Izera 7 - Ngudradreadrekadhane Ka Sisiu 魯凱語聖經

Wakela Yerusalrime ku Izera

¹ Sakawlainga ku caili, saka tinuhika ku Aretasise ki swa Perisia, ku Izera twalai Babilunia siwlri. Ku cucungulaneini wadulru madu dungudungu pakela ki abebeelengenga ki barakalai ka Arungu; ku tamaretetesaneini miyaiya kikai: Ku Izera lalake ki Seraia, ku Seraia lalake ki Azaria, ku Azaria lalake ki Hilekia,

² ku Hilekia lalake ki Salume, ku Salume lalake ki Zaduke, ku Zaduke lalake ki Ahitube,

³ ku Ahitube lalake ki Amaria, ku Amaria lalake ki Azaria, ku Azaria lalake ki Meraiuthe,

⁴ ku Meraiuthe lalake ki Zirahia, ku Zirahia lalake ki Uzi, ku Uzi lalake ki Buki,

⁵ ku Buki lalake ki Abisua, ku Abisua lalake ki Pinehase, ku Pinehase lalake ki Ilriazare, ku Ilriazare lalake ki Arungu.

⁶ Ku Izera amani kudra makalra turamuru ku thingaleini ku kibulruini, makapwalringalringau turamuru kudra baai ki Tamatama ka Twaumase ki swa Iseraylri ki Musi kudra hulrice. Asi lwiyane ku Tamatama ka Twaumaseini swabulrubulru ki Izera, kudra kitutubi ki Izera ki tinuhika sanaka manemanenga, ku tinuhika palraingi iniane.

⁷ Saka tarapitu ka caili ku taatinuhikane ki Aretasise, ku Izera si la twaredelane ka swa Iseraylri twalai Babilunia katwase siwlri mwa Yerusalrime. Kikai lasakaredele paelre ki barakalai, swa Lrivi, tarasenai ikai ki daane ki Twaumase, tarakadrenge ki daane ki Twaumase si tarakawaungu.

^8-9 Kwini lalasu sakatwatwase Babilunia amani saka aswalalanga ki dramare ki aswalalanga ka vai; ngwalai ku takiparalubane ki Twaumase, kwini lalasu saka dramare ki mwasakalrima ki aswalalanga ki vai la daruru Yerusalrime.

¹⁰ Ku Izera ikai kudra ki tapanianiakaneini twavaevaeva kinkinkiu si pasususu kudra hulrice ki Tamatama, la malra kwini hulrice singibiabila bulrubulru ki mapapangale ki swa Iseraylri.

Pacase ka baai ki tinuhika ka Aretasise ki Izera

¹¹ Ku tinuhika ka Aretasise wamalra kikai lanipacasane baai ki Izera; ku Izera barakalai si ka tarakinkiu ki Sisiu, makapwalringalringau thingale kwini baai ki Tamatama ki swa Iseraylri ka padradrekase si hulrice.

¹² “Kunaku ka Aretasise, talialalai ki sanaka talialalai, wabadhaku muswane ka maka pwalringalringau kudra hulrice ki yabelenge ka Twaumase ka tarakinkiu ki Sisiu ka Izera ka barakalai,

¹³ “Wadrekasaku ki yakaikai ki kunuli ka swa Iseraylri, labarakalai, swa Lrivi, sanaka palraingi ku umawmase lri dulru tupapalra muswane siwlri mwa Yerusalrime.

¹⁴ Kunaku, paelre nakwane ka tapitu ka taramadrekadrekase, siakawlu nai muswane mwa drele kudra tangimiamiane Yerusalrime si tangimiamianenga ki swa Yuda, dredrele kwini lamapapangale luka pasususu kudra kisudralrusu ku hulrice ki Twaumase.

¹⁵ Kusu la mailuka kikai patarumarali si la taramadrekadrekase pasingikidremedreme kai kingi si gingi si lamanemane baai kwini ki yakai Yerusalrime ki daane ki Twaumase ka Twaumase ki swa Iseraylri.

¹⁶ Kusu la mialria iluku kwini malrasu kudra la nikazilwane ikai Babilunia ku lakingi si gingi, si ngipapalraingi lini kwini ki swa Iseraylri si labarakalai patarumara acebe ki daane ki Twaumase kavai Yerusalrime.

¹⁷ “Kusu dradrela arakai kikai lapaisu langai ku sawvalai ka lwange, balase ka nikiubawbalane ka kiu, titikiane ka nikiubawbalane ka kiu, lataleke si bava, la patarumara pikai ki tapatarumaramarane ikai ki daane ki Twaumase numi kavai Yerusalrime.

¹⁸ Ku tedrane ku kingi, gingi, lri dulrusu singikai ku takidremedremane ki Twaumasesu, arakai kudra tumatharirisu si tumathariri ki sakacekelesu.

¹⁹ Kusu malra kwini kisudralrusu kwini saarakaikaiyane ka latakaiyane ikai ki daane ki Twaumase la patarumara baai ki yakai Yerusalrime ka Twaumase.

²⁰ Ku drumane, kudra sanaka arakaikaiyane ikai ki daane ki Twaumase sanaka lawbubulu, kusu lri makadulrusu patwalai ki drawsulu ki kuni malra si arakai.

²¹ “Wadrekasaku pakanaelre ki kumuingi ka taramarasikai ki paisu ikai ki swa Sapakalriwgu kadravane ka siu, pakirarimu baai patarumara kai ki pwalringalringau ki hulrice ki yabelenge ka Twaumase ka tarakinkinkiu ka barakalai ka Izera kudra sanaka murikaini singibila ku lamanemane;

²² kudra makakalranga lri dulru kela ki 3,400 ka kukingi ku gingi, kudrai ka kukingi ku mugi, 2,000 ka kunsenge ku bava, 2,000 ka kunsenge ku lawlau ki ulrive; ku timu kai lri kekeelrete.

²³ Kudra urikai ki yabelenge ka Twaumase pasikai ki daane ki Twaumase sanaka maneemane, kunumi tara pangiamia madu. Lumia kikai, ku Twaumase kai lri papia nakwane si mwacungulu ki takatalialaladhaneli ka umawmase kalisi.

²⁴ Kunumi kaika nipalraingane malra kudra namanemanenga ku kazilu papia ki barakalai, swa Lrivi, tarasenai, tarakadrenge si tarakaungu, si sanaka yakaikaai ki daane ki Twaumase.

²⁵ “Izera, arakaiya kudra baai muswane ki Twaumase ku lrigilane, la sikawlu ku lakumuingi si tarasaibange mwa kadrenge ki mapapangale ki swa Sapakalriwgu kadravane ka siu, kwini ki pasususu kudra hulrice ki Twaumasesu ka mapapangale. Kusu tara malra kwini lahulrice si la bulrubulru ki kaipwalringalringau ka umawmase.

²⁶ Lwiyasi la ikai ku kai kialalra ku hulrice ki Twaumase si hulrice ki kuni, kwini lasu lri tara makakaai kipangicaeme kipathavungu: Kipapacai, ku kiapaacaicali, ku waravase ku zaisangeini, ku wamalra emenge.”

Wadrengedrengere ki Tamatama ku Izera

²⁷ Ku Izera amia kikai, “Ku Tamatama ka Twaumase ki cucungulaneta anikidrengedrengere! Pangiakakamani ki tinuhika arakai ku miyaiya kikai pangiragelane ka Yerusalrime ka daane ki Tamatama.

²⁸ Ku migemi ki Twaumase amani ku pakiakadalame nakwane ki tinuhika, ki taradrekaseini, si yakai ku puku ka lakumuingi ku taralubane lini. Ku Tamatama ka Twaumaseli patarwamara nakwane ku garangane, la dulrwaku sarubu ki lakiacapicapili ki lazuku ki swa Iseraylri si dulru tupapalra nakwane siwlri.”