Isaiya 60 - Ngudradreadrekadhane Ka Sisiu 魯凱語聖經

Lrika lrigu lukabibilrili ki Yerusalrime

¹ Yerusalrime, ngidrakala, mia ki vai ledra; ku draredrare ki Tamatama paledra muswane!

² Drela, ku dradrimitane wakabungu ki kadaengane; kai dradrimitane palrilri ki sanaka umawmase. Ai ku ledra ki Tamatama lri paledra muswane; ku draredrareini lri ikai ki kinawmasanesu athingalane.

³ Sanaka kuni lri dethe ki ledrasu; ku latalialalai lri kibilibili ki thelaresu.

⁴ Drela ki ngiathalringulu muswane luka watumane: Kwi sakacekelesu yaelrelrenga, kwi lalasu lri siwlri mutavanane. Ku lalakesu ka sawvalai lri singikai adaili kainganai; ku lalakesu ka ababai lri mia ki lrulai kiaba kainganai.

⁵ Wadrelesu kikai patuelre lri kai besere ku akiraragadhane; kwi kidremedremesu lai lri itituku ki sakiararagai. Twalai talikaiyane kavai ki laveke, ku kingi gingi lri mwaludru kainganai; ku tacekecekelane ki sanaka kuni lri mwamwa ki alrimasu kai kareteretege.

⁶ Twalai ka Midiange si Ipa, ku lrakeda lri turededele kainganai; kwini lalrakeda lri twalai Seba iluku ku kingi si sapasangulrelremane. Ku laumawmase lri drengedrengere ku tapiane ki Tamatama.

⁷ Patuelre ku kiu ki Kidare lri kiluku mwa cucubungu muswane, patuelre ku balase ka kiu ki Nebaiuthe lri tusapatarumarane ka waudriwdripi, lri patarumara pikai ki tapatarumaramarane, lai lri kiraragai ku Tamatama. Ku Tamatama lri paruthelare ki daaneini ka silrialribate ki siaswalane.

⁸ Lakikwini mia ki ememe ngipalai kainganai, mia ki tavagu ka wakela mwa ki lalisisuku, lakikwini laka aneane?

⁹ Ki lakikwini yai twalai adaili ki kabicelrakane ki laveke ka kadaengane kaiangananganai siwlri ka tarasiwbawbai ka lavarukuru, mailuku ki kawkawlu ki Twaumase mubalribalriu. Kwi lalasu wailuku ku kingi gingi, si patarumara baai ki Tamatama ka sanianiangenga ka Twaumase ki swa Iseraylri; asi lwiyane ku Twaumase pamwasakene ki sanaka kuni papia ki kawkawluini.

¹⁰ Ku Tamatama amia kai ki swa Yerusalrime: Ku maelane ka zuku lri kainganai si atalingikaiyane muswane raedre ku kepale ki cekele; ku latalialalai lini lri marasikaikai muswane. Sakalisilisiana naku pathavungaku muswane, ai kikainga lri patarumaraku baai muswane ku migemi si thalradhane.

¹¹ Kwi lrawlrawdru ki cekelesu lri ka takaminuelebane ki vaiyane ki maungu, ku lrika akelane ki talialalai ki lakuni tuswalupu ku lalawbubulu.

¹² Ku kai pasiakai muswane ku minzuku lri kamudu makanaelre; ku kuni lini lri kisaalrunga atawlrakavane.

¹³ Ikai angatungatu Lebanungu ku mathaithariringa ku angatu, alrenge, cedare ka angatu, hwanyange ka angatu kiasalri patuelre arakai tupela Yerusalrime, lani kathariri abavane ku daaneli, lani kathariri matisalru ku saniange ka cekeleli.

¹⁴ Ku lamwabaibalrithi ki nawadredrepete muswane ka umawmase lri lukwane si sukubu muswane makanaelre; ku natwadreadrekase muswane ku umawmase lri papia muswane pidruru sukubu. Kwi lalasu lri pasudalepe muswane ka “Cekele ki Tamatama” Lai lri pasudalepe muswane ka “Ziyungu ka cekele ki saniange ki swa Iseraylri ka Twaumase”.

¹⁵ Kaisu lri kicilringa, kikalisi, kaika amaninga kudra takakadrwane ki umawmase ka cekele. Lri pakathariraku pamatisalru muswane, si kamaninga kudra kiarararagai palralrawthu ka kadaengane.

¹⁶ Sanaka kuni lri kainganai sirapale muswane; ku latalialalai lri mia ki tina lapu muswane. Lukamaninga kwidra lai lri thingalesu ka amaniaku ku palribulu muswane ka Tamatama; amaniaku ku wadulru sanaka manemanenga ka palribulu ki swa Iseraylri.

¹⁷ Lri malraku ku kingi pawbalrithi ki lriwlu, ku gingi pawbalrithi ki adreme, ku lriwlu pawbalrithi ki angatu, ku adreme pawbalrithi ki lrenege. Ku tararathurathudu muswane kailri dredrepetenga muswane; lri parakaiyaku liniane ku dringelresane si rathudane rathudu marasikai muswane.

¹⁸ Ikai ki kadaenganesu lri kaisu kilalranga ku ngiakarararakacane ku lingau; ku kadaengane ki kunisu kai lri kikabebetethenga. Lri miaku ki kepale palakebe muswane; lri ngwalaisu ku tapalribulaneli si drengedrengere nakwane.

¹⁹ Luka vaiyane, kaisu lri murikainga ki vai; lukamaungu, kaisu lri murikainga ki dramare; kwaku ka Tamatamasu lrika ledranga naku muswane apalralrawthu; ku draredrare ki Twaumasesu lri paledra muswane.

²⁰ Ku vai kai lri lrilriwgunga palralrawthu ku dramare kai lri kilepelepengenga palralrawthu; kwaku ka Tamatamasu lrika ledranga naku muswane apalralrawthu; ku tubitubisu ki vaivai lri alikainga.

²¹ Ku laumawmasesu lri arakai ku dringelresane kaungu; kwi lalasu lrika palralrawthunga ucungulu kai ki kadaengane. Ngiakakamaniaku bekace liniane, si twadrau liniane, pakai ku apathingalanane ku lriguli.

²² Ku titikianenga numiane ku daane lri amaadrau ka zuku, ku turawraamurunga ku zuku lri amagagaarangenga ka kuni. Tamatamaku; lu kelanga ku vai lri pakirarimwaku pangimia kikai.