Izikile 1 - Ngudradreadrekadhane Ka Sisiu 魯凱語聖經

Aswalaalanga ku drele ki Izikile ka maburusi (1.1–7.27) Taetalane ki Twaumase

¹ Sa tara matulrulunga ka caili si supate ka dramare ki samaka lrimale ka vai, taelreaku ki acaicali ka swa Yuda ikai Babilunia thili valru ka Kibare. Sakamani kwidra ngwaelebane subelebelenge, wadrelaku ku maburusi ki Twaumase.

² Kikai tangimiane kai amani sa tara lrimanga ka caili ku takiravasane ki talialalai ka Yehuiacingi.

³ Kwaku ka lalake ki Buzi, ka barakalai ka Izikile yakai Babilunia thili valru Kibare kilalra ku vaga ki Tamatama papia nakwane kawriva, la thingalaku ku pukuini swaete nakwane.

⁴ Masiasiraraku, la drelaku ku valrigi ku twalai tali dradha kainganai valrigi; yakai ku lrikace ku twalai ki ememe ledra, kwini ki ememe ngithalringulu la leedra turamuru, mia ki lrikace ka lriwlu.

⁵ Wadrelaku ki valrigi kabicelrakane yakai ku supate ku panianianiake ka waudriwdripi: Ku tangimiamiane lini mia ki umawmase,

⁶ ai kwini vavaeeva yakaai ku supate ku lringau, supate ku sapakepake.

⁷ Ku drapale lini madringeelrese, ku lrubungu mia ki lrubungu ki lwange, patuelre mia ki niselredrane ka lriwlu likalikathe.

⁸ Yakaai ku supate ku lalringau, supate ku sapakepake, kwi lalasu la ikaiyana ku supate ku alrima ki umawmase, ki lasapakepake lebe yakai ku vaeva ku alrima.

⁹ Kwini la panianianiake ka waudriwdripi papia latadre sege ku drusa ka sapakepake, si marairaisi, tusikake, lu ngivelevele masiasilange ngivelevele, si kai ngibangubangulu ku kinawmasane.

¹⁰ Kwini supate ka panianianiake ka waudriwdripi sasupate ku lringau: Ku cucubungu mia ki umawmase, ku yavanale mia ki raiyungu, ku yaviri mia ki lwange, ku yalrilrikudru mia ki takanga.

¹¹ Kwini lalasu yakaai ku drusa ku sapakepake la papubebelenge paipai, si marairaisi ki yathili ka sapakepake, la ikaiyana ku drusa ku sapakepake ku wakabungu ki kinawmasaneini.

¹² Kwini la panianianiake ka waudriwdripi ku lringau papia kidruanga, lakamani ku dulru ngisasingikaai ngivelevele, si kai ngibangubangulu ku kinawmasane.

¹³ Ikai kabicelrakane ki supate ka panianianiake ka waudriwdripi yakai ku lamanemane ku mia ki kwadaladalai ka lrangele, mia ki taliwlare apatalulawlawla; kwini taliwlare kwadaladalai kelrabe, si ledraedra.

¹⁴ Kwini panianianiake ka waudriwdripi ngiapalapalai cucubungu lrilrikudru, mia ki lrikace ku ridarane.

¹⁵ Sa dredrelaku kwini ki supate ka panianianiake ka waudriwdripi, wadrelaku kwini ki lawaudriwdripi babiabila yakaai ku vaeva ku palridingi ku watakela ki cakena.

¹⁶ Ku tangimiamiane kwini ki supate ka palridingi maramaraamau, ngimia patuelre ki waelelethe ka lrenege likalikathe si ledra. Ki vaeeva ki palridingi belenge yakaiyana ku maelane ka vaeva ka palridingi, ku tangimiane mia ki macacapecape;

¹⁷ Miyaiya kikai, kwini supate ka palridingi wadulru ngivelevele papia kidruanga, si kai ngibangulu ku kinawmasane.

¹⁸ Ikai kwini ki lrimemeteke ki palridingi makaalra ku maca.

¹⁹ Lu ngivelevele kwini supate ka panianianiake, kwini supate ka palridingi twapapalra ngivelevele; kwini panianianiake ka waudriwdripi lu kidaili cakena, ku palridingi twapapaalra kidaili cakena.

²⁰ Lu lri mwinu kwini panianianiake ka waudriwdripi, ku palridingi papiinu, asi lwiyane kwini panianianiake ka waudriwdripi waruthuku ki palridingi.

²¹ Ngwalai kikai, sana ngivelevele kwini panianianiake ka waudriwdripi, lu idrengere, lu katwase cakena, ku palridingi twapapaalra ngivelevele, idrengere, katwase ki cakena.

²² Ku belenge ki awlru kwini ki supate ka panianianiake ka waudriwdripi yakai ku lamanemane ka mia ki niarakaiyane kudra wathalrebethebe ki maca ka walikalikathe ka lrenege tucavalri ka lrimemeteke.

²³ Ikai kwini lebe ki lrimemeteke ka cavalri acegecege kwi supate ka panianianiake ka waudriwdripi; kwini lalasu tarawasege ku drusa ku sapakepake, si marairaisi ki thili ka lasapakepake, la ikaiyana ku taingeane ka drusa ku sapakepake ku wakabungu ki kinawmasaneini.

²⁴ Kialalraku kwini lalasu sa ngipalapalai ku lingau ku twalai ki sapakepake; kwini lingau mia ki bikabiki ki laveke, la mia ki tamakakaralealane ki maadrau ka kwapingi, la miana ki lingau ki wadulru sanaka manemane ka Twaumase. Kwi lalasu lu idrengere kai ngipalai la malra cikipi kwini sapakepake,

²⁵ Ai yakaaiyana ku lingau ku twalai belenge kwini ki lrimemeteke ka cavalri kainganai.

²⁶ Kwini belenge ki lrimemeteke ka cavalri yakai ku vaeva ku mia ki nidarepane arakai ku salesese ka tinukucingalrane ka lrenege ka taetalane; ikai belenge wanene ku mia ki umawmase.

²⁷ Wadrelaku patwalai ki tasilakelaketaneini papubebelenge mia ki niselredrane ka lriwlu, kwi latadre si adringi mia ki apwi; twalai ki tasilakelaketaneini papulelebe mia ki apwi, waleedra ngithalringulu;

²⁸ Kikwini ledra mararaamau ki balrilawlau. Kikai yai athingaalane ka ledra ku tamulebeane ki Tamatama.