Izera 3 - Ngudradreadrekadhane Ka Sisiu 魯凱語聖經

Twapela pathagili sukubu

¹ Sadaruru ki saka tarapitu ka dramare ki caili. Ku swa Iseraylri yakainga ki cekele lini sutelrai supedrengenga makanaelre. Kwini lalasu la iyelrelre makanaelre ikai Yerusalrime.

² Ku Yesua ka lalake ki Yuzadake si kwidra papalra lini ka labarakalai, ku Zerubabele ka lalake ki Saletile si laretesane lini, twapela ku tapatarumaramarane ki Twaumase ki swa Iseraylri. Pakai kudra apangimiane ku hulrice ki umawmase ki Twaumase ka Musi, la pikai belenge ki tapatarumaramarane patarumara ku Lama ka lrisi.

³ Asi lwiyane kwini lasiaulri kiarimu mukuludru kwini ki swakai kwini ki laumawmase, kwini lalasu yakaaiyana kwini ki supilri ka tapatarumaramarane tupela darepe ku tapatarumaramarane, ala kirimu kwini lalasu la tupela pathagili ikai kwini ki tapatarumaramarane papia ki Tamatama patarumara ku Lama ka lrisi lukamaungu lukamialrealre.

⁴ Kwini lalasu singiakai ku nikelretane pasusu kwidra ki Talakangane ka lrisi niyane, lukavaivai singikai ku atuthainwane patarumara kudra atara patarumarane ka Lama ka lrisi.

⁵ Ku drumane, kwini lalasu la patarumara ku apiapiane ka Lama ka lrisi, si ikai ki aswalalanga ka vai si apatarumarane ka lrisi ikai ki sanaka tayelrelreanenga si sukusukubu ki Tamatama, la ikaiyana kudra papia ki Tamatama patarumara ku Ngipapalraingini patarumara ka lrisi.

⁶ Kwini adravane sakaiyana tupela tudaane ku daane ki Tamatama, ai twalai ki aswalaalanga ka vai ki sakapitu ka dramare, kwini lalasu pathagiliinga papia ki Tamatama patarumara ku Lama ka lrisi.

Pathagili tupela ku daane ki Twaumase

⁷ Ku lamapapangale wabaai ku sapawlrawlravane ki taratulrenege si tarathurade, la mialri malra ku la akaneane, awngulane, lawlau ki ulrive, si mwa ki swa Tayre si Sidune kibalrithi ku cedare ka angatu ki swa Lebanungu. Kikai laangatu lri pangukai ki laveke pelai pwa ka Yupa. Kikai yai nipalraingane ki tinuhika ki swa Perisia ka Sairuse.

⁸ Kwini sa siwlringa kudra mapapangale mu Yerusalrime kwini ki caili ki sakadrusa ki dramare, kwini lalasu yakai kwini ki sakwa ka taikaiyane ki daane ki Twaumase pathagili kaungu. Ku Zerubabele, Yesua si la drumane ka sakacekele, barakalai si swa Lrivi, ku patengatengane, kudra acaicali makanaelre si siwlringa mu Yerusalrime ku laumawmase kiapaelre makanaelre kikai ki awngane. Kwidra tara mapusalenga ka caili papubebelenge ka swa Lrivi la kisikawlu ka amani ku wadrangalru kikai awngane tupela tudaane ki daane ki Tamatama.

⁹ Ku swa Lrivi ka Yesua si lamwabaibalrithi iniane, retesaneini, si Kademile si lamwabaibalrithi iniane (zuku ki Hudavia), maelrelre kamani ku wadrangalru ki awngane ki atupelane tudaane ku daane ki Twaumase. Ku lamwabaibalrithi ki Hinadade ka swa Lrivi, si laretesane mialri paralubu liniane.

¹⁰ Kwini lalasu sapathagili cegecege ku karwalai ki daane ki Tamatama, ku labarakalai makitua ngiragelane ku sangiragelanane, acegecege ikai kudra ki tasakaiyane lini ka tangea ka tangea, la malra ku sangirapane; ku agagane ki Asape ka swa Lrivi la malra ku barebare acegecege ikai kwini. Kwini lalasu singiakai kudra tukakudhane saka zidaiyana ki talialalai ka Davidi senai drengedrengere ki Tamatama.

¹¹ Kwini lalasu matwabaebalre senai, kiaseasene ki Tamatama iya kai: Mathaithaariringa ka Tamatama; ku thalradhaneini ki swa Iseraylri lrika palralrawlrawthane ikai. Kwini laumawmase makitwa putariri, drengedrengere ki Tamatama, asi lwiyane kwini karwalai ki daane ki Tamatama pathagilinga ku awngane.

¹² Takalra kudra latarudrawdrange ka barakalai, swa Lrivi, si latamatama ki zuku kudra nawadreleana ku siaswalane ku daane ki Twaumase, kikai la drele ku tatupelaelane ku karwalai ki daane ki Twaumase, kai wabesere la makitu tubi; ku drumane ku yakai kwini la makitu putaritariri.

¹³ Kadrwa ku maka pathathingale ku lingau ki pwatariri ku lingau si ki watubitubi, asi lwiyane madrau turamuru ku lingau, adravane ka iyadaili makitwa kilalra.