Izera 9 - Ngudradreadrekadhane Ka Sisiu 魯凱語聖經

Maelaela ki marudrange mwa ki sakamaelanane ka zuku

¹ Sangilribatenga kikai, yakai ku latarasangililuku ki swa Iseraylri la kela pelaela nakwane, ku mapapangale ki swa Iseraylri, barakalai, si swa Lrivi, kai kiarimu kidaili ki pasiagisi lini ka kuni ka swa Kanange, swa Hite, swa Perizi, swa Yebuse, swa Amune, swa Muabe, swa Izipiti, swa Amuri. Kwini lalasu kiarimulringa twalralrau kwini ki laumawmase, piapia ku ngialisiane ku kakudhane.

² Kwini lalasu ngiapapasikai si lamwabaibalrithi lini karudrange mwa ki badhanane ka labaibai, la malranga pakakudrulru ki mabula ka kawkawlu ki Twaumase; kikai latarasangililuku ala amani ku wasangiluku pasalriu.

³ Sa kilalraku kikai, la tubiaku si thuriace ku laimai, la gucugucaku kai isiuli si ngisingisili, si nene kwalri tubitubi.

⁴ La neneaku tirerengane, pakela salri patarumaranga ki maungane. Asi lwiyane ku Twaumase ki swa Iseraylri naamia kikai kawriva, lri tara kiecebe kudra pasalrivane kwini ki acaicali si siwlringa ka laumawmase, sanaka kialalra kikai vaga si asasamaliane kathathiburu ku umawmase wakela makanaelre ngithalringulu nakwane.

⁵ Sa patarumaramara ku maungane ku sapatarumarane, la ngidrakalaku twalai ki tatubianeli, si silaimaiyana kudra thuriaceli ku laimai, la pidruraku, sege ku alrima papia ki Tamatama ka Twaumaseli inulri.

⁶ La iyaku kikai, “Twaumase, mainwaku turamuru, kaithuru icucubungu muswane tangerarane. Kai pasalrivane nai walrenepenga naiane, kai pasalrivane nai madrau turamuru.

⁷ Twalai ki zidai ki cucungulane nai pakela kaiasasane, kai pasalrivane nai matelrege turamuru. Ngwalai ki pasalrivane nai, kunai si talialalai nai, si labarakalai makitwa ikainga ki alrima ki talialalai ki maelane ka kuni. Kiapapacai nai, kiravase, mia ki kiaemenge kiravase, kitusinalreme kisidrekase pakilringau turamuru, pakela kaikameane lakamiyaiyana.

⁸ Tamatama ka Twaumase nai, napatarwamarasu baai naiane ku migemi, kunai ka abalu ka laumawmase la mubereana nai ki akipaaduriane, kasulivalivate ikai kikai ki mabula ka kadaengane. Amanisu ka padreleana naiane ki kalealedrane, si mubere ki akiruthukane, baai ku adulrwane nai makaudripiana.

⁹ Naduri nai, ai kaisu ka tapaaduriane naiane. La malrasu ki swakai Perisia ki latinuhika si tuthariri sirapale naiane, palraingi naiane panianiake, si maka dulrwana tupela kudra maburukunga ka daane ki Twaumase, la maka dulru nai ikai Yuda si Yerusalrime kidringai ku akasulivalivatane.

¹⁰ “Ai, Twaumase, kaiasasane kikai ngimiyaiya kai ala ngimia, manemaneana ku aiyaneana nai? Wabaebalrenga nai

¹¹ kudra pangukaikaisu ki lasasiakawlusu ka layuginsia baai ku sadrekasanesu naiane. Kwini lalasu napeaelaela naiane, kwini lrika adrikisane numi kwini kadaengane yai makudrulru ka kadaengane; asi lwiyane kwini swakai kwini ku laumawmase kudra matialrase matiagirimucu ku kakwakudhane pakakudrulrunga palraelre.

¹² Kwini lalasu peaelaela naiane: Alaiyasi lri ngiradhekane nai kagarange, si kisupisupilri kikai lataleke ki kadaengane, ka palralrawthu paucungulu ki lamwabaibalrithi, lutumane kai nai lri maka mathaethareve kwini ki laumawmase, kai nai lri maka paralubu pangiradhekane liniane.

¹³ Ku Twaumase nai! Adravane kudra wamwa naiane sanaka maneemane ngwalai ki pasalrivane nai, wathingale nai, ku sapathavunganesu naiane bebekeelane ki naika atarumarane nai; la papanianiakeanasu naiane.

¹⁴ Lritumane nai kai maka kirarakete ku drekasesu naiane, si mathaethareve kavai ki ngialisiane ka laumawmase? Lwiyasi la pangimiane kikai, lri tara kalisisu naiane, si amudu naiane, la kakadrwanga ku naaneanenga ku abalu.

¹⁵ Tamatama ka Twaumase ki swa Iseraylri, amanisu ku madringelrese; la papanianiakeanasu naiane ka lri pacainga. Papia nai muswane ngipapelaela ku pasalrivane nai; kadrwa ku kindri nai kela mucucubungu muswane.”