Isaiya 63 - Ngudradreadrekadhane Ka Sisiu 魯凱語聖經

Ku Tamatama pamalebe ki sanaka kuni

¹ “Kudra twalai cekele Buzera ikai Idume kainganai yai aneane? Kavai sialaimai ka duduli ka palimemelre ka mathariri aneane? Kavai matiangeange ka papiapia cucubungu adiadili yai aneane?” “Amani kwidra yakai ku madrau ka puku palribulu ka Tamatama; ka wakela pelaela ku tapamalebeaneini.”

² “Ani silaimai ka duduli ka palimemelre, mia ki waiki tubava ku budu ka umawmase?”

³ Ku Tamatama twabalre, “Wadradredreaku ki sanaka kuni, mia ki waiki ku budu; kainaku mwarikai ku akiparalubane ki umawmase. Yakaiyaku ki girimucane dradredre liniane; si kabebetethenga liniane; ku erai lini salraelre ki laimaili.

⁴ Malrithethenga naku, ku apalribulaneli ki kawkawluli ku vai wakelanga; ku apathavungane ki badha ki kawkawluli ku vai wakelanga.

⁵ Masamaliaku, anika kadrwa ku umawmase ku wakela paralubu nakwane, ku wakela pakakecenge nakwane? Kai girimucaneli arwa pakakecenge nakwane; ngiakakamaniaku kikaruburu si pamalebe.

⁶ Yakaiyaku ki girimucane si dradredre ki sanaka kuni, la kabebetethenga liniane; pamwaludraku ku erai lini mia ki kadravane.”

Ku Tamatama kialibake ki swa Iseraylri

⁷ Lri matikaiyaku ku sakialibake ki Tamatama; lri drengedrengeraku iniane ku tapiane ikai ki kinawmasane nai. Ku Tamatama yakai ku kilibakane pacepe si kai lri akabalrithi ka sakialibake, ku Tamatama lri pakakaalra patarumara ku akaesadhane ki laumawmase ki swa Iseraylri.

⁸ Amia kai ku Tamatama, “Kwi lalasu tengatengane ka kawkawluli; kwi lalasu kai lri tavuvulrucu lutuumane.” Lakamani ku Tamatama palribulunga liniane.

⁹ Ikai ki kwalrialri lini, mialri kwalri. Ku palribulu liniane kaika sasiakawlu belenge, Tamatama ka ngiakakamani. Ngwalai ku sakialibake kalithaneini, palribulu liniane. Sakwa ka siaraparapaleenga liniane,

¹⁰ ai kwi lalasu wabaebalre iniane, la pakwalri ki Sirini. Ngwalai kikai, ku Tamatama abadhanga liniane, si kiecebenga liniane.

¹¹ Ai, ku lakawkawluini pwalringau ku siaswalane, pwalringau ku vai ki Musi ka sasiakawlu ki Tamatama. Kwi lalasu kiavaga, “Yainu ku Tamatama? Ka amani ku napatwalainga ki laveke palribulu ki kawkawluini si latarasangililuku liniane. Kikainga, kikai wabaai ku Sirini patarumara ki Musi ka Tamatama yakai inu?

^12-13 Ku Twaumase naarakai ku pukuini, si pangukai ki Musi pia ku pinangu Twaumasane ka puku, la pawvagai ki acilai, si ililuku ki kawkawluini lribate ki laveke, ku laumawmase laka tangulringaavanenga ku naganeini. Kwini lasu yainunga kikai?” Ku Tamatama nawaililuku ki kawkawluini, kwi lalasu ala kapapedrenge ku tapudrapalane, mia ki rigi ka yakai ki dratane, kai ngwadreadreke.

¹⁴ Mia ki waililuku ki lalwange mwa valrwalru ki lregelrege, ku Ri ki Tamatama payasadra liniane. La ililuku liniane, si la kidrengedrengere ku naganeini.

Kiatubi ku akikakurwane si akipalribulane ka inulri

¹⁵ Tamatama, kiatubi nai muswane twaladha belenge sirapale naiane; kiatubi nai muswane twaladha ki saniange si lrigu ka taikaikaiyane kakalithi naiane. Yainu ku madrau ka pukusu? Yainu ku sakialibake kalithanesu? Kiatubi nai muswane madha kai pulrialrialringau naiane.

¹⁶ Amanisu ku tama nai. Ku cucungulane nai ka Aberahame, Yakubu kai wathingalenga naiane; ai Tamatama, amanisu ku tama nai, twalai kunadruma pakela kaiasasane, amanisu ku Tamatama ka takipalribulane nai.

¹⁷ Tamatama, asu pakatwase naiane ki kadalrananesu? Asu pakakelrathenga naiane, si kai musakene mukuludru muswane? Ngwalai kwini ki la kai maelaela ku apasikaiyane muswane ku umawmase, ngwalai kwini ki lasakwa ka muswane ka umawmase, kiatubi nai muswane ngibangula siwlriwlri kwi kidremedremesu!

¹⁸ Amani nai ku saniange ka kawkawlusu, kingivale nai kipakatwase ki badha; kwi lalasu twasinalrelreme ki Alrivilrivi ka taikaikaiyanesu.

¹⁹ Ku tapangimianesu naiane, miasu ki amani kudra kaiyana warathudu naiane, mia nai ki amani kudra kaiyana akawkawlu muswane.