Isetire 1 - Ngudradreadrekadhane Ka Sisiu 魯凱語聖經

Piasadra ki labaibaini ka Vaseti ku talialalai ka Ahasueruse

^1-2 Kikai lebe kai laabubulru amani saka zidai ki talialalai ki Perisia ka Ahasueruse. Ku Ahasueruse twalai Susa ka tangadrane ki cekele ka taetalaneini rathudu India, kela kavai Kuse ka talu 127 ka lakadaengane ki siu.

³ Saka taratulru ka caili ku takatalialaladhane ki Ahasueruse, kai lasu la pasikai ki sanaka talialalai si yakunkunkwane pangitaleke tuadrau turamuru. Ku lamabelenge ki kwapingi ki Perisia si Media, si tamatama ki lakadaengane ki siu si latalialalai la makitu kela kipaelre.

⁴ Tara enemelringa ka dramare, kai lasu papia liniane dradrarane ku takaesadhane ki kuni, ngiradhekanane si matisalrwane ki kunini.

⁵ La pacungulu, ku talialalai la pasikai ki tangadrane ka cekele ka Susa sanaka sawvalai, adravane ka maesaesaesai si matiakukuru, yakai ki babengelradhane ki daane ki talialalai pangiakaneane kapeaperau, makapitulu ku vai.

⁶ Kikai babengelradhane arakai ku salesese si lrawlrapungu ka make pangiraeragelane, la arakai ku thilalatadhane ku lalasare ka kaimadhane ka sawculrungane malra kwini make pakerenge pikai ki gingi ka kalathe ikai ki belenge ki ulrudru ka talrise ka lrenege. Ku nidarepane arakai ku kingi si gingi ka tapeapecane ka taetale la pikai belenge ki nidralriane ku lrawlrapungu, duduli, salesese ka talrise ka lrenege si tinukucingalrane ka kalralringidri ki laveke,

⁷ ku saarakaiyane ungulu ku kupu makaelaela ka nitubengeangelradhane ka kingi ka kupu. Ku talialalai kadrwa ku kekeane alra ku ungungulu lini ka talialalai si baai liniane,

⁸ la cunu ki sasiakawlu ki daane ki talialalai, ku angilralraingane ki tangeea ungulu. Ai kai lri vutha.

⁹ La mialri kisasilasilange, ikai ki daane ki talialalai, ku labaibai ki talialalai ka Vaseti mialri pangiakaneane pakapeaperau ki lalabaibai.

¹⁰ Ikai ki samakapitulu ki takapeaperavane, ku talialalai la ngulwadhane turamuru ku taungungulane ku bava, la cunu ki tapitu ka taramarasikaikai iniane ka kiatinumwalranga ka sawvalai ka Mihumange, Bizetha, Harebuna, Bigetha, Abagetha, Zethare si Karekase.

¹¹ Katwase dawlu ki labaibai ki talialalai ka Vaseti pasigecegece ku gecegece ki labaibai ki talialalai kela. Ku labaibai ki talialalai mathariri turamuru ka ababai, ku talialalai nau padredrele dradrarane ki lamabelenge si labadhabadha amia kwini tharirane kwini ki alisu.

¹² Ai, ku kiasikawlu sapelaela ki Vaseti ku drekase ki talialalai, kwini alisu kai tarwamara. Kikai la kagirimucu turamuru ku talialalai, ku lisianeini mia ki kwadaladalai ka apwi.

¹³ Kai talialalai yakai kudra tapiapianeini, sana kipadradresenge ku ngwakai ki hulrice si akarathudane ki cekele, tara kiavagana ki langiathingale ka umawmase, lakamani kwidra kwini lasu wadawlu ku tapiya ku ngiathingale ki lamiyaiya kai.

¹⁴ Kwini masudralrwalrungaini ka la takivagavagane amani kai: Karesena, Sethare, Adematha, Taresise, Mirese, Maresena si Mimukange. Kikai lalasu amani ku tapitu ku mabelenge ki Perisia si Media, ka tangudadeethane ki talialalai, amabelenge ikai ki kuni.

¹⁵ Ku talialalai la kivaga liniane, “Kunaku ka talialalai ka Ahasueruse nasiakawlaku ki kiatinumwalranga ka sawvalai mwa pelaela ku drekaseli ki labaibaili ka Vaseti, kai alisu la kaitarumara kaipasalaladha. Singikai ki hulrice, lri pangitumaneta kai marasikai?”

¹⁶ Ku Mimukange la kawriva ki talialalai si ladrumane ka lakiacapili iya kai, “Kai labaibai ki talialalai ka Vaseti kaika twasinalreme ki talialalai sikakathane, mialri ka twasinalremenga ki latabebelenge si mapapangale!

¹⁷ Kai labaibai makanaelre ki inunga ki kuni sana kilalra kikai tapangimiane ki labaibai ki talialalai lri makitu kirimunga kaitumanemanenga ki lataelrelre lini. Kai lalisu lri makitu iya kai, ‘Ku talialalai ka Ahasueruse wadrekase ki labaibai ki talialalai ka Vaseti mwa kidrele iniane, ai kai alisu kai palraingi.’

¹⁸ Ku lalabaibai ki Perisia si Media sana kilalra kikai tapangimiane ki labaibai ki talialalai, lri makakaai pelaela ki lataelrelre lini kikai miyaiya kai, lri tara pangiracuku ku thathatha ka kaiasipanenga ku upungane si kaika takiragadhane.

¹⁹ Lwiyasi lu kidremedremesu ka talialalai laka mamamwa swadalepe, ala pulebea ku taingeane ku sadrekasane ki talialalai: Twalainga kikai, kai lri maka kikawrivarivanga ki talialalai kai Vaseti, si malra pacase kikai sadrekasane, tuhulrice ki Perisia si Media, kaika apelanenga palralrawthu. La kusu ka talialalai la malra kikai nagane ki labaibai ki talialalai niyane baai kwidra mathaithariri iniane ku ababai.

²⁰ Kudra drekase ki talialalai sapathingalenga pasalraelre ki kuni, kudra sanaka ababai, adravane ku taelrelreini ka matiakukuru, ka maesaesai, lri tara kathariri musakene ki taelrelreini.”

²¹ Ku talialalai si lamabelenge makanaelre la tumathariri kikai taiyane kai vaga, la singikainga si pangimia kikai takawrivane ki Mimukange.

²² Ku talialalai la drekase arakai ku makaelaela ku vaga si pacase pelaela ki swainunga ki lasiu, sanaka sawvalai ka taelrelre naika tamatama ki wacekecekeleini; ku vagaini yakai ku puku ka atarakiusakenane.