Isaiya 8 - Ngudradreadrekadhane Ka Sisiu 魯凱語聖經

Arakai ki lalake ki Isaiya tusapatuthingalane

¹ Ku Tamatama amia kai nakwane, “Malra ku vaeva ku maadrau ku baali, si pudriadriingai pacase pibelenge ‘Lri karidare ravase, lri kirarimu ribici’ iya.

² Mwa silape ku matiasudralru ku tadrusa, amani kwidra barakalai ka Uria si Zakaria ka lalake ki Yeberekia, ani kainganai kaamani ka peaelaela siwmi.”

³ La kaiyana tarathainu, la tadrusa nai ki taelrelreli apece; la katawbaliri, si tulalake ku vaeva ka sawvalai. Kwi lalake ka sawvalai sa utaluvaivainga, ku Tamatama la pelaela nakwane iya kai, “Sunagana iniane pasi ‘Lri karidare ravase, lri kirarimu ribici’!

⁴ Kwini lalake lu kaiyana thingale ama ina iya, ku tacekecekelane patuelre ki swa Damasekuse si lawbubulu ka ravase ki swa Samaria patuelre lri kiravase nguelre ki tinuhika ki swa Asiria.”

Ku tinuhika ki swa Asiria lri padaalrunga si kela

⁵ Ku Tamatama peaela iya kai nakwane,

⁶ “Asi lwiyane kikai laumawmase malrase ku tangiabaladhane mwaludru vaalru Siluame, ngiabaalrelringa katwase mwa kathariri ki talialalai ki swa Rizingi si talialalai ki swa Peka.

⁷ Lakamani, kwaku ka Tamatamasu lri ililukaku ki tinuhika ki swa Asiria si lakwapingini kainganai kikaruburu ki swa Yuda; ku takikaruburane lini lri mia ki walrialriau ka acilai kadravane Yuparati, swadrau ku tadrakwasane.

⁸ Kwi lalasu lri mia ki twalai lregelrege lriau ka acilai, si salraelre lriau ki kadaengane, amudu ki swa Yuda palraelre.” Imanuilri, ku Twaumase yakai tapalra mitane! Lri paipai ku sapakepakeini, si palakebe ki kadaenganeta.

⁹ Kunumi ka lakuni, kilalra, lri mukuludru numi, si kasuburu. La swa adaili ka laumawmase, lu katwasa padulru ku akikaruburane, ai lri tara kasuburu! Unu, katwasa padulru ku akikaruburane! Ai lri tara kasuburu!

¹⁰ Madrekadrekadrekasa, ai kai lri maka ngimia; iruburubwa si mapelaelaela, ai kadrwa ku angimiane, asi lwiyane yakai tapalra mitane ku Twaumase.

Ku Tamatama pakiapapawlringau ki yuginsia

¹¹ Ku Tamatama sakai ki madrau ki pukuini si pakipapawlringau nakwane ku kaika atupapalrane ku tangukakaiyane ku kadadalranane kikai ki laumawmase. Ku Twaumase amia kai,

¹² “Madha kipaelrelre kwini kai mathariri kwi tamadrekadrekasane lini; kwidra mukuludru lini, madha mukuludru, madha kakiwcu.

¹³ Tara pulringava nakwane ka Tamatama ka abebeelengenga ki sanaka kwapingi ka sanianiangenga; kathanaku ku naika amukuludranesu si akakiwcanesu.

¹⁴ Asi lwiyane saniangaku matiukuludru, miaku ki vaeva ka lrenege, lri patubakebake ki takaalra ki umawmase; miaku ki vaeva ka arai, ka pwaaradhane ki cekele ki swa Yuda, swa Iseraylri, si laumawmase ki Yerusalrime.

¹⁵ Takaalra ku laumawmase kulri kipatubakebake. Kwi lalasu twabakebake si kadula; kwi lalasu kia pwaaradhane, si kipwalra.”

Madha kitubitubi si kivagavaga ki wapacai ka umawmase

¹⁶ Lasituli, lri malra numi balrulu kwidra baai nakwane ki Twaumase ku sabulrwane, la pangimia ku hulriceini.

¹⁷ Ku Tamatama ikai cucubungu ki kawkawluini ngiapapaidringi, ai lri kathadalranaku satalu iniane, si pikai iniane sudralru ku sidramadramali.

¹⁸ Kwaku si lalalakeli ka patarumara baai nakwane ki Tamatama, ikai ki swa Iseraylri amani nai kudra panianianiake ka matiakiragai ka vaga ki amani ka wanene ikai ki taetalane Ziyungu ka Tamatama ka abebeelengenga ki sanaka kwapingi.

¹⁹ Lu ikai ku kiatubi numiane, lu kivaga ki kavai la swabulrubulrubulru kavai taraivigi si lasilrilrigu lu iya; kwini lalasu lri iya kai, “Kai laumawmase lri tara papia ki makaelaeela ki aidridringane kivaga, pasikai ki panianianiake ka umawmase kivaga ki wapacainga ka umawmase.”

²⁰ Kunumi amia madu kai tubalre liniane, “Kilalra ku sabulrwane si hulrice ki Twaumase! Maadha kilalralalra si patupapalra ki taraivigi si silrilrigu; kudra lakawrivariva lini kadrwa ku apakaesadhane numiane.”

Lu ikai ki matikurwane

²¹ Kai umawmase lri ikai kidruanga acaicaicali, lri kipadradresenge ku sulriane, ku silravane. Lu icengecenge kasilrau, kwi lalasu lri kalisi si pusu ki talialalai si Twaumase lini. Lai lri paswabelenge,

²² lri drele lebe. Ai kai maka wadrele ku manemane, kathane ku akipakwalriane si dradrimitane.