Isetire 3 - Ngudradreadrekadhane Ka Sisiu 魯凱語聖經

Ku Hamange pasana amudu ki swa Yuda

¹ Sangilribatenga makapiale, ku talialalai ka Ahasueruse la malra pabelenge ki Hamange ka lalake ki Hamedatha ka swa Agage kamani ku sutu.

² Ku talialalai la drekase sanaka latarakadrenge ki daane ki talialalai, papidruru sukubu papia ki Hamange, ka samusakenane iniane, kwini lalasu la makitu pasusu ku tadrekasane ki talialalai, kathane ku Muredikai ka kai tarwamara.

³ Kwini drumane ka lakiacapili ikai ki daane ki talialalai la kivaga iniane asu kai pasusu ku tadrekasane ki talialalai iya.

⁴ Kwini lalasu lukavaivai la kawriva ku lrika akabalrithaneini, ai kwini lasu kai kialalra, sakabilrilinga, kwini lasu la kibubuli lalrwai pelaela liniane iya kai, “Swa Yudaku ka umawmase, kainaku lri maka papia ki Hamange pidruru sukubu.” Kwini lalasu la katwase pelaela ki Hamange, lri dredrele lulri maka pacepe kikai kakwakudhane ki Muredikai.

⁵ Ku Hamange la thingale ku Muredikai ka kai mwabangalre pidruru sukubu iniane, lakagirimucu turamuru.

⁶ Kwini lasu sathingale ki Muredikai ala ka swa Yuda, la kalritheethenga ku apathavungane, kai ka Muredikai sikakathane, kwini lasu la kikake, ku amalrane papacai amudu sanaka yakai ki kuni ki Ahasueruse ka sanaka swa Yuda.

⁷ Saka tara 12 ka caili ki aswalaalanga ki dramare ku tarathudane ki talialalai ka Ahasueruse, amani saka dramare ki Nisange, ku Hamange la drekase ki laumawmase icucubungu iniane makitu kuzibiki (ku vaeva ku nagane sia Purime), si pilri ku vai ku apangimiane ku kikakeini, kudra nikuzibikane laka amanilringa ki saka 12 ki dramare (dramare ka Adare) ki saka 13 ki vai.

⁸ Ku Hamange la pelaela ki talialalai, “Yakai ku tangeane ka minzuku ku wasarau ikai kidruanga ki kadaengane ki kuni ki talialalai. Kwini lalasu yakai ku kakwakudhane lini, ka makakaela ki drumane ka laminzuku, lakai ka miyaiya kikai kai, adravane kai hulrice ki kuni kai kiarimu pasusu. Lu pacepesu ku la miyaiya kai ku umawmase kadrwa ku akaesadhanesu ka talialalai.

⁹ Lwiyasi mathariri la iyasu ka talialalai, ala pakatwasa ku drekasesu amudu liniane. Lri tara arudrima ku tacekecekelane ki kuni ku gingi ku 340,000 ka kukingi, lrika saarakaiyane ki kuni kaungu.”

¹⁰ Ku talialalai la malra kwini tara ka hange baai ki badha ki swa Yuda ka Hamange ka lalake ki Hamedatha ka swa Agage.

¹¹ Ku talialalai laiya kai iniane, “Kilakikai umawmase si lapaisu lawbubulu lini lrika muswanenga, ku nau pangitumane iyasu ngisasingikaiyanga!”

¹² Saka 13 ka vai ki aswalaalanga ki dramare, ku Hamange la dawlu ki tarapacase, ku apakatwasane lini kwini sapelaelane, arakai kudra arakaikai lini sanaka cekele ka zuku ku vaga si pacase, la satedre baai ki lasiwciu, lasutu, si lakiacapili. Kikai sapelaelane arakai ku nagane ki talialalai pakatwase pathingale, nipuhangeane arakai ku tara ka hange ki talialalai.

¹³ Kudra tarasatesatedre ku pacase la satedre papia ki sanaka cekele ki kuni ki talialalai, ku drekase ki tapacasane yai, ikaiya ki abibiilrilinga ki dramare ki 13 ka vai, papacadha ki sanaka swa Yuda, adravane ka sawvalai ababai tarudrawdrange lavavalake, papacadha patuelre, si malra ribici nguelre ku tacekecekelane lini.

¹⁴ Kwini sapelaelane pathingale ki lacekele, lri ikai ki lacekele papia ki mapapangale pelaela lu kelanga kwini ki vai, lani ngipapadulrunga sanaka umawmase.

¹⁵ Paluludu ku drekase ki talialalai, kikai sapelaelane yakai ki tangadrane ka cekele ka Susa pelaela, kwini wasatedre ku tigami la makitu kisaswarau iluku mwa ki la cekele ki kadaengane. Sa icengecenge kathathibuthiburu ku cekele Susa, ku talialalai si Hamange la nene macacucubungu ungungulu ku bava.