Isetire 5 - Ngudradreadrekadhane Ka Sisiu 魯凱語聖經

Ku Isetire pangiataleke pasikai ki talialalai si Hamange

¹ Saka samakatulrulu ku talaisane ki Isetire, kwini alisu ngiaragelane ku sangiragelanane ki labaibai ki talialalai si mudaane ki daane ki talialalai, acegecege ikai ki tali daane ki kalatadrane ki daane ki talialalai, si cucubungu ki daane ki taneneane ki talialalai. Ku talialalai la nene ikai ki taetaleini, ku lringauini la cucubungu ki lrawlrawdru ki tasukusukubane.

² Ku talialalai la drele ki Isetire acegecege ikai latadre, la kakuru iniane, la sege ku ukudruini. Ku Isetire la aru cucubungu, la sulrape kwini ki ukudru.

³ Ku talialalai la kivaga iniane, “Labaibai ki talialalai ka Isetire, lritumanesu? Sanaka kitubisu, lri tara baadhaku muswane, adravane ka ngwapararamausu ki kunili, mialri tara badhaku muswane.”

⁴ Ku Isetire la tubalre, “Lwiyasi la kikilibakaku muswane, kusu ka talialalai si Hamange tara kela kaimaungu kavai pasikaili numiane padulrunga ka angitalekane.”

⁵ Ku talialalai la cunu ki umawmase dawlu ki Hamange sara kela iya, ku lrika akipaelreane ki pangitaleke ki Isetire. Ku talialalai si Hamange la karedele kipaelre ngitaleke.

⁶ Saungungulu ku bava, ku talialalai la kivaga ki Isetire, “Sanaka murikaisu, lri tara baadhaku muswane. Adravane ka ngwapararamau malra kai kunili, mialri palraingaku baai muswane.”

⁷ Ku Isetire la kawriva,

⁸ “Alaiyasi ka kiapawkalrivilaku kikilibake ki talialalai, la palraingi ku kitubili, kusu ka talialalai si Hamange luiya kelaana kipaelre kudra pasikaili numiane padulru ku angitalekane. Ikai kwini, nau pelaelanga ki talialalai kudra murikaikaili.”

Pasana papacai ki Muredikai ku Hamange

⁹ Ku Hamange la kiraragai katwase kwini ki tangitalekane. Ai kwini lasu sangukakai ki lrawlrawdru ki daane ki talialalai, la drele ki Muredikai nene ikai kwini kai kirimu acegecege, kadrwa ku natikianenga ku tamusakenane, lakagirimucu turamuru.

¹⁰ Ai kwini lasu wadrepete kwini girimucaneini, la mutavanane, ala dawlu ki la talrailragini mwa liniane, la mialri dawlu ki labaibaini ka Zirise mutaluvaivai.

¹¹ Ku Hamange la dradrarane ku tacekecekelane si lalakeini ka takalra, la mialri matikai ku takimalraneini kipaabelenge ki talialalai, kudra takasilrialribataneini sanaka tabebelenge si lakiacapicapili.

¹² La iya kai ku Hamange, “La kaika ngimiyaiya sikakathane kai, adravane ku labaibai ki talialalai ka Isetire la pawkalrivili pasikai ki talialalai si kunaku pangiakaneane, luiya la lri nguselana nai!

¹³ Ai, sadrelaku kwidra ki swa Yuda ka Muredikai nene ikai ki lrawlrawdru ki daane ki talialalai, lu kidremedremaku kikai ngiradhekanane kadrwanga ku paluludane ikai nakwane.”

¹⁴ Ku labaibaini si la talrailragini makanaelre la kawriva iniane, “Asu kai drekase si cegecege ku taluvale ku tapikaiyane pathavungu ku ubelengane 22 mituru? Luiya luka mialrealre, lanai kawrivasu ki talialalai malra ki Muredikai takeakelrai pibelenge ki sapathavungane. Lumia kikai, lri dulrungasu kiraragai mwa kipaelre ki ngiakaneane.” Ku Hamange mathariri la iya kikai lavaga, la padarepe ki umawmase ku tapathavuthavungane.