Isetire 4 - Ngudradreadrekadhane Ka Sisiu 魯凱語聖經

Ku Muredikai kiatubi ki Isetire ku aparalubane

¹ Ku Muredikai sathingalenga kikai tangimiamiane patuelre, watubi turamuru, la thuriace ku laimai, si sipalimemelre ku kaimadhane, la malra ku abu ngicacabungu, akwadrau tubitubi tungawngau, katwase mwa kavai cekele Susa.

² La kela ki lrawlrawdru ki daane ki talialalai, kai mwa daane, asi lwiyane singikai kudra tinukakudhanane ku sialaimai ku kaimadhane kai lri maka mudaane ki daane ki talialalai.

³ Ku tadarurane ku sapelaelane ki talialalai ki laceekelenga, ku swakai kwini ku swa Yuda la makitu tubitubi. Kwini lalasu walaisi, watubi, karaleale, tapapangale ku siakaimadhane, apece ikai ki abu.

⁴ Kudra marasiakaikai ki Isetire ku labaibai si kiatinumwalranga ka sawvalai la malra kudra tapangimiane ki Muredikai si pelaela ki alisu, kwini alisu la kipakwalri turamuru ku kidremedremeini, la baai ki Muredikai kudra lalaimai, ku lrika amwalrane kwini kaimadhane, ai ku Muredikai kai tarwamara.

⁵ Ku Isetire la dawlu kudra pasikawlu ki talialalai marasikaikai iniane ka kiatinumwalranga ka Hatake kainganai, pamwa iniane drele ki Muredikai kudra tangimiamiane lukamanemane, ani ikai ku ngimiyaiya kikai iya.

⁶ Ku Hatake la mwa kwini ki samamwa daane ki kalatadrane ki daane ki talialalai kikawriva ki Muredikai.

⁷ Ku Muredikai la ngwavavaeva pelaela kudra tangimiamiane, si iya kai, ku Hamange palraingi lwiyasi la malra amudu ki swa Yuda sanaka umawmase, ku drawsulu ki kuni lri arudrima ku makalra ku paisu.

⁸ Ku Muredikai la malra kwidra taingeane kudra nipelaelane ikai cekele Susa, kwini la ikai ku drekase ki talialalai kudra amudane ki swa Yuda. Ku Muredikai la malra kwini sapelaelane ki talialalai baai ki Isetire, si peleala ki alisu kudra la tangimiamiane, animwa mudaane si kitubi ki talialalai amia, si pasikai ki sakacekeleini kitubi.

⁹ Ku Hatake la padarurunga kwini kitubitubi ki Muredikai.

¹⁰ Ku Isetire la sikawlu iniane mailuku ku vagaini padaruru ki Muredikai iya kai,

¹¹ “Kai pwasawvalai labaibai, adravane ka aneane, sanaka kaika padawlu ki talialalai la ngitatukidremedreme mudaane kikawriva ki talialalai, lri tara kipapacai. Kikai yai hulrice, sanaka mapapangale ki kuni, adravane ka takivagane ki talialalai si palraelre ki lacekelenga ku laumawmase makitwa thingale. Ai vaeva ku nipawkalrivilane: Lwiyasi ku talialalai la sege ku kingi ka ukudruini papia ki kai kiadawlu ka umawmase, kwini umawmase kai lri kipapacai. Ai, tara dramarenga ku talialalai kai dawlu nakwane.”

¹² Ku Muredikai la tarumara ku twalai ki Isetire ku vaga,

¹³ la sikawlu ki umawmase mwa pakipapawlringau ki alisu iya kai, “Madha kidredreme capange lu ikaisu ki daane ki talialalai. Ka lrika masulialivatesu ki drumane ka swa Yuda.

¹⁴ Ikai kikai lu kaisu avavaga, kai swa Yuda lri tara patwalai talidrumane kiparalubu, ala kusu si wacekecekelesu lai lri tara kamudu. Aneane ku lri maka thingale, alau ngwalai kaiasasane ala kamani ku kikelretesu alabaibai ki talialalai!”

¹⁵ Ku Isetire la sikawlu ki umawmase pelaela ki Muredikai,

¹⁶ “Lu dawla ki yakai Susa cekele sanaka swa Yuda, la palaisi liniane pasikai nakwane kitubi, makatulrulu ku vai makatulrulu ku awngane kai kanekane kai ungulu, kunaku si layadaane ki talialalai ka labaibai lri mialri pangimia kikai. Ala nau mwa kidrele ki talialalai, kikai yai unu wabalre ki kakudhane, ai lri tara muaku. Lwiyasi la piaku kikai lri tara pacadhaku, ai palraingi kai kidredremeli.”

¹⁷ Ku Muredikai ala katwasenga, singikai ku takitubiane ki Isetire ku vaga katwase pangimia.