Izera 10 - Ngudradreadrekadhane Ka Sisiu 魯凱語聖經

Pacase ka sapaidrengerane ki mathaethareve ki maelane ka zuku

¹ Ku Izera sa ikai ki daane ki Twaumase cucubungu guruthungane icakena inulrinulri, si tubitubi, ngipapelaelaela kikai lapasalrivane, yakai ku twaredelane ku swa Iseraylri, matala sawvalai labaibai si lavavalake, isarubu ngithalringulu iniane, la tubitubi kwalrialri.

² Ku swakai ki zuku ki Ilame ka lalake ki Yehile ka Sekania la kawriva ki Izera, “Wamwa nai karudrange ki labaibai ki maelane ka zuku, kai nai savaeva ku kidremedreme papia ki Twaumase nai; adravane ka ngimiyaiya kikai, kai swa Iseraylri yakaiyana ku sidramane.

³ Kaiasasane, kunai lri tara papia nai ki Twaumase pudriadringai kiketekete: Lri malra nai kikai ki labaibai si lalake lini satedre pakatwase. Lri kilalra nai pasalaladha muswane si kudra sapakipapawlringavane ki mwasakene tukucingalre ku drekase ki Twaumase ka umawmase. Lri pasusu nai ku hulrice ki Twaumase.

⁴ Yakai ku capilanesu malra kikai si la pangimia. Lri paralubu nai muswane; nai kagarangesu pia patulrepenge kikai awngane.”

⁵ Ku Izera kiketeketa la iya kwini ki barakalai, swa Lrivi si latarasangililuku kwini ki drumane ka laumawmase, palakebe liniane singikai ku taiyane ki Sikania. Kwini lalasu la pangimianga.

⁶ Ku Izera la twalai ki cucubungu ki daane ki Twaumase mudaane ki tapeapecane ki lalake ki Ilriasibe ka Yehuhanange, ikai kwini sulai, kwini lasu kai wakane kai waungulu, watubi taleare ngwalai ki acaicali ka laumawmase kudra kaika takapatengatenganane ku kidremedreme.

^7-8 Ku latarasangililuku ki cekele la pakatwase ku sadrekasane palraelre ka Yerusalrime si Yuda, dawlu sarubu kwini sanaka acaicali ka laumawmase si kela Yerusalrime. Lwiyasi la ikai ku umawmase ikai ki nimaka tulrulane la kai kela, ku tacekecekelaneini lri kimalra; kwini lasu la lri kimwalra patwalai ki mapapangale.

⁹ Kwini ki nimaka tulrulane, kwini ki mwasaka bangate ki dramare ki mapusale ki vai, sanaka yakai Yuda si Biniyamingi ku umawmase la makitu kelanga Yerusalrime, isarubu ikai ki kalatadrane ki daane ki Twaumase. Kwini ki vai, la tarwadrau ku udale, ngwalai ki udale si tinukucingalrane ki aisarubwane, ku laumawmase makitwa manugiligiligili.

¹⁰ Ku barakalai ka Izera la acegecege, si kawriva liniane, “Kai numi ka patengatengane ku kidremedreme, la mwa numi ki maelane ka zuku ka labaibai, si papasalriu numi ki swa Iseraylri.

¹¹ Kaiasasane, kunumi papia ki Tamatama ka Twaumase ki cucungulane numi ngipapelaela ku pasalrivane, la pangimianga ku kadalameini, la pwa retege kwini tamacacapilane numi kwini ki yakai ki kadaenganeta ka lamaelane ka zuku, si katwase kwini ki labaibai numi ka maelane ka zuku.”

¹² Ku mapapangale la akwadrau tubalre, “Sanaka taiyanesu, lri pangimia nai.”

¹³ Ai, kwini lalasu la iya kai, “Kikai tapangale kai laumawmase, la tarwadradrau kai udale, kai nai lrika tapiane kai acegecege ikai latadre. Kikai kaika amaka vavalane maka pwapusalane si maka pangimia patulrepenge, asi lwiyane tapangale kai kiasacepe kai ki pasalrivane.

¹⁴ Ani kamani kai latabebelenge nai ka asusuru ikai Yerusalrime la marasikai kilakikai. La dawlu kwini ki wamwa ki maelane ka zuku si taelrelre ikai kwini ki nikelretane ka vai karedele ki tarasangililuku ki cekeleini si tarasaibaibange kela kai. Lumia kikai, ku Twaumase ku lisianeini ki ngwalai kikai lri ulrau.”

¹⁵ La palraingi makanaelre kikai apangimiane, la kakathane ku lalake ki Asahele ka Yunathange si lalake ki Tikeva ka Yahezi ka kai palraingi; kwini lalasu la ikai ku Misulame si swa Lrivi ka Sabithai ka paralubu liniane.

¹⁶ Kudra siaulri twalai ki taacaicaliane ku laumawmase la makitu tarumara kikai kikake, lakamani ku barakalai ka Izera la patwalai kwini ki kelrete ki tamatama ki lazuku ku umawmase, pacase ku nagane lini. Saka mwasakamangeale ki dramare ki aswalaalanga ki vai, kikai laumawmase la pathagili ciwsa,

¹⁷ ikai ki aswalalanga ki dramare ki aswalalanga ka vai, kwini lalasu la malra kwini ki ngwakai ki marudrange mwa ki ababai ka maelane ka zuku makitu ciwsanga patuelre.

La wamwa ki maelane ka zuku ka ababai karudrange

¹⁸ Kikai lebe amani kudra wamwa ki labaibai ki maelane ka zuku karudrange, Barakalai (singiakai ki zuku), Lamwabaibalrithi ki Yuzadake, kwini zuku ki Yesua si la betakaneini, Masia, Ilriezere, Yaribe si Gidalria.

¹⁹ Kwini lalasu palraingi makakatwase ki labaibai lini, la patarumara ku vaeva ku balase ka nikiubawbalane ka kiu tusapatarumarane, atalingikaiyane liniane mwalra ku pasalrivane.

²⁰ Zuku ki Imere, Hanani si Zebadia.

²¹ Zuku ki Harime, Masia, Ilria, Simaia, Yehile si Uzia.

²² Zuku ki Pasehure, Ilihuinai, Masia, Isemaele, Nathaniele, Yuzabade si Iliasa.

²³ Swa Lrivi: Yuzabade, Simi, Kelaia (mialri ka sia Kilrita), Pithahia, Yuda si Ilriezere.

²⁴ Tarasenai: Ilriasibe. Tarakadrenge ki daane ki Twaumase: Salume, Teleme si Uri.

²⁵ Drumane ka swa Iseraylri: Zuku ki Paruse: Ramia, Izia, Malekia, Miyamingi, Ilriazare, Malekia, si Binaia.

²⁶ Zuku ki Ilame: Matania, Zakaria, Yehile, Abidi, Yeremuthe si Ilria.

²⁷ Zuku ki Zatu: Ilihuinai, Ilriasibe, Matania, Yeremuthe, Zabade si Aziza.

²⁸ Zuku ki Bebai: Yehuhanange, Hanania, Zabai si Atelai.

²⁹ Zuku ki Bani: Misulame, Maluke, Adaia, Yasube, Sile si Yeremuthe.

³⁰ Zuku ki Pahathe Muabe: Adena, Kilale, Binaia, Masia, Matania, Bizale, Binui si Manase.

^31-32 Zuku ki Harime: Ilriezere, Iseya, Malekia, Simaia, Simiune, Biniyamingi, Maluke si Semaria.

³³ Zuku ki Hasume: Matenai, Matata, Zabade, Ilripelete, Yeremai, Manase si Simi.

^34-37 Zuku ki Bani: Madai, Amerame, Ule, Binaia, Bidia, Keluhe, Vanai, Meremuthe, Ilriasibe, Matania, Matenai si Yasau.

^38-42 Zuku ki Binui: Simi, Selemia, Nathange, Adaia, Makenadebai, Sasai, Sarai, Azarele, Selemia, Semaria, Salume, Amaria si Yusepe.

⁴³ Zuku ki Nibu: Yiele, Matatia, Zabade, Zebina, Yadai, Yuile si Binaia.

⁴⁴ Kikai laumawmase amani kudra wamwa ki maelane ka zuku ka labaibai karudrange. Kai lalasu la makitu malra ki lalabaibai si lalalake satedre pakatwase.