Isaiya 7 - Ngudradreadrekadhane Ka Sisiu 魯凱語聖經

Takawrivane papia ki talialalai ka Ahaze ka vaga

¹ Saka talialalai ki swa Yuda ku Ahaze ka lalake ki Yuthame ka agane ki Uzia, kiarimu makaruruburu. Ku talialalai ki swa Siria ka Rizingi si lalake ki Remalia ka Peka ka talialalai ki swa Iseraylri ngiaelre, si kikaruburu mu Yerusalrime, ai kai maka wamalra kai ki cekele.

² Sa kainganainga mwa ki kadaengane ki swa Iseraylri ku kwapingi ki swa Siria yakai ku peaelaela ki talialalai ki swa Yuda, ku talialalai si mapapangale la mukuludru turamuru, ku kidremedreme lini mia ki ricingi ki angatu ka kwavalrivalrigi ngipalrivaevange.

³ Ku Tamatama la iya kai ki Isaiya, “Iluka ki lalakesu ka Siare Yasube si katwase kikawriva ki talialalai ka Ahaze; kwi lasu yakai sadradradha ki baibaiyu ka tangadrane ki siru, papia ki takauawngane sinau ki makalrilau ka maadrau ka kadalranane.

⁴ Lu pakipapawlringava iniane, ku lrika adradrelaneini, si kai mukuludru. Ku Rizingi ka talialalai si kwapingini ka swa Siria, si lisiane ki talialalai ka Peka ka paramiamiya ki ebelre ki drwadrusa ka angatu ka kwalama.

⁵ Ku talialalai ki swa Siria si swa Iseraylri maelre, tengatengane ka yakai ku apiane lini ku ngialisiane.

⁶ Kwi lalasu kiadredredreme ku amucekelane ki swa Yuda, si vutha ki laumawmase ki swa Yuda pasalaladha liniane, ala lri patupapalra cegecege paatalialalai ki lalake ki Tabele.

⁷ “Ai kwaku ka abebeelengenga ka Tamatama amiaku kai pelaela, kwini madrekadrekadrekase lini kwi ngialisiane kai lri dulru ngimia lutumane.

⁸ Asi lwiyane, kai Damasekuse tangadrane ki cekele ki swa Siria sikakathane; kai talialalai ka Rizingi tamatama ki swa Damasekuse sikakathane; kadrwa ku tawkalrivilane. Kikai ngwakai ki swa Iseraylri, ikai kai ki nitara 65 ka caili lri mialri kipamalebe, si kamudu ku cekele.

⁹ Kai Samaria tangadrane ki cekele ki swa Iseraylri sikakathane; kai talialalai ka Peka tamatama ki swa Samaria sikakathane; kadrwa ku tawkalrivilane. “Alaiyasi kai kakecenge kwi salrwane numi, kai numi lri maka padrumulru.”

Sapatuthingalane ki Imanuilri

¹⁰ Ku Tamatama la peela iya kai ki talialalai ka Ahaze,

¹¹ “Naika papiasu ki Tamatama ka Twaumasesu kitubi ku vaeva ka sapatuthingalane; kwini sapatuthingalane alau twalai swadriadringi, alau twalai belenge.”

¹² Ku Ahaze la iya kai, “Ini, kainaku lri kitubi ku sapatuthingalane; kainaku lri maka kituthiathingale ki Tamatama.”

¹³ Ala iya kai ku Isaiya, “Lagagane ki Davidi, kilalra. Lri kamani numi kudra pakasakwakwa ki umawmase, lai pakasakwakuana numi ki Twaumase?

¹⁴ Ku Tamatama lri ngikakamani patarumara numiane ku vaeva ku sapatuthingalane; yakai ku tawvailekete kulri katawbaliri si tulalake ku sawvalai, lai lri sunagane ki lalake pasi ‘Imanuilri’.

¹⁵ Kwini lalake lu thingalenga drele ku pacengecenge si kai pacengecenge la pilri ku mathariri cilri ku malisi, kwi lasu lri sitaleke ku mireke si valu.

¹⁶ Adravane kwi lasu sakaiyana dulru drele ku pacengecenge si kai pacengecenge, kudra kadaengane ki cekele ki tadrusa ka ngikararakacane ka talialalai lri aubulane palraelre.

¹⁷ “Ku Tamatama lri pulebe si baai muswane, ki kawkawlusu, ki latalialalai makanaelre ku amatikurwane; kikai miyaiya kikai kai amatikurwane, twalai ku tasingikaiyane Yuda katwase kitukudha ki swa Iseraylri, kadrwana ku tamiane kai; kwi lasu lri pamwa ki kadaenganesu ki tinuhika ki swa Asiria.

¹⁸ “Lukamaninga kwidra, ku Tamatama lri thevece dawlu ki swa Izipiti kainganai, mia ki alralregele twalai adaidaidaaili kavai vaalru Nile; kwi lasu lai lri dawlu ki swa Asiria twalai ki kadaengane lini, lri mia ki tumu ka sigu.

¹⁹ Kwi lalasu lri kalrungulrungu kainganai, si suete ki valrwalru lregelrege, ki lalibi barungulu lregelrege, si alrisapesape; kwi lalasu lri kabungu ki sanaka cecenekane ka angatungatu si sanaka ububulane.

²⁰ “Lukamaninga kwidra, ku Tamatama lri patwalai babiabila Yuparati kadravane dawlu ki taragulrugulrugulru ka tinuhika ki swa Asiria. Kwi lasu lri kiriti ki ngisingisi numi, lai lri kiriti patuelre ki isiu numi, si lrubace patuelre ku ubale ki kinawmasane numi.

²¹ “Lu kamani kwidra, adravane ka tarakawaungu lrika vaevanga ku pikai lini ku tikiyane ku lwange si drusa ku kiu,

²² ku mireke lini lri makakelrete lapu iniane. Sanaka waudripi ikai ki tamatikurwane ki cekele lri ikaai makanaelre ku akaneane lini ku mireke si valu.

²³ “Lu kamani kwidra, ku walredreke ku talukudrulu ku budu, si ka mathariri ka babududu ka naika kudrulu ka gingi papubebelenge ku kucingalrane, lri mialri cebe suete ku cecenekane ka angatu;

²⁴ ku umawmase lri iluku ku bu si lraili lai lri mwa adringi alupu. Lu kamani kwidra, lrika ubulunga salraelre ka cecenekane ka angatu,

²⁵ kunadruma kudra tapawtaletalekane kudra lalrelrelrege, kikainga swaetenga ku cecenekane ka angatu, kadrwanga ku umawmase ku mwabangalre mwa kwini, laka tapagwagwaguanenga ki lalwange si kiu.”