ki lalalake lini; lri dulru ngipapalribulu sikakathane.

¹⁹ “Alaiyasi pasalraelreaku kikwini ku swalrubu, si ikai ki girimucane amudu patuelre, la papacai demedeme ki laumawmase si lanilapulapwane,

²⁰ kwaku ka abebeelengenga ka Tamatama papiaku ki takapalralrawthane ki niakeli kiketekete, ku Nua, Daniele, si Yubu adravane ka yakaikai kwini, kwi lalasu lri mialri kai maka palribulu ki lalalake lini; ku ulecegane lini lri dulru ngipapalribulu sikakathane.”

²¹ Ku abebeelengenga ka Tamatama amia kai, “Lri arakaiyaku ku amakaruruburane, silravane, waudriwdripi, si swalrubu kikai taisupatane ka matiwkukuludrunga ka amatikurwane si pathavungu ki swa Yerusalrime, la amudu demedeme ki umawmase si lanilapulapwane.

²² Alaiyasi ikai ku aabalu ku umawmase, la palribulu ki lalalakeini, kwi lalasu lu mubere mwa numiane kwini, wadradrele madu, si drele kwi ngangane lini turamuru, luka ngimiyaiya kikai, lri pulringalringau numi ku piali kikai pathavungu ki swa Yerusalrime ala ka pacengecenge.

²³ Lai lri thingale numi ku tapianeli patueelre ka yakaai ku taukaiyane.” Ku abebeelengenga ka Tamatama amia kai pelaela.