Izikile 11 - Ngudradreadrekadhane Ka Sisiu 魯凱語聖經

Ku swa Yerusalrime kiatupasalrivane

¹ Ku Ri ki Twaumase wamalra nakwane pubelenge, si pamwa nakwane belenge tali talrawane ka lrawlrawdru ki daane ki Tamatama. Ikai deethe ki lrawlrawdru tali talrawane wadrelaku ku ta 25 ku umawmase, ikai kwini yakai ku tadrusa ku tarasangililuku ki cekele. Yazania ka lalake ki Azure si Pilatia ka lalake ki Binaia.

² Ku Twaumase amia kai nakwane, “Lri tara kawlrau ka umawmase, kilakikai umawmase yakai cekele madrekadrekadrekase ku atavuvulrucane, kiasuete ku atavuvulrucane,

³ kwi lalasu amia kai, ‘Lri kaita tarathainunga si lai tupelata tucekele. Kikai cekele mia ki palungu, miata ki yapalungane ka beate, ka lri kipalakebe ki palungu.’

⁴ Lakamani, lri tara kawlrau ka umawmase, lri yugingisu, arakai ku vagali kaelaela liniane.”

⁵ Ku Ri ki Tamatama pangiatutuluku mulebe mwa nakwane. Ku Tamatama peaelaela nakwane, ku apapianeli ki laumawmase pelaela ku vaga, “Swa Iseraylri, ku takawrivane ki ngudwi numi, ku takidremedremane numi, wathingalaku patuelre.

⁶ Ikai kai ki cekele papacai numi kai tathathatha kai umawmase, madrurudruru ki kadalranane ki cekele kai kinawmasane ki wapacai.

⁷ “Lakamani, amiaku kaika abebeelengenga ka Tamatama: Kai pasalriu, kikai cekele yai palungu; ai kikai yapalungane kai beate kinawmasane ki papacai numi. Kai numi lri ikai kai ki cekele, lri malraku numiane cilri pulatadre ki cekele.

⁸ Makiwcu numi ki lrabu? Lri arakaiyaku ku lrabu kikaruburu numiane.

⁹ Lri ilukaku numiane mulatadre ki cekele, si baai numiane ki maelane ka cekele. Twa akipapacadhanenga naku numiane.

¹⁰ Lri ikai numi ki kadaengane ki kuni numi kikaruburu si pacai. Luka ngimiyaiya kikai lri thingale numi aka Tamatamaku

¹¹ Kikai cekele lri kai palakebe numiane lutumane, mia ki palungu palakebe ki yapalungane ka beate. Ikai numi kai Iseraylri kidruanga, lri tara pathavungaku numiane makanaelre.

¹² Kunumi thingala ala ka Tamatamaku. Lu tupapalra numi ku kakudhane ki lapasiagiagisi numi ka kuni yai pasalriwnga numi ki hulriceli, si baebalre ki drekaseli.”

¹³ Sa icengecengaku yugiyugingi, ku Pilatia ka lalake ki Binaia kiariimu pangitutuluku tubakebake si pacai. La guruthunganaku icakena si karaleale, “Abebeelengenga ka Tamatama, kai sakathathaananenga kai umawmase ki swa Iseraylri lri amudungasu patuelre?”

Pukawnu ki Twaumase ki laacaicali

¹⁴ Ku Tamatama kawariva nakwane; kwi lasu amia kai,

¹⁵ “Lri tara kawlrau ka umawmase, kai yakai Yerusalrime mapeaelaelaela matikai muswane si sakacekele ka swa Iseraylri ka maredele muswane acaicali. Kwi lalasu amia kai, ‘Kwidra la matwase acaicali ku sakacekele wadailinga turamuru ki Alrivilrivi ka taikaikaiyane ki Tamatama; ku Tamatama wamalranga kikai kadaengane si patarumara baai mitane.’

¹⁶ “Ai, malra kai vagali si padaruru ki thadalrane kwalrialri ka sakacekele. Amaniaku ka pakatwase liniane puadaili mwa ki lakuni, si sarau mwa ki makaelaela ka taikaiyane, ai lri taelreaku liniane ikai ki tamwane acaicali, si tupadawdaalru Alrivilrivi ka taikaikaiyane liniane.

¹⁷ “Lakamani, kusu malra kai taiyaneli kai vaga ka abebeelengenga ka Tamatama si pelaela liniane. Lri ililukaku liniane katwase ki tapwaneli liniane pasawvagavagai ki lakuni. Si malra sarubu liniane; ku kadaengane ki swa Iseraylri lri baadhaku sawlri liniane.

¹⁸ Kwi lalasu lu siwlringa mubalriu lri tara mwalra patueelre kwini matiagirimucu ka samiamiange.

¹⁹ Lri patarumaraku baai liniane ku bavane ka ri si bavane ka kidremedreme; lri mwalraku kudra mia ki lrenege ku kawlukulane ka kidremedreme lini, si patarumara baai liniane ku yakai ku erai yakai ku beate si mubangalre pasalaladha ka kidremedreme.

²⁰ Luka ngimiyaiya kikai, kwi lalasu lri paluludu ku hulriceli, si ka tengatengaane pasalaladha ku drekaseli patuelre. Kwi lalasu lri akawkawlu nakwane; lai lri a Twaumasaku liniane.

²¹ Ala kwidra la madalame sukubu ki matiagirimucu ka samiamiange ku umawmase, lri pathavungaku liniane. Lri singikaiyaku ku kakwakudhane lini pathavungu liniane.” Ku abebeelengenga ka Tamatama amia kai pelaela.

Ku lrigu ki Twaumase matwase Yerusalrime

²² Ku Kirubime ngiapalai, ku lapalridingi la tupapalra liniane; ku lrigu ki Tamatama ka Twaumase ki swa Iseraylri yakai belenge liniane.

²³ Ku lrigu ki Tamatama mwa belenge, matwasenga ki cekele, si idrengere ikai tali talrawane ki cekele kudra ki lregelrege.

²⁴ Ikai ki maburusi, ku Ri ki Tamatama pwabelenge nakwane, si iluku nakwane mwa kudra tamwane acaicali ki lasakacekele kavai Babilunia. Ala kawlrau kwini maburusi.

²⁵ Ala pelaelaku ki acaicali ki lasakacekele kudra pelaela nakwane ki Tamatama patuelre.