Isetire 7 - Ngudradreadrekadhane Ka Sisiu 魯凱語聖經

^1-2 Sakakaiyane, ku talialalai si Hamange la nguselanga mwa kipaelre ku pangikanekane ki Isetire. Sa ungungulu ku bava, ku talialalai la kivaaganga ki Isetire, “Labaibai ki talialalai ka Isetire! Kikai ala pelaelaili, manemane ku akitubianesu, lri tara baadhaku muswane. Lri baadhaku muswane adravane ka pararamau ki kunili mwabangalraku.”

³ Ku Isetire la tubalre, “Lwiyasi ka kiapawkalrivilaku kikilibake ki talialalai, ala palrainga ku taingeane ku akitubianeli. Kiatubiaku pacepa kai niakeli, la mialri pacepe ki niake ki lasakacekeleli.

⁴ Kunaku si lasakacekeleli kiakilangai nai ikai ki lri muniake naiane ka umawmase. Alaiyasi ka kiakilangai nai aduri, lrika kadrwa ku vagali, kainaku lri avavaga ngwalai kikai si vangevange ki talialalai, ai, lri kipakamudu nai, lri matikuru nai kamudunga!”

⁵ Ku talialalai ka Ahasueruse la kivaga ki labaibaini ka Isetire, “Laka aneane ku wathuru pia kwini? Kwini umawmase yakai inu?”

⁶ Ku Isetire la tubalre, “Kikai twalisi kabebetethe naiane ka badha amani kikai mangangace ka umawmase ka Hamange!” Ku Hamange la ikai cucubungu ki talialalai si labaibai ki talialalai kathathiburu kaithingale ku apianeini.

⁷ Ku talialalai la kalisi ngidrakale, la katwase kwini ki tangiakaneanane mulatadre mwa ki babengelradhane. Ku Hamange la patarathingalenga ku talialalai ka lri tara ngwalai kikai si pathavungu iniane, la asuru si idaane kitubi ki labaibai ki talialalai ka Isetire pacepe ku niakeini.

⁸ Ku talialalai satwalai ki babengelradhane siwlri mudaane yai, ku Hamange yacengecenge guruthungane ikai ki maelrelrenge ka taneneane apece ki Isetire kitubitubi ku akikakurwane. La drele ku talialalai kudra tangimiane kikai, la aru kaelaela akwadrau si iya kai, “Kikai umawmase kai sikathuruanenga ikai ki daane ki talialalai picucubungu nakwane tusinalreme ki labaibai ki talialalai?” Sa iya kwini ku talialalai, kudra la kiatinumwalranga ka sasiakawlu la makakai tamenge ki lringau ki Hamange.

⁹ La ikai ku tangea ku kiatinumwalranga ka sasiakawlu ka sia Harebuna, la arucucubungu si iya kai, “Kai Hamange yakaiyana ku darepeini cegecege ikai ki daaneini ku vaeva ku sapathavungane ku abelengane 22 ka mituru, saarakaiyane takeakelrai ki palribulu ki niake ki talialalai ka Muredikai!” Ku talialalai la drekase, “Malra ki Hamange pwa takeakelrai pubelenge!”

¹⁰ Ku Hamange la kimalra kitakeakelrai pwa kwini ki naika arakaiyane pathavungu ki Muredikai ka ulrudru; Ku lisiane ki talialalai ala kirimu idrengere kabasau.