Izera 5 - Ngudradreadrekadhane Ka Sisiu 魯凱語聖經

¹ Kikwini kwidra, yakai ku tadrusa ku yuginsia ka Hagai si agane ki Idu ka Zakaria la pangukai ki nagane ki Twaumase ki swa Iseraylri papia ki yakai Yuda si Yerusalrime ka swa Yuda pelaela ku vaga ki Twaumase.

² Ku lalake ki Saletile ka Zerubabele si lalake ki Yehuzadake ka Yesua la kilalra kikai saaulriwlriane lini, la kirimu pathagili kudra atupelane tudaane ku daane ki Twaumase ikai Yerusalrime, kwini tadrusa ka yuginsia la paralubu liniane.

³ Taswamasilasilange kikwini, ku siwciu ki swa tali Sapakalriwgu kadravane ka siu ka Yuparatise ka Tatenai, Sethare Buzenai si la rededelaneini la kirarimu mwa Yerusalrime, kaelaela kivavaga liniane, “Aneane kwini palraingi numiane tudaane si pudriadringai kai ki daane ki Twaumase?”

⁴ Kwini lalasu la malra kudra lanagane ki sanaka paralubu tudaane ku laumawmase.

⁵ Ai ku Twaumase wadrangalrungalru ki lamarudrange ki swa Yuda; kwini lakiacapicapili ki Perisia la karathudu ku mwakalava kudra sapelaelane lini ki tinuhika ka Dariuse, lu tarumaranga ku sapatubalreane ala lri kirimu ngivelevele.

⁶ Kikai lebe amani kudra nipacasane si baai ki tinuhika,

⁷ “Tinuhika ka Dariuse, asu kapalralrawthu kasulivaliivate ku tarathudanesu!

⁸ “Naika peaelaela nai muswane ka tinuhika, wamwa nai ka Yuda ka siu, la drele nai kwini daane ki sanianiangenga ka Twaumase la icengecenge tupelaela tudaane. Kikai daane ki Twaumase arakai ku tadradrau ku lrenege tupudriadringai, la ikai ku tadradrau ku bulri paraedre ki balingibingi. Kikai awngane ku tapiapiane tinupudriadringadhane turamuru, si kasulialialivate ku takaungane.

⁹ “Ani pelaela naiane kai lamarudrange amia nai, luka aneane kudra padrekadrekase liniane palraingi tupela si pudriadringai kavai daane ki Twaumase.

¹⁰ La malra nai patwalai liniane kudra lanagane lini, ala kamani ku makapelaela nai muswane ka tinuhika, luka aneane kudra wasangililuku kai ki awngane.

¹¹ “Kwini lalasu la tubalre, ‘Kunai amani nai kwidra lasasiakawlu ki tamatama ki yakawmasane ka Twaumase. Kikai twapelaela nai pudriadriadringai kai daane ki Twaumase amani kwidra sakasidrumane ikai ki swa Iseraylri kudra tangea ka sapukwane ka talialalai ka twadaane ka pangiaragelane.

¹² Ngwalai kudra ki cucungulane nai sapangilisiane ki Twaumase la kaelaela, ku Twaumase la malra liniane pakimalra ki talialalai ki Babilunia ka Nibukadenezere ki talialalai ki zidai ki swakai Kalediane. Kikai daane ki Twaumase la kiburuku, kiravase ku mapapangale, acaicali mwa kavai Babilunia.

¹³ Sakabilrilinga, saka taracaili ku takatinuhikanane ki Sairuse ki swa Babilunia, la drekase tupela tudaane ku daane ki Twaumase,

¹⁴ si sawlri baai ku twalai ki Nibukadenezere ka nipatwaladhane Yerusalrime ki daane ki Twaumase ravase la pikai ki biu ki swa Babilunia ka latakaiyane ka kingi gingi. Ku tinuhika ka Sairuse wamalra kikai latakaiyane si baai ki Sisebazare; kikai lasu amani ku sikawlu ki tinuhika ka Sairuse asiwciu ki swa Yuda.

¹⁵ Ku tinuhika wacunu iniane malra kikai latakaiyane iluku pasiwlri mwa ki daane ki Twaumase Yerusalrime, si ikai kwini ki nataikaiyane ki daane ki Twaumase tupela cegecege ku karwalai ki daane ki Twaumase.

¹⁶ Lakamani kwidra, siwlri ki Sisebazare, si cegecege ku karwalai ki daane ki Twaumase, kudra awngane twalai kwini pakela kikai pacungucungulwana, kaiyana maka tulrepenge.’

¹⁷ “Kaiasasane, kusu ka tinuhika mathariri luiyasu, ala sikawla ku umawmase lani drele kwini tapacasane ki talialalai ki swa Babilunia, drele ku tinuhika ka Sairuse luka yakai ku tadrekasane tupela tudaane kikai yakai Yerusalrime ka daane ki Twaumase, ala patubalrea, pelaela naiane kusu ka tinuhika kudra takidremedremanesu kikai awngane kai.”