Isaiya 66 - Ngudradreadrekadhane Ka Sisiu 魯凱語聖經

Ku Tamatama wasaibange ki sanaka kuni

¹ Ku Tamatama amia kai, “Kai subelebelenge yai taetalaneli, kai kadaengane yai tapudrapalaneli. Lri dulru numi tungitwatumane ku daaneli, si baai ku manemane ku taisadrasadraneli?

² Ngiakakamaniaku bekace kai lepawngane sanaka maneemanenga! Siarapalaku ki ngiatatwalebe si ngitatasiwlriwlri ngitatupela ku umawmase, la kadalamaku ku kialalra pasalaladha ku vagali ku umawmase.

³ “Ala kudra langumawmawmase, kwi lalasu ngiasasingikaai ku nau pia iya lini. Kwi lalasu ani ka waculu ku lwange si tusapatarumarane, ku arakai ki umawmase tusapatarumarane, ikai ki lalasu thadalrane. Kwi lalasu lu patarumara ku tikiyane ku kiu, lu papacai ku vaeva ku tawpungu, ku Taleke ka lrisi, ku patarwamara ku erai ki beke, ku walama ku sangwalreme ku papia ki samiamiange inulri, kadrwa ku tamakaelaelane. Kwi lalasu kwi lri tara kiragai arakai ku matiavalracevace ku tapiane sukubu.

⁴ Lakamani, lri pulebeaku ku kakikiucunga lini ku amatikurwane. Asi lwiyane lu tawtavaku dawlu, kwi lalasu kai twabalre; lu kawrivaku, kwi lalasu kai kialalra. Kwi lalasu waraanau kai pasalaladha nakwane, la pia ku kalraseli.”

⁵ Ku mwasakene mukuludru ki Tamatama, kunumi kilalra ku vagaini. Ku Twaumase amia kai, “Asi lwiyane patengatengane kwi kidremedreme numi nakwane, kwi sakacekele numi yakai kwi lamalisi numiane, si kai mwamwanga numiane. Kwi lalasu mwalralrakai numiane, si iya kai, ‘Ku Tamatama numi ani pathingalane ku takasanianganeini, la nai dredrele luka thaininu ku sakiaragai numi!’ Ai kwi lalasu lri tara kiarubuane!

⁶ Kilalra! Ikai ki cekele yakai kwi lingau kwi mangariangiangi; kwini yai twalai ki daane ki Twaumase kainganai. Ka lingau ki sapathavungane ki Tamatama ki badha!

⁷ “Ku saniange ka cekeleli lri mia ki tangeea ka kai kiangeange si la tulalake ka ababai;

⁸ Wadrelenga numi kialalranga numi ku miyaiya kikai ku matisamaliane? Yainu kudra kuni ku yavaivaai, si makakaai kitulalake? Ai ku Ziyungu kailri kiarakai ku maulai ku akwalriane si ki pacegecege.

⁹ Adravane kelanga ki satulalalake ku kawkawluli kailri maka patulalake madha iyaiya nakwane.” Ku Tamatama amianga kikai kawriva.

¹⁰ Lri taelre numi ki swa Yerusalrime kiraragai! Sanaka madalame kikai ki cekele ku umawmase naika kiararagai iniane makanaelre! Kunumi ka napasiakai iniane tubi ka umawmase, kikainga taelreanga iniane kiraragai!

¹¹ Kunumi kiraragadha kisupilri ku tangiradhekananeini, mia ki lrulai ka kiaibibi ki tina si thuthuthu.

¹² Ku Tamatama amia kai, “Lri pakauladhaku numiane pangiradhekane; ku tacekecekelane ki sanaka kuni lri mia ki vaalru ka mwalwaludru kai kadrekadrekare ka acilai mwa numiane kwini; lri mia numi ki tangeea ka amani ku tina ka ngiakakamani pathuthu ki lalake, si kibibi ikai ki tina la kiswaswasulrape kithalralrai.

¹³ Lri ikaiyaku Yerusalrime sasasa numiane, mia ki tina sasa ki lalakeini.

¹⁴ Lu drele numi ku tangimiane kikai patuelre, lri kiraragai numi; lri kathariri kwi kinawmasane numi si ngiradhekane. Lukamaninga kwidra, lri thingale numi nakwane ka Tamatama ka ngiakakamani paralubu ki pasalaladha nakwane ku umawmase; ai papia ki badhali lri kalisiaku.”

¹⁵ Drela, ku Tamatama lri iluku ku apwi kainganai; ku Twaumase lri mubelenge ikai ki paridi ki alrilrawgu si kainganai pathavungu ki wariciu pakalisi iniane ka umawmase.

¹⁶ Ku Tamatama lri arakai ku apwi si dramu la pathavungu makanaelre ki pasalriu ka umawmase; takaalra ku umawmase kulri kipathavungu kipapacai.

¹⁷ Ku Tamatama amia kai, “Kwidra paiya ku tapiapiane tulrisi ngibabula ki maelane ku takisuswane ku umawmase, kudra la watilibi mwa kudra ki ‘Saniange ka babengelradhane’ Niyane si kane ku butulu, ku beate ki tila, si kudra drumane ku matialrase ka akaneane ku umawmase, ku alikaiyane lini ku vai wakelanga.

¹⁸ Wathingalaku ku kidremedreme si kakwakudhane lini. Lri payelrelreaku ki laumawmase ki sanaka kuni. Kwi lalasu lu yelrelrenga, lai lri drele ku lriguli,

¹⁹ Lai lri thingale kudra pathavungu liniane ala ka amaniaku. “Ai, lri suraku kau tapiya ku umawmase, si sikawlu liniane mwa ki lakuni si la swa adaaili; ku laswakai kikwini ku umawmase kaiyana kialalra ku naganeli, kadrwana ku umawmase ku wadrele ku lrigu si pukuli. Lri pakatwasaku sikawlu kudra laabalu ku umawmase mwa ka Taresise, Libia, kiamatikaikai ku talrailrailane ka Lidia, Tubale, si Gurike. Kwi lalasu lri ikai kikai ki kuni pelaelaela ku lriguli.

²⁰ Lu siwlringa kainganai, kwi lalasu lri twalai ki lakuni ililuku ki sakacekele numi, tusaceacebe si baai acebe nakwane. Ku kainganai iluku ki lalasu ku laumawmase lri ngurigi, ngungiririgi, ngulrakeda makanaelre, lri ngukai ki sakikaruburuburane ka palridingi si sasalrisalriane ki lawbubulu ka palridingi si mwa ki saniange ka lregelregeli, mararaamau ki swa Iseraylri lu malra ku mabula ku takaiyane si mwa ki daane ki Twaumase la patarumara ku Taleke ka lrisi.

²¹ Lri cegecegaku ikai liniane ku la lri abarakalai si Lrivi ka umawmase.

²² “Mararaamau ku tabekacaneli ka bavane ka subelebelenge bavane ka kadaengane kalri ikai palralrawthu, ku lagagane numi si nagane numi lai lri kawlai kimatikaikai.

²³ Ikai ki dramadraamare ki aswalalanga ka vai si Taisadrasadrane ka vai, ku laumawmase ki lakuni lri kainganai makanaelre mu Yerusalrime sukubu nakwane.” Ku Tamatama amia kikai pelaela.

²⁴ “Kwi lalasu lu katwatwasenga yai lri drele kudra ki lawabaebalre nakwane ku laumawmase ka wapacainga ka kinawmasane. Kwini wakanekane ki kinawmasane lini ka laekai kai lri pacai palralrawthu; ku walamalama liniane ku apwi kai lri kaedrepenga palralrawthu. Kai kiacaebe belenge kai umawmase makanaelre lri kalrase si cilri liniane.”