Izikile 12 - Ngudradreadrekadhane Ka Sisiu 魯凱語聖經

Ku yuginsia aamani kudra kwalrialri ka laumawmase

¹ Ku Tamatama kawariva nakwane; kwi lasu amia kai,

² “Lri tara kawlrau ka umawmase, yakaisu ki wabaebaebalre ka laumawmase. Kwi lalasu yakai ku maca, ai kai maka wadrele, yakai ku calringa, ai kai maka kialalra, asi lwiyane kwi lalasu wabaebaebalre ka laumawmase makanaelre.

³ “Lakamani, lri tara kawlrau ka umawmase, padulrwa ku saarakaiyane acaicali ku kadrai, la katwase lu kaiyana kadradrimiti. Lri katwasesu lu dredredrele ku laumawmase, la mubere mwa talidrumane, kudra la wabaebaebalre ku umawmase alau lri kirarakete kwi tangivelevelanesu.

⁴ Luka vaiyaneana ereecanga ku saarakaiyanesu mubeere ku kadrai, kwi lalasu lani drele ku tapianesu. Luka miauawbunga, lu dredredrele kwi lalasu lri katwasesu tavanane, mia ki lri acaicali.

⁵ Kwi lalasu lu dredredreleana, lri ikaisu ki balingibingi ki daanesu lutu ku taluvaale, la pangukai kwini ki lulutu malra kwi kadrai.

⁶ Lri ikaisu cucubungu liniane sikadrai, si metemete ki maca la katwase mulatadre. Kwini padredredrelesu amani ku apakipapawlringavaneli ki swa Iseraylri.”

⁷ Singiakaaiyaku pia ku tapelaelane nakwane ki Tamatama. Kwini ki vai, swaragelenga naaku ku saarakaiyane mubere ku kadrai, sakela ki miauawbu, la ara alrimaku ikai ki balingibingi lutu ku taluvaale, la sikadrai sa dredredrele ku laumawmase, si katuasenga.

⁸ Sakakaiyane ki mialrealre, ku Tamatama kawariva nakwane; kwi lasu amia kai,

⁹ “Lri tara kawlrau ka umawmase, kikai asasane kwidra lawabaebaebalre ka swa Iseraylri lri kivaga muswane, apia thingathingale luka watumatumanesu.

¹⁰ Kusu malra kikai apelaelaneli liniane kai vagali ka abebeelengenga ka Tamatama si pelaela liniane. Kikai vaga yai papia ki yakai Yerusalrime ki tarasangililuku si laumawmase kawriva.

¹¹ Pelaela liniane, ku tangimiamianesu yai taingeane ka sapelaelane ku angimiane lukabibilrili, lri padredrelesu ku lrika angimiane ikai ki kinawmasane lini lukabibilrili. Kwi lalasu lri aamaninga kudra kwalrialrialri ka laumawmase, si kiravase.

¹² Ikai liniane kudra tarasangililuku lu kaiyana kadradrimiti lri malra ku kadrai, lai lri ngukakai mubere kudra paswalanga lini pasikai iniane lutu ku balingibingi. Kwi lasu lri metemete ku maca, si sakerape kai cege katwase mwa kudra lrika amwane.

¹³ Ai lri paipadhaku ku araili si pwalra iniane, la iluku iniane mwa ka cekele Babilunia. Kwi lasu kai wadrele kwini ki cekele, ai lri pacai ikai kwini.

¹⁴ Lri malraku kwini ki yakai ki daane ki talialalai makanaelre, paelre kudra ki latakivagane si latarakadrekadrenge pasarau mwa ki lakuni. Lri mwaku kidruanga kurisi si pwalra liniane, la papacai liniane.

¹⁵ “Lu pasaraunga naku liniane mwa ki lakuni, pakatwase pwa ki maelane ka kuni, kwi lalasu lri thingale ala ka Tamatamaku.

¹⁶ Ai, lri ikaiyaku liniane suru ku tabeekele ku umawmase kai lri kikabebetethe ki makaruruburu, ki silravane, si swalrubu. Luka ngimiyaiya kikai, kwini laabalu kwi laumawmase lri ikai ki taacaicaliane lini ki kuni si ngipapelaela ku natapiapiane lini ka ngialisiane turamuru, lai lri thingale aka Tamatamaku.”

Patwathingale ku akakiwcane si manugiligili

¹⁷ Ku Tamatama kawariva nakwane; kwi lasu amia kai,

¹⁸ “Lri tara kawlrau ka umawmase, lri takukanekanesu si takukakiwkiucu; takuungungulu si takumanugiligiligili, si kasakwakua.

¹⁹ Lri papiasu ki kinauacekelane ka laumawmase kawriva, kikai yai apelaelane ki abebeelengenga ka Tamatama papia ki laasurwana ikai Iseraylri ka sakathathaananenga ka swa Yerusalrime ka vaga. Kwi lalasu lri takukanekane takukakiwkiucu, takuungungulu si takumanugiligiligili, si kasakwakua. Ku kadaengane lini lri acinilriane aubulane, asi lwiyane kwi yakaikai kwini ka laumawmase kadruanga ku ukai lini si kelele ki ngikarakacanane.

²⁰ Ku tatakalrane ki umawmase ku lacekele lri kikabebetethe, ku tatitiki ka cekele lri acalragulragu. Luka ngimiyaiya kikai, kwi lalasu lri thingale aka Tamatamaku.”

Languvavaaga si kaika languvavaga ka vaga

²¹ Ku Tamatama kawariva nakwane; kwi lasu amia kai,

²² “Lri tara kawlrau ka umawmase, kai swa Iseraylri ani paedhaedhale kwini amia kaika vaga ‘Ngiapalapalai si kawlrau kai vai, ku maburusi la yadaailinga’ amia kwini languvavaga?

²³ Lri pelaelasu liniane, amiaku kaika abebeelengenga ka Tamatama, lri kainaku paedhaedhalenga kikai languvavaga; ikai ki swa Iseraylri kai lri edhalenga kikai vaga. Lri pelaelalringasu liniane: Mabeanga kai vai, ku maburusi lri padaalrunga si ngimia!

²⁴ “Ikai ki swa Iseraylri kai lri ikainga ku kaika patengane ka maburusi si salrilrigilane ki umawmase ka yugingi.

²⁵ Kwaku ka Tamatama lri ngikakamaniaku kawriva liniane; ku takawrivaneli lri tara ngimiya, kai lri puadaidailane lutumane. Wabaebaebalre ka laumawmase, ku tapapianeli numiane pakipapawlringau lri tara pangimiya lu kai numi pacaiana. Amiaku kikai pelaela ka abebeelengenga ka Tamatama.”

²⁶ Ku Tamatama kawariva nakwane; kwi lasu amia kai,

²⁷ “Lri tara kawlrau ka umawmase, kai swa Iseraylri lu kidremedreme kudra drelesu ku maburusi, si yugingisu amani lukabibilrili kaiyana kadalidalidali amia.

²⁸ Lakamani, lri pelaelasu liniane, amiaku kaika abebeelengenga ka Tamatama: Kai nau lri puadaidailane lutumane; ku takawrivaneli lri tara ngimiya. Amiaku kikai pelaela ka abebeelengenga ka Tamatama.”