Isaiya 9 - Ngudradreadrekadhane Ka Sisiu 魯凱語聖經

¹ Kwi lalasu kiapakatwase si mwa kwidra ki matiaukukuludru ka dradrimitane, kai maka kidringainga ku angukaiyane mubere ki amatikurwane. Ku taikaiyane ki Zibulungu si Napetali ka drusa ka zuku kiatudreadrekase; ai lukabibilrili, kai swa kaikai, amani kikai twalai tali talrawane ki Miditerania ka laveke daruru tali talrawane babiabila ki kadravane Yuredange, paelre kudra taikaiyane ki maelane ka zuku kavai Galrilri, lri malra ku lrigu makanaelre.

Lrika talialalai lukabibilrili

² Ku wacekecekecekele ikai ki dradrimitane ku umawmase wadrelenga ku maadrau ku ledra; kudra nayakaikai ki apacadhane ku umawmase, kaiasasane yakai ku ledra paledra liniane.

³ Tamatama, patarwamarasu baai liniane ku maadrau ku sakiaragai; wadrimasu liniane ku akiragadhane. Ku sakiaragai lini mararamau ki umawmase lu kitaletaleke, la mararamau ki umawmase lu kisupisupilri ku niravasane.

⁴ Asi lwiyane waburawngasu ku sakerengane lini, wangetelengasu ku salrumalrumadhane lini, wacelrangasu ku sadredredrepetane ku ukudru, mararamau kunadruma sa burawsu ki kwapingi ki swa Midiange.

⁵ Ku kece ki mwa cekele kikaruburu, ku eraeradhane ku laimai ka sakikaruburane, lri kilama ki apwi patuelre.

⁶ Yakai ku vaeva ku lrulai ku pasiakai mitane kitulalake! Yakai ku vaeva ka lalake ka sawvalai lri patarumara baai mitane! Kwi lasu lri kela rathudu mitane. Kwi lasu lri kipasi, “Matiasamali ka tarabulrubulru”, “Wadulru sanaka manemane ka Twaumase”, “Palralrawlrawlrawthu ka Tama”, “Rathudane ka talialalai,”

⁷ Ku lrekeme ku taatalialaladhaneini lri aru adiadili; ku kunini lri kisupisupilri ku rathudane apalralrawthu. Kwi lasu lri mucungulu ku taetalane ki talialalai ka Davidi; kwi lasu lri arakai ku aparamaramavane si dringelresane tukarwalai ki arathudane, twalai kaiasasane pakela lumamilringi. Ku Tamatama ka abebeelengenga ki sanaka kwapingi malrithethe ku lrika apangimianeini kikai patuelre.

Ku Tamatama lri pathavungu ki swa Iseraylri

⁸ Ku Tamatama papianga ki mwabaibalrithi ki Yakubu, papia ki kuni ki swa Iseraylri pelaela ku taturingaringavane ku tasaibangane.

⁹ Ku laumawmase ki swa Iseraylri makanaelre, ku yakai ki cekele Samaria makanaelre ku umawmase, lri thiingale makanaelre ala ka paiyanga kai pelaela ku taturingaringavane ku tasaibangane ki Twaumase. Kwi lalasu ngitatwadrau ngikalrilrigu si iya kai,

¹⁰ “Ku niara lringigane ku daane maburukunga, ala tatupela ara lrenege tudaane; ku nitubulriane ara taliwdru ka angatu macelranga, tapela pabalrithi ku mathaithaariringa ka cedare ka angatu tubulri.”

¹¹ Lakamani, ku Tamatama pakagarange ki badha lini kainganai kikaruburu liniane.

¹² Ku swa Siria yakai tali talrawane, ku swa Pelisitine yakai tali sapakalriwgu; manwanganga makanaelre ku ngudwi lri lrungulrungu amudu ki swa Iseraylri. Adravane ka miyaiya kikai, ku lisiane ki Tamatama kai yadrengere; lri ciidingiana ku alrima si lrumai liniane.

¹³ Adravane ku Tamatama ka abebeelengenga ki sanaka kwapingi pathavungu ki laumawmase ki swa Iseraylri, kwi lalasu thadaalrane kai ngitatupela, kai kainganai mucucubungu ki Tamatama.

¹⁴ Ku Tamatama lri ivaivai pathavungu ki tarasangililuku si laumawmase ki swa Iseraylri; ku Twaumase lri calrigi ngetele ki awlru si tawthu lini.

¹⁵ Kwidra tarudrawdrangenga si kiamatikaikai ka umawmase yai amani ka awlru, kwidra kawariva cacapange ka yuginsia yai amani ka tawthu.

¹⁶ Kwidra naika amani ku wasangililuku ki laumawmase waililukulringa ki laumawmase papia ki makawli ka kadalranane, kwini lalasu la aru kangalradangade.

¹⁷ Lakamani, ku Tamatama kai lri palribate ki layacengecenge lutuumane, lai lri kai kakalithi ki lawalibakane si lapakulrulrulu; asi lwiyane ku laumawmase makanaelre ngiasasingikaai ka kadrwa ku ukuludru lini makanaelre, ku kawrivariva lini ku vaga ngialisiane patuelre. Adravane ka miyaiya kikai, ku elathane ki Tamatama lri kai idrengere; ku Tamatama lri ciidingiana ku alrima si lrumai liniane.

¹⁸ Ku ngilisianane ki laumawmase mia ki cecenekane ka angatu ka kwadaladalai ka apwi aru swadradrau, la mia ki kwadarairaisi ka angatungatu, ku ebelre papubebebelenge.

¹⁹ Ku Tamatama ka abebeelengenga ki sanaka kwapingi malisilisinga; ku sapathavunganeini mia ki apwi, palraelrenga kudarairaisi, pakamudu ki laumawmase, ka kadruanga ku asuru.

²⁰ Ikai kidruanga, ku laumawmase salraelrelre silasilape, si maribiribiribici ku akaneane, ai kai maka ngwabaisane; kwi lalasu pakeela ku wakane ki lalake lini!

²¹ Ku swa Manase si swa Iparaime makakaruburu, kwi lalasu la ngielre si kikaruburu ki swa Yuda. Adravane ka miyaiya kikai, ku elathane ki Tamatama lri kai idrengere; lri ciidingiana ku alrima si lrumai liniane.