Isetire 8 - Ngudradreadrekadhane Ka Sisiu 魯凱語聖經

Wabilri ku swa Yuda

¹ Ikameameane, ku talialalai ka Ahasueruse la alra kwini tacekecekelane patuelre ki badha ki swa Yuda ka Hamange pakaelre baai ki Isetire. Ku Isetire la pelaela ki talialalai, ka lritudraneini ki Muredikai. Ku Muredikai twalainga kwini la kipalraingi mudaane mucucubungu ki talialalai.

² Ku talialalai la malra kwini sawlrini patwalai ki Hamange kudra tara ka hange, la baai ki Isetire. Ku Isetire la sudralru ki Muredikai marasikaikai kwini latacekecekelane ki Hamange.

³ Sakabilrilinga ku Isetire la guruthungane ikai cucubungu ki drapale ki talialalai, si takutubitubi kitutubi ki talialalai, ku lrika paisadrane ku naika amudane ki swa Agage ka Hamange ki swa Yuda.

⁴ Ku talialalai la papia ki Isetire sege ku kingi ka ukudruini, ku Isetire la ngidrakale. Iya kai,

⁵ “Lwiyasi kipawkalrivilaku kikilibake ki talialalai, lakakalithi nakwane ku talialalai, pacengecenge la iya kai takitutubianeli, ala pulebea ku sadrekasane, la mwalra kwini drekase ki Hamange. Ku lalake ki Hamedatha ka swa Agage ka Hamange kudra pakatwaseini ku drekase lri amudu ki yakai ki kuni sanaka swa Yuda.

⁶ Nau kailreme drele ki lasakacekeleli lu kiamudu. Lri maka lremeaku drele ki laretesaneli lu kipapacai?”

⁷ Ku talialalai ka Ahasueruse la kawriva ki labaibai ki talialalai ka Isetire si swa Yuda ka Muredikai, “Ala pangimianga kwini! Ngwalai ku naika amudane ki swa Yuda ki Hamange, wamalranga naku iniane takeakelrai papacai, la malra kwini tacekecekelaneini baainga ki Isetire.

⁸ Ai, kudra niarakaiyane ku nagane ki talialalai pakatwase pelaela, nipuhangeane ku hange ki talialalai, ka kaika amaka supilrane mwalra. Ai, palraingaku singikai numi ku kidremedreme numi pakatwase ku sapelaelane ki swa Yuda ka laumawmase, kunumi lri maka dulru numi arakai ku naganeli pakatwase, si puhange ku hange ki talialalai.”

⁹ La ikai ki sakatulru ki dramare, kwini ki dramare ki Sivange ki saka 23 ki vai, ku Muredikai wadawlu ki latarapacase ki talialalai, papakatwase liniane ku sapelaelane baai ki swa Yuda ka laumawmase, si twalai India kela kavai Kuse paelrelrenga tai 127 ka siwciu ki lasiu si la swakai ki kunkwane. Kikai sapelaelane arakai ku lavaga ki swainunga si pacase ki swa Yuda pacase.

¹⁰ Ku Muredikai arakai ku nagane ki talialalai ka Ahasueruse, la puhange ku hange ki talialalai, la pakatwase pelaela, si drekase kwini ki lri satedre ka umawmase ngukai ki rigi ki talialalai katwase kirarimu satedre.

¹¹ Kikai sapelaelane amia kai, ku talialalai palraingi ki lacekele kwini ki la swa Yuda ngicacegecege ku angipapalakebane lini. Adravane ka twalai ki inu ka cekele, kwidra ki vaeva ka kuni ku wakela kikaruburu, kwi lalasu lri dulru bilri kikaruburu, papacai, amudu kwini ki laumawmase, adravane kwini lalabaibai lini lalalake lini lri mialri dulru amudu, si malra ravase kwini tacekecekelane lini.

¹² Kikai sapelaelane nipaelrelreane nguelre ki kuni ki inunga, ikai saka 12 ka dramare, kwini ki dramare ka Adare ki saka 13 ki vai, lri twalainga pangimia ikai kwini ki naika takiamudane ki swa Yuda ka vai.

¹³ Kikai sapelaelane lri pararamau lu pelaela ku hulrice pakatwase pelaela, pathingale nguvavaeva ki inunga ki kadaengane ki siu makitu thingale sanaka umawmase. Lumia kikai, ku swa Yuda lri maka dulru makapadulru, ikai kwini ki vai bilri ki badha lini.

¹⁴ Kwini wasatedre ku tigami pangwakai ku drekase ki talialalai, ngukai ki mariaridare ka rigi ki taitalialalai, katwase kirarimu padaruru pelaela, kikai sapelaelane mialri ikai ki tangadrane ka cekele Susa pulatadre pelaela.

¹⁵ Ku Muredikai sialaimai ku salesese si lrawlrapungu ku sangiragelanane ki mabelenge, la sipalimemelre ku thilalatadhane ka lalasare ka kaimadhane, sipagamucu ku kingi katwase kwini ki daane ki talialalai, kwini kadadalranane ikai cekele Susa swaete ku sakiararagai peravane.

¹⁶ Papia ki swa Yuda, kikai yai tengatenganenga ka matiadadalame, akiraragadhane, akasasane, ka ngwakai ki lrigu.

¹⁷ Ku sapelaelane ki talialalai wadaruru ki lasiu lacekele, la silrigunga ku la swa Yuda, la sueteane ku sakiararagai, ngiakanekaneane makitu telrai ibalriu tulrisisisi. La tapangale ku la swakai kwini ku mwakuludru ki swa Yuda la makitu aswa Yuda kipacase.