Isaiya 64 - Ngudradreadrekadhane Ka Sisiu 魯凱語聖經

¹ Tamatama, asu kai malra thirace kai subelebelenge, si ngikakamani mwa kai kawmasane? Kai latabebelenge ka lregelrege lu drele muswane lri manugiligili.

² Lri manugiligili, mia ki sawngulane ka ngiathathwathuku ibelenge ki madrareange ka apwi. Ala papia ki badhasu padrelane ku pukusu, lani manugiligili ikai cucubungu muswane sanaka kuni!

³ Kunadruma namwalebengasu, si pia ku mukuludru ki umawmase ku awngane; kikai yai kaika maka paima nai. Kai latabebelenge kai lregelrege lu drele muswane manwagiligili.

⁴ Kadrwana ku umawmase ku wadrele ku kialalra ku miyaiya muswane ka Twaumase. Kadrwa ku drumane ku twaumase ku napasiakai ki mauawngu iniane ku umawmase pia ku madrau ka awngane.

⁵ Tarwamarasu kudra ki latarapiapia ku mathariri, si kai marimurimuru ku bulrusu ka umawmase. Papiasu naiane kalisi, la padrumudrumulrwana nai pasalriu; adravane kagirimucusu kalisi, pasalrisaalriwana nai kudra pasalrisalriwnga ki umawmase twalai kunadruma.

⁶ Yakaai kai pasalrivane nai makanaelre, adravane kai mathaithaariringa kai kakwakudhane nai mialri ka miyaiya ki makudrulru ka papuripuricane ka laimai. Ngwalai ki pasalrivane nai, miata ki rudawdame ka vasau ka kiapalai ki valrigi.

⁷ Kadrwa ku umawmase ku papiapia muswane inulri; kadrwa ku umawmase ku papiapia muswane kitubi ku akipalribulane. Ngwalai ki pasalrivane nai, kaisu pwalringau naiane; wacilringasu naiane.

⁸ Ai, Tamatama, amanisu ku tama nai. Mia nai ki dumulu, la miasu ki taratudilrudilrungu; wadarepesu naiane.

⁹ Tamatama, madha kagirimurimucu kalisi naiane; madha kawlawlai ka tangulringaavane kai pasalrivane nai. Kawkawlu nai muswane makanaelre; kakalitha naiane.

¹⁰ Kwini saniange ka cekelesu ka Ziyungu aubulanenga matisepele; kwi Yerusalrime atawlrakavanenga.

¹¹ Kudra sanianiangenga, mathaithaariringa ka daane ki Twaumase, ka nataikaikaiyane ki cucungulane nai kwini drengedrengere muswane, kialamanga kikabebetethe. Ku nakadalame nai ka taikaikaiyane kiakabebetethenga patuelre.

¹² Tamatama, kilakikai patuelre kai maka wavelevele ki kidremedremesu? Tamatama, kaisu lri kela si palribulu naiane? Kai nai wabeserenga kikai akwalriane.