Isaiya 6 - Ngudradreadrekadhane Ka Sisiu 魯凱語聖經

Ku Twaumase wadawlu ki Isaiya paayuginsia

¹ Saka tapacadhane ki talialalai ka Uzia kwini ki caili, wadrelaku ki Tamatama; wanene ikai ki sabebeelengenga ki taetalane, ku lragiane ku laimaini wakabungu ki daane ki Twaumase palraelre.

² Ngithalringulu iniane yakai ku sasiakawlu belenge ka Salahu ku marasiakaikai iniane, ki tangeea eneme ku sapakepake makanaelre, ku drusa wakabungu ki lringau, ku drusa wakabungu ki kinawmasane, ku drusa la ngipalapalai.

³ Kwi lalasu la matubaebaebalre iya kai: Sanianiangenga, sanianiangenga, sanianiangenga! Tamatama ka abebeelengenga ki sanaka kwapingi! Ku lriguini swaete kawmasane.

⁴ Ku lingau ku takaralealane lini pangia velevele ki karwalai ki daane ki Twaumase; swaete ku ebelre ikai ki daane ki Twaumase.

⁵ Amiaku kai, “Kadrwanga naku, lri matiisalregesegaku! Asi lwiyane sanaka takawrivaane ki ngudwili kaika mabula patuelre; kai ngiathalringulu nakwane kai umawmase ku takawrivane lini la mialri kai kabula. La dreleana naku ki talialalai ka Tamatama ka abebeelengenga ki sanaka kwapingi!”

⁶ Lakamani, yakai ku tangea ku eneme ku sapakepake ku sasiakawlu belenge ku kaiyanganai papia nakwane ngipalai, wamalra ku vaeva ka sakacikacipane ki lrangele, la kacipi kwini ki tapatarumaramarane ku madrareeange ku lrangele,

⁷ kwini lasu la malra kwini lrangele patakela ki bibianeli, si iya kai, “Kikai apwi ka lrangele patakelanga ki bibianesu, ku tapasalrivanesu maulrawnga patuelre; ku pasalrivanesu kiapacepenga.”

⁸ Asi lwiyane, kialalraku ki Tamatama saiya kai, “Lri sikawlaku ki aneane? Aneane ku lri ubangalre pasikai naiane katwase pelaela?” La tubalreaku iya kai, “Nau mwa! Sikawlaili!”

⁹ La sikawlu nakwane katwase mwa pelaela ki kawkawluini iya kai, “Kialalra numi la kilaalranga numi, ai kai numi maka pwalringalringau; wadrele numi la peelanga drele, ai kai numi maka malalrwai.”

¹⁰ La pacungulu iya kai nakwane, “Kikai awlru lini kai ki laumawmase ani kangalradangade, kacele ku calringa, kabuti ku maca, lani kai maka drele, ani kai maka pulringalringau lu kilalra, ani kai maka thingale kidremedreme; lu kaika ngimiyaiya kwini, kai lalasu lri dulru ngibangulu ku kidremedreme si papia nakwane, lai lri kipawdringai.”

¹¹ Kiavagaku, “Tamatama, ki kikai ngimiyaiya kai lri tarathainu?” La tubalre, “Lri pakeela ku akamudane kai ki cekele, lri kawlrau ku laumawmase, ku daane lai lri kakadrwa ku umawmase ku yakaikai, ku kadaengane lri aubulane.

¹² Kunaku ka Tamatama lri pakatwasaku ki laumawmase paacaicali pamwa adaidaidaaili, kai sakakadaedaenganane lrika cinilriane patuelre.

¹³ Alaiyasi ikai kai ki kadaengane ku tamangeale la asurwana ku tangeea ku umawmase, kwini umawmase lri mialri kiamudu; kwini lasu lri mia ki tharialupu ka angatu kipulebe, lai ka kathanenga ku tangadrane ku asuru.” (Kwini tangadrane sapathingalane ku bavane ku apathagilane ki kawkawlu ki Twaumase.)