Isaiya 61 - Ngudradreadrekadhane Ka Sisiu 魯凱語聖經

Matiakiragai ka akipalribulane

¹ Ku Ri ki abebeelengenga ka Tamatama mwalebe makakai nakwane; ku Twaumase pwalawlau cegecege nakwane, la pilri nakwane, la sikawlu nakwane papia ki matiakukuru ka umawmase pelaela ku mathariri ku vaga. Siakawlu nakwane sulrau si pawdringai ki kwalrialri ku kidremedreme ku umawmase; papeaelaela nakwane: Ku kiaravase, lri kipakatwasenga; ku kiaemenge, lri kipangilralrainginga.

² Ku Twaumase siakawlu nakwane katwase pelaela: Kudra apalribulane ki Tamatama ki kawkawluini ku caili; ku apathavungane ki Twaumase ki badha ku vai. Ku Twaumase siakawlu nakwane katwase sasa ki watubitubi ku kidremedreme ku laumawmase,

³ kwidra yakai Ziyungu tubitubi ku kidremedreme ku laumawmase ku Twaumase lri arakai ku pagamucu pawbalrithi ki thuvugu, lri arakai ku sakiaragai pawbalrithi ki atubiane ku kidremedreme, lri arakai ku sadrengedrengerane pawbalrithi ki sialringau. Kwi lalasu lri mia ki ngilralredreke ki Tamatama ka angatu; kwi lalasu lri arakai ku dringelresane kaungu. Ku Tamatama lri ngwalai ku takaunganeini si kidrengedrengere.

⁴ Kwi lalasu lri pela pudriadringai ku tawlrakavane kunadruma, lri tupela ku natayelrelrelreane kunadruma; kwi lalasu lri tucekele kudra maulainga kababuruku ku cekele.

⁵ Lakawkawluli, ku maelane ka zuku lri kela ubalrithi pagwagu ku kiu numi; kwi lalasu lri kaungu ki kadaengane numi, si marasikai ki babududu numi.

⁶ Ku palrapalra lri thingale numiane ala ka barakalai numi ki Tamatama, lai pasudalepe numiane ka sasiakawlu ki Twaumase. Lri elrelre numi ku tacekecekelane ki sanaka kuni, si kisupisupilri ku ngiradhekanane ki sanaka kuni.

⁷ Kai numi lri kiarubwanenga si kitusinalreme; lri pela numi ikaikai ki kadaengane numi. Lri aru drima kakalra ku akaesadhane numi; lai lri kisupisupilringa numi ku palralrawthu ka akiragadhane.

⁸ Ku Tamatama amia kai: Madalamaku ki dringelresane; magirimucaku kalrase ki waravase ribici si pasalrivane. Lri pangimiaku kapatengatengane pakalreva ki kawkawluli; lri makaketekete nai ku palralrawthu ka samakaketeketane.

⁹ Ku agagane lini lri ikai kai ki sanaka kuni kimalrigilrigilrigu; ku mwabaibalrithi liniane lri ikai ki sanaka umawmase kiusakesakene. Sanaka wadrele liniane ku umawmase lri thiingale: Kai lalasu yai kiapatarumara ku akaesadhane nakwane ka kawkawlu.

¹⁰ Ngwaladhaku ki Tamatama si kiraraagai, kai kidremedremeli ngwalai ki Tamatama si kiraragai. Ku Tamatama pasialaimai nakwane ku sapalribulane si dringelresane ka sangiragelanane, mia ki warakerakete ka sawvalai ka siatalrupunu ngiragelane, mia ki kiarakerakete ka ababai ka siasangiragelanane.

¹¹ Mararaamau ki sapaivai ka warigarigarigi cebecebe kadradrau, ku abebeelengenga ka Tamatama lri palribulu ki kawkawluini; sanaka kuni lri drengedrengere iniane.