Isaiya 62 - Ngudradreadrekadhane Ka Sisiu 魯凱語聖經

¹ Lri avavagaku pasapukwane ki swa Yerusalrime; kainaku lri ka taicelreebane, pakeela ku takipalribulaneini, pakeela ku akangimiyaiyane ki vai paledra ku dringelresane, ku sapalribulane mia ki apwi kudaladalai.

² Swa Yerusalrime, sanaka kuni lri drele makanaelre lu pamalebesu; sanaka talialalai makitwadrele makanaelre ku lrigusu. Lri ikai ku vaeva ku bavane ku naganesu, Tamatama ka ngiakakamani sunagane muswane.

³ Lri kamanisu kudra mathaariri ka pagamucu ikai ki alrima ki Tamatama, apagamucu ikai ki alrima ki Twaumase.

⁴ Lri kaisu ka amaninga kudra “Kiacilri ka taelrelre ka ababai” Kwi kadaenganesu kailri ka amaninga kudra kiapasi “Tawlrakavane ka cekele”. Kwi bavane ka naganesu sia “Nikathalradhane ki Tamatama ka lalake” Kwi kadaenganesu lri kipasi “Ngiaesadhane ku takarudrangane”. Asi lwiyane ku Tamatama madalame muswane; kwi lasu lri ataelrelre ka sawvalai ki kadaenganesu.

⁵ Mararamau ki langukathabarane ka marudrange mwa ki tawvailekete, kudra wabekace muswane lri malra muswane sitaelrelre. Mararamau ki warakerakete ka sawvalai lu kadalame ki kiarakerakete ka ababai, ku Twaumasesu mialri kadalame muswane.

⁶ Swa Yerusalrime, ikai ki balingibingi ki cekelesu, lri sikawlaku kulri drangalrungalru. Luka vaiyane lukamaungu, kwi lalasu kai lri icelrebe makanaelre; lri pangulringau ki Tamatama ku pukawnungaini, ku kaika akarimurane liniane.

⁷ Kwi lalasu kai payasadrasadra ki Tamatama, pakeela ku atupelaneini Yerusalrime, ku lrika akidrengedrengedrengerane ki sanaka kuni ka cekele.

⁸ Ku Tamatama wacilikinga ku vanale ku alrima si kiketekete; ku Twaumase malrithethe ku angimiane ku pukawnungaini: Ku pawtaletalekesu kai lri atalekenga ki badha; ku maelane ka zuku kai lri ungulunga ku kwalrisu tubava.

⁹ Sana kaungusu lri ikaai ku akitalekane, si ngikakane ku taleke, la drengedrengere ki Tamatama. Lu lredrekesu, lri ikaai ku budu, si ikai ki kalatadrane ki daaneli ungungulu ku bavasu.

¹⁰ Yakaikai Yerusalrime ka laumawmase, katwasa mulatadre ki cekele! La pasikai ki kaiyangananganai ki sakacekele tukadalranane ku vaeva ku madrau ka kadalranane; padulrwa ku vaeva ku madrau ku kadalranane, si demele mwalra ku watelenge; la pasikai ki sanaka kuni ka laumawmase cegecege ku sapadrukangane ki kadalranane.

¹¹ Ku Tamatama papia kawmasane pelaela: Pelaela ki yakaikai Yerusalrime ka laumawmase, ku Tamatama lri palribulu liniane; lri malra ililuku siwlri ki palribuluini ka laumawmase.

¹² Kwi lalasu lri kipasudalepe ka “Saninge ka kawkawlu ki Twaumase”, ka “Kiapalribulu ki Tamatama ka kawkawlu”. Ku swa Yerusalrime lri kipasudalepe ka “Kadalame ki Twaumase ka cekele”, ka “Kai lri kicilri ki Twaumase ka cekele”.