Izera 8 - Ngudradreadrekadhane Ka Sisiu 魯凱語聖經

Twalai ki taacaicaliane siwlri ka laumawmase

¹ Kikai lebe amani saka tinuhika ku Aretasise, kudra twapapalra nakwane ka Izera karededele twalai Babilunia siwlri mwa Yerusalrime kudra lanagane ki kiacapili ki lazuku, kudra retesane lini miyaiya kai:

^2-14 Geresume ka zuku ki Pinehase. Daniele ka zuku ki Ithamare. Hatuse ka lalake ki Sikania ka zuku ki Davidi. Zakaria ka zuku ki Paruse, si paelre kudra ta 150 ku swakai ki zuku ku lasawvalai (yakai ku tamacucungulane lini ka maretetese). Ilihuinai lalake ki Zirahia ka zuku ki Pahathe Muabe, si paelre ku ta 200 ku lasawvalai. Sekania lalake ki Yahazile ka zuku ki Zatu, paelre ki ta 300 ka sawvalai. Ibede lalake ki Yunathange ka zuku ki Adingi, si paelre ki tamalrimale ka sawvalai. Yesaia lalake ki Atalia ka zuku ki Ilame, si paelre ki tamapitulu ka sawvalai. Zebadia lalake ki Mikaele ka zuku ki Sepatia, si paelre ki tamavalrulu ka sawvalai. Ubadaiya lalake ki Yehile ka zuku ki Yuabe, si ta 218 ka sawvalai. Silumithe lalake ki Yusipia ka zuku ki Bani, si paelre ki ta 160 ka sawvalai. Zakaria lalake ki Bebai ka zuku ki Bebai, si paelre ki ta 28 ka sawvalai. Yuhanane lalake ki Hakatange ka zuku ki Azegade, paelre ki ta 110 ka sawvalai. Ilripelete, Yiele, si Simaia ka zuku ki Adunikame, si paelre ki tamanemele ka sawvalai (kikai lalasu abilrili ku tasiwlriane). Uthai si Zakure ka zuku ki Bigevai, si paelre ki tamapitulu ka sawvalai.

Pasiakai ki daane ki Twaumase pilri ki swa Lrivi ku Izera

¹⁵ Wasarubwaku pakanaelre ki mapapangale ikai kwini ki sapapia cekele Ahava ki babiabila ki kadravane; yakai nai kwini sulai makatulrulu. La drelaku ikai ku barakalai, ai laka kadrwa ku swa Lrivi.

¹⁶ Lakamani ku dawluli ku tarasangililuku ka kiacapili: Ilriezere, Arile, Simaia, Ilenathane, Yaribe, Ilenathane, Nathange, Zakaria si Misulame; si tadrusa ka tarabulrubulru, Yuiaribe, Ilinathange.

¹⁷ La sikawlaku liniane mwa kidrele ki tarasangililuku ka swa talikai Kasipia ka Idu, ku lrika avalane naiane kwini tarakaungu ki daane ki Twaumase si la papapalraini, sikawlu ku tapia mwa naiane, lanai maka pudriadringai ikai ki daane ki Twaumase kipuawawngane ki Twaumase.

¹⁸ Ngwalai ku thalradhane ki Twaumase la paralubu naiane, kwini lalasu la pakela naiane ku malrigili kagarange ka Serebia. Kwini lasu swakai ki zuku ki Maheli ka swa Lrivi; ku lalakeini si labetakaneini ka ta 18 twapapalra iniane kela.

¹⁹ Kwini lalasu la mialri pakainganai ki swakai ki zuku ki Mirari ka Hasabia si Yesaia, si paelre ki tamapusale ka maretetese.

²⁰ Ku drumane, la ikaiyana ku 220 ka tarakaungu ki daane ki Twaumase karededele kainganai; kikai laumawmase ku cucungulane lini yai, amani ku talialalai ka Davidi si lamabelengeini ku paswadalepe sikawlu mwa paralubu ki swa Lrivi. Ku nagane lini ninguvavaevane pacase ikai ki nipacasane ka senate.

Wasangiluku ki mapapangale laisi inulri ku Izera

²¹ Ikai ki babiabila ki kadravane Ahava, wadrekasaku makitu palaisi, ikai ki cucubungu ki Twaumaseta ngitatwalebe, kitubi iniane ku asangilukane ki kadadalranane nai, palakebe naiane si lalalake nai, si tacekecekelane nai patuelre.

²² Lu kidredremaku, lu kitubiane ki tinuhika ku taingeane ku tarakikaruburu ku ngwarigi palakebe ki kadalranane nai palakebe naiane, ku kaika akikaruburane naiane ki badha yai, matialrumale turamuru; asi lwiyane naamiaku kai ki tinuhika, ku Twaumase nai lri subulrubulru sanaka swadralru iniane ka umawmase, ai kudra wacilri iniane, lri kalisi si pathavungu.

²³ Lakamani kwidra, laisi nai, kitubi ku sapalakebane ki Twaumase; ku Twaumase la kilalra ku takitubiane nai.

Sapatarumarane ka saceacebe ki daane ki Twaumase

²⁴ Twalai ki kiacapili ki barakalai, wapilriaku ki Serebia, Hasabia, si drumane ka tamangeale.

²⁵ Ala malraku kwini patarumara ki tinuhika, lakiacapili, latarakidrekase, si la swa Iseraylri pasikai ki daane ki Twaumase ku kingi, gingi, si latakaiyane, baai ki barakalai.

^26-27 Kikai amani kudra baaili liniane ku lawbubulu: Lagingi 22 kuntungu. Idai ka lagingi ka lawbubulu, mapitulu kukingi ku telregane. Lakingi 3,400 kukingi. Mapusale ka kingi ka lakisi, 8.4 kukingi ku telregane. Drusa ku mathariri ka kisi ka bulavane, kudra kucingalrane thadalrane ki kingi ka kisi.

²⁸ La kawrivaku liniane iya kai, “Ikai ki maca ki Tamatama ka Twaumase ki cucungulane numi yai, mabula numi; kwini ningipapatarumarane baai iniane ku kingi ka lawbubulu, gingi ka lawbubulu mialri ka mabula.

²⁹ Kunumi dradrela kadrenge kilakikai, pakeela ku tadarurane ki daane ki Tamatama. Lu darurunga kavai, la ikaiya ki daane ki barakalai tintingi, ala baai ki barakalai si tarasangililuku ki swa Lrivi, si tarasangililuku ki swa Iseraylri ikai Yerusalrime.”

³⁰ Ku barakalai si swa Lrivi lakamani ka kiacapili pikai kikai lakingi, lagingi si latakaiyane, malra kwini si iluku mwa kavai Yerusalrime ki daane ki Twaumase.

Siaulri mwa Yerusalrime

³¹ Ikai ki aswalaalanga ka dramare ki mwasaka 12 ki vai, la katwasenga nai kadravane Ahava, papia Yerusalrime. Ku Twaumase nai watapalra naiane, palakebe naiane ikai kadadalranane si kai kitulisi ki badha si walepenge naiane.

³² Sa darurunga nai Yerusalrime, la isadra nai makatulrulu.

³³ Saka samakasupatele, la mwa nai ki daane ki Twaumase, la tintingi ku lakingi, lagingi, si latakaiyane, ala malra si baai ki lalake ki Uria ka barakalai ka Meremuthe. Kudra taelre iniane, yakai ku lalake ki Pinehase ka Ilriazare si tadrusa ka swa Lrivi ka lalake ki Yesua ka Yuzabade si lalake ki Binui ka Nuadia.

³⁴ Ninguvavaevane asipi kwini lawbubulu, nitintinganenga, si pudriadringainga pacase.

³⁵ Kwini twalai ki taacaicaliane siwlringa ku laumawmase makanaelre la makitu iluku ku sapatarumarane, tu Lama ka lrisi patarumara ki Twaumase ki swa Iseraylri. Kwini lalasu pasiakai ki swa Iseraylri makanaelre patarumara ku 12 ku sawvalai ka lwange, 96 ku balase ka nikiubawbalane ka kiu, 77 ku lrulai ka nikiubawbalane ka kiu, la ngipapasikai ku akabulane ku pasalrivane patarumara ku 12 ku balase ka kiu. Kikai nilapulapwane wamalra tuniculwane lama patarumara ki Tamatama.

³⁶ Kwini lalasu la mialri malra kudra baai ki tinuhika ku drekase baai ki siwciu ki Sapakalriwgu kadravane ka siu si lakiacapili; kwini lalasu la paralubu ki mapapangale si asukubane ikai ki daane ki Twaumase.