Izera 6 - Ngudradreadrekadhane Ka Sisiu 魯凱語聖經

Kiakidringai ku tadrekasane ki tinuhika ka Sairuse

¹ Ku tinuhika ka Dariuse la pakatwase ku drekaseini ku wadrele kwini nipudringadhane pikai Babilunia ka pacase ki latalialalai.

² Ai kwini lalasu yakai ki daane ki talialalai kavai cekele Ikebatana ki swakai kadaengane ka Media kidringai ku vaeva ku sidrumane ka nibalrulane, nipacasane iya kikai,

³ “Saka taracaili ku taatinuhikanane ki Sairuse, kwini lasu wadrekase ku atupelane tudaane ku daane ki Twaumase Yerusalrime, ka tapikaikaiyane patarumara. Kikai daane ki Twaumase ku abelengane 27 ka mituru, ku ngulapane 27 ka mituru.

⁴ Kwini balingibingi ki saka ngusitulrulu ki tadradrau ka lrenege drima ku sivale ku bali. Kudra salangadhane lri patwalai ki drawsulu ki kuni.

⁵ Kudra malra ki talialalai ka Nibukadenezere twalai ki daane ki Twaumase Yerusalrime mwa Babilunia ku kingi ka takaiyane mialria sawlri pwa Yerusalrime ki daane ki Twaumase, si pwa kwidra ki natapikaiyane.”

Ku tinuhika ka Dariwse wadrekase ku apacungulane tudaane ku daane ki Twaumase

⁶ Ku tinuhika ka Dariwse la patubalre iya kai, “Siwciu ki swa tali Sapakalriwgu kadravane ka siu ka Tatenai, Sethare Buzenai si lakiacapili ki swa Sapakalriwgu kadravane ka siu makanaelre, “Kunumi kidaila kwini ki daane ki Twaumase;

⁷ madha thethengete kwini ki atudaanane ku daane ki Twaumase. Ani pikai kwini ki nataikaiyane tupela tudaane ku daane ki Twaumase ku siwciu ki swa Yuda si lamarudrange ki swa Yuda.

⁸ Kikai wadrekasaku numiane paraluba liniane tupela tudaane. Kudra saarakaiyane lini ku lapaisu la pakirarimwa malra patwalai ki drawsulu ki talialalai, kwini nikikazilwane ki swakai Sapakalriwgu kadravane ka siu la malra kivala si papia baai, amani lwiyasi la idrengere ku awngane.

⁹ Kunumi pivaiya kai retege patarumara ku saarakaiyane ki barakalai Yerusalrime; adravane ka arakaiyane ki Lama ka lrisi apatarumarane ki yabelenge ka Twaumase kudra lrulai ka sawvalai ka lwange, balase ka nikiubawbalane ka kiu, ka lrulai ka nikiubawbalane ka kiu, mugi, timu, bava, ku lawlau ki ulrive, kunumi tara baadha patuelre.

¹⁰ Lumia kikai, kwini lalasu lani maka patarumara ku sangwalreme ka waudriwdripi ka sapatarumarane ka kadalame ki yabelenge ka Twaumase, si lani kitubi ku asubulrubulrwane nakwane si lamwabaibalrithi nakwane.

¹¹ Ku drumane ku adrekasaneli: Lwiyasi la ikai ku umawmase ku ngiakathiathingale supilri si pela ku drekaseli, mwalra tuluthu ku vaeva kwini mabitutulru ka bulri ki daaneini, si arakai culrulu iniane, la takeakelrai iniane; kwini daaneini lri atabulubulwane.

¹² Lwiyasi ikai ku talialalai ku mapapangale ku twapela kikai nidrekasane, si kisanu kabebetethe kikai daane ki Twaumase, kudra amani ka wapilri Yerusalrime tutasukusukubane iniane ka Twaumase ani malra amudu kwini ki umawmase. Kunaku ka Dariuse peaelaelaku kikai drekase, tara pudriadringadha pasusu.”

Patarwamara ku daane ki Twaumase

¹³ Ku siwciu ki swa tali Sapakalriwgu kadravane ka siu ka Tatenai, Sethare Buzenai, si lapapalra lini ka latabebelenge la makitu pudriadriingai pasusu kudra drekase ki tinuhika.

¹⁴ Kudra lamarudrange ki swa Yuda la tarumara ku twalai ki yuginsia ka Hagai si Zakaria ku sapasapukwanane, kudra awngane ki daane ki Twaumase la kasasulivalivate. Kwini lalasu pasusu kudra takidremedremane ki Twaumase ki swa Iseraylri, si kudra drekase ki tinuhika ki Perisia ka Sairuse, Dariuse si Aretasise la patulrepengenga ku atudaanane ku daane ki Twaumase.

¹⁵ Satulrepengenga ku daane ki Twaumase yai, yakai ki saka taraeneme ka caili ku taatinuhikanane ki Dariuse, ki Athare ka dramare ki sakatulru ki vai.

¹⁶ Ku mapapangale ki swa Iseraylri, paelre ki barakalai, swa Lrivi si sanaka siawlringa kudra acaicali ku laumawmase, makitwa kiraragai tulrisisi patarumara ku daane ki Twaumase.

¹⁷ Pasikaikai ki apatarumarane tulrisisi, kwini lalasu la patarumara ku idai ku sawvalai ka lwange, 200 ku nikiubawbalane ka kiu, si 400 ku titikiane ku balase ka nikiubawbalane ka kiu, si 12 ku balase ka kiu tu Balrithane ki pasalrivane ka lrisi, kwini vaevaeva ngiatalikaiyane ki lazuku ki swa Iseraylri.

¹⁸ Kwini lalasu singiakai ki tapelaelane ki hungu ki Musi, la malra kwini ki barakalai si swa Lrivi apadaedarepe, singikai kudra tamaubalribalrithane ikai ki daane ki Twaumase kavai Yerusalrime kipuawawngane.

Takilragavane ka lrisi

¹⁹ Saka taradrusa ka caili ki aswalaalanga ki dramare ki mwasaka 14 ki vai, kudra acaicali si lasiawlringa ku laumawmase la tulrisisi ki Takilragavane ka lrisi.

²⁰ Sanaka barakalai si swa Lrivi la makitu singikai kudra ki lrisi ngibabula. Ku swa Lrivi pasiakai kwini siawlringa ka laumawmase, si barakalai, la ngipapasikai culu ku waudriwdripi ki Takilragavane ka lrisi.

²¹ Sanaka siawlringa ka acaicali ka swa Iseraylri makitwa kanenga kikai niculwane; kwini yakai kikai ki kadaengane, la kidailinga ki drumane ka takisuswane si sukubunga ki Tamatama ka Twaumase ki swa Iseraylri ka laumawmase la mialri makitu kanenga kikai niculwane.

²² Kwini lalasu kiararagai tulrisisi kai ki Tamwalrane ku sapawsemakane ka lrisi, makapitulu ku vai. Kwini lalasu swaeteane ku sakiararagai; asi lwiyane ku Tamatama wamalra ki tinuhika ki swa Asiria makakadawdalru liniane, la paralubu liniane tupela tudaane ku daane ki Twaumase ki swa Iseraylri.