Izera 1 - Ngudradreadrekadhane Ka Sisiu 魯凱語聖經

Ku talialalai ka Sairuse wadrekase ki swa Yuda siwlria mwa ki nakuni lini

¹ Ku tinuhika ki swa Perisia ka Sairuse saka taracaili ku taatalialaladhane, ku Tamatama pakai ku apangimiane ku pangukaini ki Yerimia ka yuginsia ku takawrivaneini sakalai, si velevele ku kidremedreme ki Sairuse pulebe kwidra sadrekasane, la pacase si pasatedre mwa kidruanga kwini ki rathuduini ka kuni. Kudra sadrekasane ku lavaga ngimiyaiya kai:

² Kikai yai amani ku drekase ki tinuhika ki swa Perisia ka Sairuse: Ku Tamatama ka yabelenge ka Twaumase wabaai nakwane ku arathudaneli kai kawmasane; pakamani nakwane ku yakai Yerusalrime ka Yuda pasikai iniane cegecege ku taluvaale ku daane ki Twaumase.

³ Ku Twaumase ani tapalra numiane ka kawkawluini. Lri katwase numi mwa Yuda ka Yerusalrime, si tupela tudaane ku daane ki Tamatama ka Twaumase ki swa Iseraylri; amani ku lri ikai Yerusalrime kisukubu ka Twaumase.

⁴ Alaiyasi ikai ki acaicali ka laumawmase, lu kiparalubu lai lri maka dulru siwlri; ku lapasiagiagisi lri paralubu liniane, baai liniane ku kingi gingi, lawbubulu la nilapulapwane, si lri ikai Yerusalrime ki daane ki Twaumase patarumara ku Ngipapalraingini patarumara ka lrisi.

⁵ Kudra tamatama si barakalai ki zuku ki swa Yuda si Biniyamingi si swa Lrivi, si kwidra kiavelevele ku kidremedreme ki Twaumase ngiapapadulrunga makanaelre, lri siwlri mu Yerusalrime tupela tudaane ku daane ki Tamatama.

⁶ Kwidra la pasiagiagisi makanaelre la paralubu liniane, malra ku gingi ka lawbubulu, kingi, lalawbubulu, lanilapulapwane, si drumane ka latakuciacingalre ka lamanemane baai liniane, ku drumane la patukudhana ngibabaai patarumara ku saceacebe ki daane ki Tamatama.

⁷ Ku tinuhika ka Sairuse la malra kwidra namaalra saka talialalai ku Nibukadenezere patwalai Yerusalrime ki daane ki Tamatama ravase, si pikai ki biuini ka kupu si kisi sawlri baai liniane.

⁸ La sikawlu ki taramarasikai ki tacekecekelane ki talialalai ka Mitheredathe ka amani ku marasiakai kikai latakaiyane, kai Mitheredathe la asipi si pacase ala baai ki siwciu ki swa Yuda ka sia Sisebazare,

^9-10 kikai lalawbubulu amani kai nipacasane: Kingi ka lakisi ka sapatarumaramarane 30 Gingi ka lakisi ka sapatarumaramarane 1,000 Kisi ka drumane ka makaelaela 29 Tatitiki ka kingi ka lakisi 30 Tatitiki ka gingi ka lakisi 410 Drumane ka latakaiyane 1,000

¹¹ Ku kisi ka kingi kisi ka gingi; si drumane ka latakaiyane, lu elrelreane 5,400. Kwini acaicali sa twalai Babilunia si kelanga, ku Sisebazare la malra kilakikai takaiyane iluku mu Yerusalrime patuelre.