Izikile 13 - Ngudradreadrekadhane Ka Sisiu 魯凱語聖經

Maelaela ki kaika patengane ka layuginsia

¹ Ku Tamatama kawariva nakwane; kwi lasu amia kai,

² “Lri tara kawlrau ka umawmase, lri yugingisu; lri kaelaelasu ki swa Iseraylri kudra ki ngiatatubeabekace yugingi ka layuginsia. Si pelaela liniane ku lrika akirarakeetane lini kilalra ku vaga ki Tamatama.”

³ Amia kai kawriva ku abebeelengenga ka Tamatama, “Kilakikai takukulrungu ka yuginsia lri kimwa ku amatikurwane! Kai lalasu ngiakakandu si kawriva; ku maburusi lini ngidadaedarepe lini.

⁴ Swa Iseraylri, kwini layuginsia numi mararaamau ki yakaikai ki tawlrakavane ka lakalailalri ka kadrwa ku sapatumatumane.

⁵ Kwi takaburukane ki raedre ki cekele, kwi lalasu kai wacakupu; ku tamukadrulane ki balingibingi, kwi lalasu kai twapela pudriadringai. Ngwalai kikai, lu kelanga ku vai ki Tamatama, lu makakaruburuburunga, kai swa Iseraylri kai lri maka ngipapalribulu.

⁶ Ku maburusi lini ningitatu kidremedreemane; ku yugingi lini yai watavuvuvulrucu ki umawmase; kwi lalasu peaelaelaela nai amia ku vagali, ku patengatengane, kainaku siakawlu liniane. Kwi lalasu la mukalavalava ku angimiane ku takawrivane!

⁷ Peaelaelaku liniane, ‘Kudra drele numi ku maburusi ningitatu kidremedremane; kudra yugingi numi nitavuvuvulrucane. Lu kidremedreme numi kikai lavaga iyali patuelre, ku patengatengane, kadrwa ku papiali numiane kawriva ku manemane!’ ”

⁸ Ku abebeelengenga ka Tamatama la iyanga kai liniane, “Ku takawrivane numi ku vaga madraedrangelre; ku drele numi ku maburusi ningitatu kidremedremane, ngwalai kikai lri kiecebaku numiane.

⁹ Kunumi ka lawacapange daedarepe ku maburusi, kawariva capange yugingi ka yuginsia, lri pathavungaku numiane! Lri kai numi maka kipaelre ku tayelrelreane ki kawkawluli; ku nagane numi kai lri maka pacase pikai ki mibu ki daane ki swa Iseraylri. Lri kai numi maka siwlri mwa ki kadaengane ki swa Iseraylri. Luka ngimiyaiya kikai, lri thingale numi ala ka abebeelengenga naku ka Tamatama.

¹⁰ “Ku layuginsia watavuvulrucu ki kawkawluli, iya kai, ‘Masulivalivate!’ Ai ku patengatengane kadrwa ku sulivatane. Ku ara lrenege raedre ki kawkawluli, ku layuginsia arakai ku lrawlrapungu ku abu paderau.

¹¹ Pelaela ki layuginsia, kudra pia lini ku balingibingi lri mukadrulunga. Lri ara umukaku si maadrau ka kananu sititi ki balingibingi,

¹² ku balingibingi lri mukadrulunga. Ku palrapalra lri kivaga; ‘Manemane ku vai lu paderau numi ki balingibingi?’ ”

¹³ Lakamani, amia kai ku abebeelengenga ka Tamatama, “Lri ikaiyaku ki lisiane, la arakai ku umuku si maadrau ka kananu kabebetethe kai ki balingibingi.

¹⁴ Lri suburaku kabebetethe kudra paderawnga numi ku balingibingi, la suburu paadratane, si paadrelane ku karwalai, ku balingibingi lri mukadrulu, si drepete papacai numiane. Luka ngimiyaiya kikai, ala lri thingale numi aka Tamatamaku.

¹⁵ “Lri gugwaku ku girimucaneli pikai ki kinawmasane kudra ki twabalingibingi si paderau kikai ki balingibingi. Lri papiaku numiane pelaela, kudra twabalingibingi si paderau ki balingibingi ku umawmase lri kisaalrunga.

¹⁶ Kudra sakai kasulivalivate la papia ki swa Yerusalrime masulivaliivatenga iya kudra layuginsia kiasaalrunga makanaelre.” Amia kikai pelaela ku abebeelengenga ka Tamatama.

Maelaela ki kaika patengane ka layuginsia ka ababai

¹⁷ Amia kai ku Tamatama, “Lri tara kawlrau ka umawmase, lri yugingisu kaelaela ki yakai ki cekele daedarepe yugingi ka labaibai.

¹⁸ Lri pelaelasu liniane, ku abebeelengenga ka Tamatama amia kai: “ ‘Kunumi ka lalabaibai lri kipadradresenge numi ku amatikurwane! Pasiakai numi sanaka umawmase caisi pikai ki tasikalakalathane ku salemelemane ka lrisi, la pia numi ku talrupunu ka lrisi, tusaarakaiyane pusu tulrisi, ku lrika adulrwane lini magagemegeme ku niake ki umawmase. Pasana malramalra numi kudra puku ku adulrwane ngisasingikaai ku apacadhane ku apanianiakane ki kawkawluli pakai ku lrika amuesadhane numi.

¹⁹ Ngwalai numi ki piya ka ererece ka madradrau ka mugi, si luka piya ka pange, si ikai cucubungu ki kawkawluli tusinalrelreme nakwane. Ku nai kai pacai, papacai numi; ku nai pacai, la papanianiake numi. Papia numi ki kawkawluli tavuvulrucu, kwi lalasu la kasalru numiane.’ ”

²⁰ Lakamani, ku abebeelengenga ka Tamatama amia kai, “Mavalracevacaku kwini arakaikai numi ruthuku ki niake ki umawmase kwi salemelemane ka lrisi. Lri patwaladhaku ki tasikalakalathane numi mwalra purici kwini lasalemelemane ka lrisi, si palribulu kudra ki lakia ruthuku numiane ku umawmase.

²¹ Lri papuricaku kwi talrupunu numi ka lrisi, si palribulu ki kawkawluli, lai kai lri kiruthukunga numiane palralrawthu. Luka ngimiyaiya kikai, lri thingale numi ala ka Tamatamaku.

²² “Watavuvulrucu numi ku lrika akasulriane ki mathariri ka umawmase; kainaku lri patubi ki kidremedreme lini. Kai numi pamwabangalre ki manganga ka umawmase pakatwase ki ngialisiane ka kadalranane, si kipalribulu.

²³ Kwini ngitatubeabekace numi kwi maburusi, si ngidadaedarepe yugingi lri palikainga patuelre. Lri palribulaku ki kawkawluli pakidaili ki taruthukane numi. Luka ngimiyaiya kikai, lri thingale numi ala ka Tamatamaku.”