Izikile 10 - Ngudradreadrekadhane Ka Sisiu 魯凱語聖經

Ku lrigu ki Tamatama matwase ki daane ki Twaumase

¹ Paswabelengaku drele kudra lrimemeteke ikai belenge ki awlru ki Kirubime, ku belenge yakai ku vaeva ku mia ki niarakaiyane ku salesese ka tinukucingalrane ka lrenege tutaetalane.

² Ku Twaumase amia kai kudra ki sialaimai ku lalasare ka kaimadhane, “Lu mudaana, twaladha lebe ki Kirubime ki kabicelrakane ki palridingi ara alrima ecenge kwi kwadaladalai ka lrangele, la malra kwini lrangele si sarade ki cekele palraelre.” Wadrelaku ki lasu sa mudaane.

³ Kwi lasu sa mudaane, ku Kirubime acegecege ikai tali lrawdru ki daane ki Twaumase, yakai ku ememe suete tali daane kalatadrane.

⁴ Ku lrigu ki Tamatama matwase ki Kirubime, si idrengere ikai lrawlrawdru ki daane ki Twaumase; pacungulu yakai ku ememe suete ki daane ki Twaumase. Ku lrigu ki Tamatama ku taledrane wathelare palraelre ki kalatadrane.

⁵ Ku twalai ki sapakepake ki Kirubime ku lingau lu ikaiyane ki tali latadre ki kalatadrane kialalra madu; kwini lingau mia ki lingau lu kawrivariva ku wadulru sanaka manemane ka Twaumase.

⁶ Ku Tamatama wadrekase kudra ki sialaimai ku lalasare ka kaimadhane mwa tailebe ki Kirubime ki kabicelrakane ki palridingi malra ku apwi ka lrangele; kwi lasu la katwase mwadringi, si acegecege ikai thili ki vaeva ka palridingi.

⁷ Kwini tangeea ka Kirubime la taale ku alrima mwa liniane kwini ki apwi, si malra ku lalrangele ka apwi la pwa ki alrima ki sialaimai ku lalasare ka kaimadhane. Kwi lasu sa malranga kwini lrangele la katwase.

⁸ Wadrelaku kwini tailebe ki sapakepake ki la Kirubime yakaai ku vaeva ku alrima, mia ki alrima ki umawmase.

^9-10 La drelenga naku ku supate ku maramaraamau ku tangimiamiane ka palridingi, sanaka Kirubime yakaai thili ku vaeva. Kwini palridingi mia ki tinukucingalrane ka lrenege likalikathe si ledra; sanaka palridingi thili la ikaiyana ku vaeva ku palridingi, macacapecape.

¹¹ Kwini Kirubime lu ngivelevele, wadulru papia kidruanga talula, si kai ngibangulu; kwi lalasu adravane kai ngibangulu, lri dulru patueelre ngisasingikaai talula.

¹² Kwi kinawmasane lini, drelreke, alrima, sapakepake, si palridingi salraelre ku maca.

¹³ Kilakikai palridingi mararaamau kudra dreleli ku palridingi ikai ki aswalalanga ka maburusi.

¹⁴ Kwini la Kirubime sasupate ku lringau: Ku vaeva ku lringau mia ki lringau ki lwange, ku sakadrusa ku lringau mia ki lringau ki umawmase, ku sakatulru ku lringau mia ki lringau ki raiyungu, ku sakasupate ku lringau mia ki lringau ki takanga.

¹⁵ Ki lakikwini amani kudra dreleli ku panianianiake ka waudriwdripi ikai thili kadravane ka Kibare. Kwini Kirubime masiasilange ngipalai,

¹⁶ masiasilange ngivelevele, ku lapalridingi la mialri tupapalra liniane. Kwi lalasu lu paipai ku sapakepake si ngipalai, ku lapalridingi mialri tupapalra liniane.

¹⁷ Kwi lalasu lu idrengere, ku lapalridingi mialri idrengere. Kwi lalasu lu ngipalai, ku lapalridingi la tupapalra liniane, asi lwiyane ku Kirubime waruthuku ki lapalridingi.

¹⁸ Sakabilrilinga, ku lrigu ki Tamatama matwase ki samamudaane ki daane ki Twaumase, la talula mwabelenge ki Kirubime.

¹⁹ Sa icengecengaku dredrele, kwi lalasu wapaipai ku sapakepake, si ngipalai katwase cakena; ku lapalridingi la tupapalra liniane. Kwi lalasu yadrengere ikai belenge tali talrawane ka lrawlrawdru ki daane ki Twaumase, ku lrigu ki Tamatama yakai belenge liniane.

²⁰ Wathingalaku liniane ka amani kudra dreleli ikai babiabila kadravane Kibare, yakai lebe ki Twaumase ki Iseraylri ka panianianiake ka waudriwdripi.

²¹ Sanaka Kirubime supate ku lringau, supate ku sapakepake; ki sapakepake lebe yakaai ku vaeva ku mia ki alrima ki umawmase.

²² Ku lringau lini mararaamau kudra dreleli ikai babiabila kadravane Kibare. Sanaka Kirubime waleecege papucucubungu katwase.