Isetire 6 - Ngudradreadrekadhane Ka Sisiu 魯凱語聖經

Ku talialalai patarwamara ki Muredikai ku lrigu

¹ Saka maungunga, ku talialalai lakai maka kasipelrepelrenge, la drekase ki umawmase malra kudra nipacasane ku lrikisi ki ngwakai ki cekele silrigu pakilalalra iniane.

² Ikai kwini ki nipacasane la ikai ku taipiane ku tamatikaiyane ki Muredikai kudra tapangimianeini pwalra kudra pasana papacai ki talialalai ka Ahasueruse, kikai nikibubuliane laka amani kwini tadrusa ka tarakadrenge ki lrawlrawdru ki tasukusukubane ka kiatinumwalranga ka Bigethana si Tirese ka wakikake.

³ La kivaga ku talialalai, “Pangukai kikai kwidra, manemanenga ku baaili ku lrigu ku taetalane ki Muredikai la iya?” Ku sasiakawlu ki talialalai la tubalre, “Kadrwa ku namanemanenga.”

⁴ La kivaga ku talialalai, “Laka aneane kudra yakai ki daane ki talialalai?” Ku Hamange la icengecenge mudadaane ki daane ki talialalai, pasana kelakela kitubi ki talialalai malra ki Muredikai takeakelrai pwa kwini ki nipadulrwanenga ka sapathavungane ka ulrudru.

⁵ Ku sasiakawlu la tubalre, “Kawvai Hamange yakai kai, mwakalavalava ku akikawrivane ki talialalai.” Ku talialalai la kawriva, “Bwala iluka iniane pudaane.”

⁶ Sa mudaanenga ku Hamange. Ku talialalai la kawriva iniane, “Yakai ku tangea ku apibaaili ku lrigu iniane, lri pangitumanaku marasikai iniane?” Ku Hamange la kidredreme, “Aneanana ku drumane ku lri kibaai ku lrigu ki talialalai? Itara kamaaniaku!”

^7-8 Lakamani kwidra, kwini lasu kawariva ki talialalai, “Kudra apatarumarane ku lrigu ki talialalai, naika pangiamia madu kikai pakalreva iniane, pamalra ki umawmase ku nipatuelreane ku sangiragelanane ki talialalai, la malrana kudra vaeva ka mathaariri ka talrupunu ki rigi si pasitalrupunu.

⁹ Ala drekase kwidra ki matiwsaesakenenga ka mabelenge ki talialalai pangiragelane kai ki umawmase, si pubelenge iniane ki rigi, la arake kwini ki rigi katwase ngithalrilringulu ki cekele. Kwini lalasu lu dadadavace, kwini mabelenge lalri sacucubungu iniane tawtau iya kai, ‘Drela, kai talialalai pangiamia kikai pakalreva ku apatarumaraneini ku lrigu ki umawmase!’ ”

¹⁰ Ku talialalai la kawriva ki Hamange, “Kirimwa malra kwini sangiragelanane ki talialalai si rigi iluku mwa kai, singikai kwini taiyanesu ku asane, la malra kwini lrigu baai kavai ki wanene ikai ki lrawlrawdru ki daane ki talialalai ka Muredikai ka swa Yuda, madha pakakadrwadrwa ku navaevanga!”

¹¹ Ku Hamange la malra kwini sangiragelanane ki talialalai si rigi iluku, la baai pangiragelane ki Muredikai, si pubelenge ki rigi iniane, la arake ki rigi ikai cekele ngithalrilringulu ikai kwini ki kalatadrane, takukatwatwase ikai cucubungu papia ki mapapangale tawtau, “Drela, kai talialalai pangiamia kikai pakalreva ku apatarumaraneini ku lrigu ki umawmase!”

¹² Samaka dadavacenga, ku Muredikai la siwlri mwa ki lrawlrawdru ki daane ki talialalai, ku Hamange la kasalivaalrau guruthunganenga katwase kirarimu mutavanane.

¹³ Kwini lasu la pelaela nguvavaeva ku tangimiamiane ki labaibaini ka Zirise si latalrailragini. Kwini labaibaini si latalrailragini la pelaela iniane iya kai, “Kadrwanga ku adulrwanengasu nau pangitumaneana iya ki Muredikai. Swa Yuda ka lasu, kaisu lri maka tumane ruthuku iniane, ka lasu lri tara panianianiake drele lu kipakamudusu.”

Kiatakeakelrai kipapacai ku Hamange

¹⁴ Kwini lalasu samakawrivarivarivana, kudra kiacapili ki daane ki talialalai ka kiatinumwalranga, pakiararimu ki Hamange ku amwane kipaelre ki tapangiakaneanane ki Isetire.