Isetire 2 - Ngudradreadrekadhane Ka Sisiu 魯凱語聖經

Ataelrelre ki talialalai ku Isetire

¹ Sa kabasaunga ku sakaelaelane ki talialalai, la kirimu kabarengerenga ki Vaseti, la ngulringau kudra tabaebalreaneini ku drekase si takipisadraneini.

² Kudra kisudawdalrungaini ka takivagane ki talialalai la kawriva ki talialalai iya kai, “Asalu silapane ku tathaithariri ku tacebeane ku latawvailekelekete?

³ Kusu ka talialalai sikawla ki lakiacapili ki lasiu ki kuni palraelre, padawlu liniane sanaka tathaithariri ka tawvailekete iluku mwa ka tangadrane ki cekele ka Susa ki tali lrilrikudru ki daane ki talialalai, la malra liniane si baai ki Higai ka tamatama ki tarakadrenge ki yakai ki daane ki talialalai ka lalabaibai, la baai liniane ku lasangikakikimane.

⁴ Lubibilrili, kusu ka talialalai lri maka patwalaisu liniane pilri kudra kadadaalamengasu ku tawvailekete. La cegecege iniane ataelrelre ki talialalai, asapawbalrithane ki Vaseti.” Ku talialalai madalame kikai taiyane, la pangimia kwini.

⁵ Ikai Susa, yakai ku tangea ku swakai Yuda ka sia Muredikai. Kwini lasu swakai ki zuku ki Biniyamingi, ka mwabaibalrithi ki Kise si Simi, lalake ki Yaire.

⁶ Ku talialalai ki Babilunia ka Nibukadenezere samalra ravase ki talialalai ki swa Yuda ka Yehuiacingi iluku patwalai Yerusalrime, waravase ku laumawmase, ku lacucungulane ki Muredikai laka kiapaelre.

⁷ Yakai ku kadralra ki Muredikai ka ababai ka sia Isetire, ku Hiburu ku naganeini sia Hadasa, kwini alisu yai mathariri turamuru ka tawvailekete. La ngiesadhane turamuru ku tacebeane. Ku marudrawdrangeini sapacainga, ku Muredikai la malra silalake iniane, lapu pakadrau iniane.

⁸ Sa kela ku bavane ku drekase ki talialalai, takalra ku latathaithariri ka tawvailekete ku kiailuku mwa Susa, ku Isetire mialri ki iluku mudaane ki daane ki talialalai, baai ki Higai ka tarakadrenge ki yakai ki daane ki talialalai ka labaibai.

⁹ Ku Higai la kadaalame iniane, pawkalrivili sirapale iniane, la makakai baai iniane ku sangikakikimaneini si mwakalrivili ku laakaneane, la patwalai ki daane ki talialalai pilri ku tapitu ku labaibai ka yadaane ki talialalai sirapale iniane, si la baai iniane kwini mathaithaariringa ku tapeapecane ikai ki daane ki talialalai.

¹⁰ Ku Isetire la pasalaladha ku taiyane ki Muredikai, kai pelaelaela ki umawmase ku zukuini si la retetesaneini.

¹¹ Ku Muredikai lukavaivai tamasasawlriwlriane ikai ki kalatadrane ki daane ki talialalai, nau thingale ku tangimiamiane ki Isetire iya, dredrele lu lrika ngitwatumane ku angimiane.

¹² Singikai kudra ki takelretane, kwini latawvailekelekete lri tara caili ku tangitatutharirane ngipapadulru ala lri maka kidrele ki talialalai: Kwini ki aswalala ki nitara enemane ka dramare lri arakai ku sasulravane ka lawlau padelreme ki kinawmasane, kwini bibilrili ki nitara enemane ka dramare lri arakai ku sangulrelreme ka lawlau padelreme ki kinawmasane. Sangilribatenga kikai, kwini latawvailekelekete lalri maubalribaalrithi kiluku mwa kidrele ki talialalai ka Ahasueruse.

¹³ Kwini alisu satwalai ki taikaikaiyane ki lamaliali mwa ki daane ki talialalai, lri dulru ngisasingikai ku kadalameini ku sangiragelananeini ku laimai.

¹⁴ Kwini alisu lri ikai ki daane ki talialalai sulai makavale ku awngane, lukakaiyane ki mialrealre ala lri kiluku mwa ki taluvale ki daane ki talialalai, si baai ki Sasegaze ka tarakadrenge ki lalabaibai ki talialalai, luka pawkalrivili ki talialalai kadalame iniane, la sunagane dawlu iniane, kwini alisu kadrwanga ku lrika adulrwaneini siwlri mwa ki talialalai.

¹⁵ Ku lrika amwane kidrele ki talialalai ki Isetire kudra vai wadarurunga. Kwini alisu lalake ki Abihaile, ka makadralra ki Muredikai, ala kisilalakenga ki Muredikai. Sanaka wadrelenga ki Isetire ku umawmase makitwa kadadaalame iniane. Sa darurunga kwini ki amwaneini kidrele ki talialalai, kathane kudra taiyane ki tarakadrenge ka Higai ku tapangimianeini ngiragelane, kadrwanga ku padrima ngiragelane.

¹⁶ Saka tarapitu ka caili si mangeale ka dramare ku takatalialaladhane ki Ahasueruse, amani saka dramare ka Tibithe, ku Isetire la kiluku mwa ki daane ki talialalai.

¹⁷ Ku talialalai la kadalame iniane ka silrialribate ki sanaka tawvailekete, makadrwadrwa ki drumane kikilibake ki talialalai. Ku talialalai la malra kwini gecegece ki taelrelre ki talialalai pasi gecegece iniane, cegecege iniane ataelrelre ki talialalai, mubalrithi ki Vaseti.

¹⁸ La pacungulu, ku talialalai la pasikai ki Isetire pikai ku madrau ku tapangiakaneanane, la dawlu ki latalialalai si lakumuingi kela kipaelre ki ngiakaneane. Kwini ki vai, kwini lasu la pelaela ki sanaka kuni patelrai liniane, si katwaabake pavalavala ku saceacebe.

Palribulu ki niake ki talialalai ku Muredikai

¹⁹ Sakamani kwidra, ku Muredikai la kibaai ku awnganeini ikai ki daane ki talialalai.

²⁰ Ku Isetire la kilalra ku taiyane ki Muredikai, la kai pelaelaela pathingale ki druma ku takaswainwane ku zukuini si laretesaneini. Ku Isetire kialalra ki Muredikai, mararaamau sakalrulaiyana kilapulapu iniane kilalra twabake.

²¹ Sa ikai ki daane ki talialalai kipuawawngane ku Muredikai, yakai ku tadrusa ku tarakadrenge ki lrawlrawdru ki daane ki talialalai ka kiatinumwalranga ka sawvalai: Bigethana si Tirese la kagirimucu turamuru ki talialalai ka Ahasueruse, la kidredreme ku papacai iniane.

²² Ku Muredikai la patarathingale kikai ku akibubuliane papacai, la pelaela ki Isetire ka taelrelre ki talialalai, ku Isetire la pelaela ki talialalai kwini patarathingale ki Muredikai kwini akibubuliane papacai.

²³ Kikai la singibila kivavaga, saka patenganenga, kikai tadrusa la kimalra takeakelrai papacai pikai belenge ki tapathavuthavungane ka angatu. Ku talialalai la drekase malra kikai tangimiamiane pacase pikai ki tapacapacasane ki lrikisi ki swa kunkwane.