Isetire 9 - Ngudradreadrekadhane Ka Sisiu 魯凱語聖經

Wamudu ki badha lini ku swa Yuda

¹ Saka mwasaka 12 ka dramare, kwini ki dramare ka Adare ki saka 13 ki vai la darurunga, kikai yai amani kwidra tangimiane ku sapelaelane ki talialalai, mialri ka natakidredremane ki badha ki swa Yuda drepete liniane ka vai. Ai, kwini ki vai, ku swa Yuda wabalrelringa pamalebe liniane.

² Ikai ki kuni palraelre ku taikaiyane yelrelre ki swa Yuda la makitu madaedarepe kudra taikaiyane lini ki inunga ki cekele ki kadaengane, kikaruburu kwidra ki pasana pamatikuru liniane. Ku swainu kidruanga la makitu mukuludru liniane, kadrwa ku wadulru kiecebe liniane.

³ Ku tengatengane, sanaka lamabelenge ki siu, paelre ki lasiwciu, mabelenge ki swakunkwane si kiasikawlu ki talialalai makitwa paralubu ki swa Yuda, asi lwiyane kwini lalasu mwakuludru ki Muredikai.

⁴ Ku mapapangale makanaelre makitwa thingale: Kikainga ku Muredikai amaninga ku yakai ki daane ki talialalai ka amani ku wagemegeme, si kwini pukuini arwadrimadrimana.

⁵ Lakamani kwidra, ku swa Yuda wadulru ngisasingikai ku nau tumane iya lini ki labadha, kwini lalasu arakai ku dramu kikaruburu ki badha lini, papacai liniane.

⁶ Ku swa Yuda pikai cekele Susa papacai ku ta 500,

^7-10 yakai ku lalalake ki Hamange ka tamangeale: Paresandatha, Dalepunge, Asepatha, Puratha, Adalria, Aridatha, Parimaseta, Arisai, Aridai si Vaizatha. Ku Hamange lalake ki Hamedatha, Amani ku badha ki swa Yuda. Ai ku swa Yuda kai wamalra ravase ku latacekecekelane lini.

¹¹ Kwini ki vai, kudra kiapapacai ku yakai Susa la pelaela ki talialalai ku takathane,

¹² ku talialalai la kawriva ki Isetire, “Kai swa Yuda ngwa 500 ku papacai lini pikai Susa sikakathane, paelre ki tamangeale ku lalake ki Hamange. Ala ku talidrumane ki siu, kwini lalasu lri mialri papacai asikalra. Manemaneana ku murikaiyananasu? Ala pelaelaili, lri tara patarumaraku muswane.”

¹³ Ku Isetire la tubalre, “Alaiyasi kipawkalrivilaku kikilibake ki talialalai, ala ani pangimiana luiya ku tapangimiane kaikameane ki yakai Susa ka swa Yuda, si malra kwini tamangeale ku lalake ki Hamange kudra kinawmasane lini takeakelrai pwa ki nicegecegane ka sapathavungane ka ulrudru.”

¹⁴ Ku talialalai la drekase, kwini drekase la pathingale ikai cekele Susa. Kudra wapacainga ka kinawmasane ki tamangeale ka lalake ki Hamange la kelrai pibelenge kwini ki sapathavungane ka ulrudru padredrele ki mapapangale.

¹⁵ Saka mwasaka 14 ki vai ki dramare ki Adare, ku swakai Susa ku la swa Yuda la isarubunga, ikai ki cekele papacai ku 300, ai kwini lalasu thadaalrane kai malra ravase ku tacekecekelane.

¹⁶ Ku la yatali drumane ka siu ku swa Yuda mialri ngicacegecege ku angipapalakebane, kwini lalasu pakai ku amudane ki labadha, si papacai kwidra ki malisi liniane ku laumawmase paelrelrenga ta 75,000, ai kadrwa ku takirimwane malra ku tacekecekelane.

¹⁷ Kikai ku tangimiane amani saka dramare ki Adare ki mwasaka 13 ki vai. Saka samakapusale, ki mwasaka 14 ki vai, kwini lalasu kai papacainga, kwini lalasu la cegecege kikai vai kai ka tangiakanekaneanane kapeaperau.

¹⁸ Kwini swakai Susa ku swa Yuda la pikai ki mwasaka 15 ki vai ku tatulrisisisiane, asi lwiyane kwini lalasu yakai ki mwasaka 13 si 14 ki vai maka pusale papacai ki badha. Ikai ki mwasaka 15 ki vai la idrengere.

¹⁹ Lakamani kwidra, kwini yakai ki la tatitiki ki lacekele ku swa Yuda la pasusu ki dramare ki Adare ki mwasaka 14 ki vai, malranga kikai ka taisadrasadrane tangiakanekaneanane ka vai, si mababaai ku saceacebe.

Tatwaladhane ki lrisi ki Purime

²⁰ Ku Muredikai la malra kikai pacase, si satedre baai ki rathurathudu ki talialalai ka Ahasueruse ka kuni, adravane ka ngwadadethe ka ngwadadaili ka lasiu ki swa Yuda,

²¹ pelaela liniane, ki caicaili tarapasuusu kikai ki mwasaka 14 si 15 ka vai ka tatulrisisisianenga,

²² asi lwiyane kikai nimaka pusalane amani ku taamudane lini ki badha lini ka swa Yuda ka vai, kikai dramare amani ku tamalrane lini pakabalrithi kudra ki takwalriane tubi takasulriane amatiadadalame kiraragai ka dramare. Kwini lalasu lri pasusu kai ki lrisi, kiraragai tulrisisi, maceacebe, si palribulu ki matiakukuru.

²³ Ku swa Yuda la makitu paluludu ku tapelaelane ki Muredikai, lakamani kwidra, kudra tulrisisi kai ki vai laka akakudhanenga lini ki caicaili.

²⁴ Ku labadha ki swa Yuda, ku lalake ki Hamedatha ka swa Agage ka Hamange, nakiadredreme ku kiabubuli amudu ki swa Yuda. Kwini lasu pangwakuzibiki, (Laka sia wakuzibiki ku “Purime”) Si kelrete ku vaeva ku vai, amudu ki swa Yuda.

²⁵ Ai ngwalai ku takitutubiane ki Isetire, ku talialalai la pakatwase ku drekaseini, la ngipapatulisilringa kamani ku Hamange kudra naika atulisiane ki swa Yuda lakamanilringaini si lalalakeini ku kiatakeakelrai ikai ki sapathavungane ka ulrudru.

²⁶ Ala amani kai ku kipasi “Purime”. Ku swa Yuda ngwalai ku tapacasane ku tigami si tangilribatane lini patuelrenga,

²⁷ la ngipapasikai, si lagagane si kwini lri aswa Yuda ka laumawmase kelrete kikai kakudhane, pasusu kudra tapelaelane ki Muredikai, luka caili ngulringalringau kai nimaka pusalane ka vai.

²⁸ Adravane ikai inu ki siu ki inunga ka cekele, kwini la dadadaane ki swa Yuda pakela ki lamwabaibalrithi lrika palralrawthunga pasusu kai ki lrisi ki Purime.

²⁹ Ku lalake ki Abihaile, ka taelrelre ki talialalai ka Isetire la mialri pacase ku vaeva ku tigami, sakai kudra takalabaibadhaneini ki talialalai ku pukuini paralubu ki swa Yuda ka Muredikai kudra pacaseini kudra ngwakai ki lrisi ki Purime.

³⁰ Kikai tigami wabaai ki talialalai ka Ahasueruse kudra ki rathuduini ka tai 127 ka lasiu ka swa Yuda. Ikai kwini ki tigami subulrubulru ki swa Yuda ku akasulivalivatane, akapapedrepedrengane,

³¹ si pelaela liniane si lagagane lini ku atara pasuswane kai nikelretanenga ka lrisi ki Purime, mia liniane lu pasusu laisi si tubitubi kudra ki nikelretane. Kikai amani ku nipaelreane pakaredele ka drekase ki swa Yuda ka Muredikai si labaibai ki talialalai ka Isetire.

³² Kudra drekase ki Isetire tengatenganenga cegecege kudra kakudhane ki lrisi ki Purime, kikai drekase nipacasane ikai ki senate ka nibalrulane.