Isaiya 65 - Ngudradreadrekadhane Ka Sisiu 魯凱語聖經

Ku Twaumase pathavungu ki wabaebalre ka umawmase

¹ Ku Tamatama amia kai, “Lri makakaaiyaku tubalre si palraingi ku kitubi lini, ai kwi lalasu kai kiatubi. Mwakalavaku ku akelane lini silape nakwane, ai kwi lalasu kai wakela. Adravane ka tatawtawtaavaneli, ‘Yakaiyaku kai, lri palribulaku muswane’ iya. Ai kikai yai amani kwidra kai papia nakwane inulri ka kuni.

² Lri makakaaiyaku tarumara ki wabaebalre nakwane ka kawkawluli, ai kwi lalasu makawlukulunga ngisasingikaai, piapia ku nau pia iya lini ka tangeangeea.

³ Kwi lalasu yacucubungu nakwane, kai telrai pakagirimucu nakwane. Kwi lalasu yakai ki ‘Saniange ka babengelradhane’ iya lini patarumara ku waudriwdripi, yakai ki tapatarumaramarane ki maelane ku takisuswane lama ku sangwalreeme.

⁴ Lukamaungu, kwi lalasu wamwa ki barungulu si tadralredralrekane si papia ki abake ki wapacainga ka umawmase kivavavaga. Kwi lalasu wakane ku butulu, la ungulu ku base ki nipatarumaranenga ka beate,

⁵ Ala iya kai ki palrapalra, ‘Madha dedethe naiane; mabula nai turamuru ka kaika atakelakelane.’ Kainaku wabeserenga kwi kakwakudhane lini; ku akalisianeli liniane mia ki apwi ka kai lri kaedredrepe.

⁶ “Malrithethenga naku ku apangimiane pathavungu liniane; maka wapacasenga naku ku tatupasalrivanane ku hungu. Kai nau lri pacepe liniane lutuumane.

⁷ Lri ngwaladhaku ku tapasalrivane lini si cucungulane lini si bilri liniane. Kai lalasu yakai lregelrege ki biu lama ku sangwalreme, la ikai kwini tulilisi nakwane, lakamani lri singikaiyaku ku takangangane lini pathavungu liniane.” Ku Tamatama amia kai pelaela.

⁸ Ku Tamatama amia kai, “Kadrwa ku umawmase ku wadredredre kabebetethe ki mathariri ka budu; kwi lalasu lri arakai ku mathariri ka budu tubava. Lri mialriaku kai amudu makanaelre ki kawkawluli; lri palribulaku kudra ki lapasiakaikai nakwane ku umawmase.

⁹ Lri patarumaraku baai ku akaesadhane ki swakai ki Yuda ka zuku ka swa Iseraylri; ku lamwabaibalrithi lini lri tarumara mucungulu ki lregelregeli. Kwidra lapasiakaikai nakwane kudra pinilriane ka laumawmase lri ikai kwini.

¹⁰ Kwi lalasu lri sukubu nakwane, lai lri ikai sapakalriwgu Sarungu ka dratane pagwagwagu ki kiu, ikai talrawane ki ‘Amatikurwane ka valrwalru’ pagwagu ki lwange.

¹¹ “Ai, makakaela numi ka matwase cilri nakwane ka Tamatama ka laumawmase. Twadrekase numi Ziyungu ka saniange ka lregelregeli, la katwase sukubu ki Gade si Mini ka latwaumase ki amusadhane si angimiane.

¹² Kiasalrunga numi kalri pacai ikai ki lrabu, si ngisarade pacai; asi lwiyane lu dawlaku numiane, kai numi twabalre; lu kawrivaku kai numi kialalra. Waraanau lringa numi kai pasalaladha nakwane, si pia ku kaika kadalameli ku ngialisiane.

¹³ Lakamani, lri pelaelaku numiane ka abebeelengenga ka Tamatama, sanaka mwasakene sukubu nakwane, pasalaladha nakwane ku umawmase lri tara ikaai ku amakakelretane ku akaneane, ai kunumi lai lri kasilrasilrau numi si kakadhakadhame. Kwi lalasu lri kirararagai, ai kunumi lri kiaruburubuane numi.

¹⁴ Kwi lalasu lri senasenai kiraragai, lai lri kwalrialri kwi kidremedreme numi si tubitubi, kiangeangeange si karalealeale.

¹⁵ Ku pilrili ka laumawmase lri malra kwi nagane numi si tusapuswane. Kwaku ka abebeelengenga ka Tamatama lri pikai numiane ki apacadhane, ai ku pasalaladha nakwane ku umawmase, lri patarumaraku liniane ku bavane ku nagane.

¹⁶ Ikai kai ki kadaengane, sanaka kiatubitubi ku akaesadhane ku umawmase lri mwa makanaelre cucubungu ki twakapatengatengane ka Twaumase si kitubi. Sanaka lri kiketekete ku umawmase lri pangukai ki twakapatengatengane ka Twaumase kiketekete. Asi lwiyane ku siaswalane ku makucingalre kiakarimurunga patuelre, maulrawnga.”

Bavane ka tabekacane

¹⁷ Ku Tamatama amia kai, “Lri bekacaku ku bavane ku subelebelenge bavane ku kadaengane. Ku lasiaswalane kiakarimurunga patuelre, kadrwanga ku asuru.

¹⁸ Lri ngwalai numi ku tabekacaneli patuelre si kirararagai palralrawthu. Ku bekaceli ku bavane ka Yerusalrime lri suete ku sakiaragai, ku yakai ki cekele ku laumawmase lri kiraragai.

¹⁹ Kwaku lai lri mialriaku ngwalai Yerusalrime si yakai ki cekele ka laumawmase si kiraragai. Ikai kwini, kadrwanga ku atubiane, kadrwanga ku atubiane karaleale.

²⁰ Ku lavavalake kai lri pacai; ku tarudrawdrange lai lri kalragi ku niake. Ku panianiake pakela ki taraidai lavavalakeana; ku kaiyana wakela ki taraidai la pacai kiapusunga nakwane lri iya madu.

²¹ Kwi lalasu twadaane, la ngimamwa ikai; kwi lalasu walredreke ku budu, la ngiaungulu ku tubava lini.

²² Kwi lalasu kai lri pamudaane ki palrapalra ki daane lini, lai kai paungulu ki palrapalra ku bava lini. Ku kawkawluli lri ngimia ki angatu kalragi ku niake. Kwi lalasu lri kawlai kisupisupilri ku kaungu lini.

²³ Ku piapia lini patuelre lri tara ngimiya; ku lalalake lini kai lri kipadradresenge ku amatikurwane. Lri patarumaraku baai ku akaesadhane liniane si mwabaibalrithi lini.

²⁴ Kwi lalasu lu kaiyana kitubi, palrainginga naaku; kwi lalasu lu kaiyana maka inulri, kialalranga naaku.

²⁵ Ku tawpungu ubulane si kiu lri taelre kanekane ku lamanemane; ku raiyungu lri mia ki lwange kane ku ubulu; ku sulrau kai lri dulanga ki umawmase. Ikai Ziyungu ka saniange ka lregelregeli, lri kai ikainga ku akadulane ku ngialisiane.” Ku Tamatama amia kikai pelaela.