Izera 4 - Ngudradreadrekadhane Ka Sisiu 魯凱語聖經

Watelenge ki atupelane tudaane ku daane ki Twaumase

¹ Ku badha ki Yuda si Biniyamingi sa kilalra kwini siaulri singi takiravasane ku laumawmase ka twapelaela tudaane ku daane ki Tamatama ka Twaumase ki swa Iseraylri,

² la katwase kikawriva ki Zerubabele si latamatama ki zuku, la iya kai, “Ala nai kipaelre kikai atudaanane numi kai daane ki Twaumase. Ku sukusukubu nai si kunumi thadalrane ka tangeangea ka Twaumase. Twalai ku tailukane naiane kela kai ki tinuhika ki swa Asiria ka Isaradune, patarwamaramaarana nai tulrisi papia ki Twaumase.”

³ Ku Zerubabele, Yesua si latamatama ki zuku la pelaela liniane, “Kai nai mwarikai ku akiparalubane numiane, ku apasikaiyane ki Tamatama ka Twaumase nai tudaane ku daane ki Twaumase. Kunai lri pasusu nai ku tacunane ki tinuhika ki swa Perisia ka Sairuse ngikakamani tudaane.”

⁴ Ala, kwini swakai kwini ku laumawmase la kidremedreme ku atelengane si kukuludru ki swa Yuda, kai patudaane liniane.

⁵ Kwini laumawmase la baai ku pavangalre ki tabebelenge ki swa Perisia ku amwane telenge liniane, twalai saka tinuhika ku Sairuse pakela ki Dariuse, kai watelrai pia kai vangavangavange.

Watelenge ku atupelane tucekele Yerusalrime

⁶ Saka tau atinuhika ku Ahasueruse, ku badha ki Yuda si Yerusalrime namailuku ku sahukukane ku pacase si mwa hukuku liniane.

⁷ Ala peelanga, saka tinuhika ki Perisia ku Aretasise, Biselame, Mitheredathe, Tabele si la rededelaneini nawasatedre ku pacase baai ki tinuhika; kwini nipacasane arakai ku pacase ki swa Arame, lu silrigu ala patululu arakai ku vaga ki Pirisia.

⁸ Ku siwciu ka Rihume si tarapacapacase ka Simesai mialri pacase ku sahukukane ki swa Yerusalrime, si baai ki tinuhika ka Aretasise tumiyaiya kikai,

⁹ “Siwciu ka Rihume si tarapacapacase ka Simesai si larededelane nai ka latarasaibaibange si ladrumane ka wakela kai taluela twalai Ilreke, Babilunia si swa Susa ka yakai Ilame ka papalraini,

¹⁰ paelre kwini ki tinusaniangane ka twalai ki nacekele Asurebanipale kainganai si ikainga Samaria si Sapakalriwgu Kadravane ka siu ka lamapapangale, maredeedele satedre kikai.”

¹¹ Kwini nipacasane amia kikai, “Kikai mapapangale ki swa Sapakalriwgu kadravane ka siu wasatedre baai ki tinuhika ka Aretasise.”

¹² “Anatumane la thingale amia nai muswane ka talialalai, kavai la twalai ki tarathudanesu ka talialalai ka drumane ka kadaengane kela iziu si ikai Yerusalrime ka swa Yuda yacengecenge tudadaane kavai ki mativalracevace ka wabaebalre ka cekele. Ka lalasu pathagilinga raedre ka alradre ka kepale ki cekele, lri padaalrunga si tulrepenge.

¹³ Talialalai, kikai cekele sana maka tudaane, maka alradre ki alradre ki cekele, kavai laumawmase lri kaimubangalrenga baai sanaka kazilu; ku drawsulusu ka talialalai lri tara arukabekelane.

¹⁴ Asi lwiyane kiapuawawngane nai ki sihu, yakai ku capilane nai kisikawlu muswane ka talialalai, kai nai palraingi drele lu mutaluvaivai ku miyaiya kikai, lakamani ku papia nai muswane ka talialalai kawriva kai kidremedreme nai,

¹⁵ talialalai ala cuna ku umawmase lani balre kwidra napacase ki aswala ka talialalai. Lumia kwini lri drelesu kikai cekele ala ka amani kwidra tabaebalreane, twalai kunadruma, amani ku taraupupungu ki latalialalai si lasiwciu ki cacekele. Kikai umawmase ki swakai kai ki cekele makuciingalre rathudu. Lakamani ku kisuburu kikai cekele.

¹⁶ Masalru nai, lwiyasi kikai cekele lu tupela tucekele la tulrepenge kai raedre ka alradre ki cekele, kusu ka talialalai kaisu lri rathudunga kikai ki swa tali Sapakalriwgu kadravane ka cekele.”

¹⁷ Ku tinuhika ku sapatubalreaneini miyaiya kai: “Siwciu ka Rihume si tarapacapacase ka Simesai si lakiacapili ikai cekele ki swa Samaria si swa tali Sapakalriwgu kadravane ka siu sabau:

¹⁸ “Kudra satedre numi ku pacase yakainga ku patululunga ku vaga, silrigu pakilalra nakwane.

¹⁹ Wadrekasengaku pamwa drele, la ka tengane kwini swa Yerusalrime twalai kunadruma amani ku tarabaebaebalre ki laatalialalai; ki kavai cekele kiasuete ki abaebalreane si apakalrithavulane ka laumawmase.

²⁰ Kudra la sapukwane ka la natalialalai nawarathudu kavai si palraelre ki swa tali Sapakalriwgu kadravane ka siu, si malramalra ku makaelaela ku kazilu.

²¹ Lakamani, kunumi pakatwasa ku sadrekasane, si telenge kwini apasiwlriane tudaane, pakela ku tapelaelaneli ku vagali.

²² Kunumi la makakaiya pangimia kikai awngane, madha tuliapapai, amani luka parawramurunga ku asipunaneli.”

²³ Ku Rihume si Simesai si larededelane lini sakilalra kwini tasilrigwane ku sapatubalreane ki tinuhika ka Aretasise, la makakai mwa ka Yerusalrime, arakai ku kwapingi vutha paidrengere ku awngane ki swa Yuda.

Ku atudaanane ki daane ki Twaumase peaeelanga pathagili

²⁴ Ku atupelanane tudaane ku daane ki Twaumase ikai Yerusalrime ku awngane kiavutha paisadra, kai maka pacungulu kaungu, pakeela saka taradrusa ka caili ku tarathudane ki tinuhika ki swa Piresiane ka Dariuse.